Ukuhlakanipha Kokuhlonipha UNkulunkulu Kubonakaliswa Kanjani?

“UKUHLAKANIPHA kompofu kuyadelelwa, namazwi akhe awezwakali.” Inkosi ehlakaniphile uSolomoni yaphetha ngala mazwi indaba yendoda empofu kodwa ehlakaniphile eyasindisa wonke umuzi ekubhujisweni. Nokho, ngokudabukisayo, “akakho okhumbula leyo ndoda empofu.”—UmShumayeli 9:14-16.

Abantu bathambekele ekubabukeleni phansi abampofu, ngisho noma beye benza izenzo ezinhle kakhulu. Kwaba njalo ngoJesu. U-Isaya waprofetha ngaye: ‘Wayedeleliwe, washiywa ngabantu, umuntu wobuhlungu owazi ukugula.’ (Isaya 53:3, NW). UJesu wayedelelwa abanye ngenxa nje yokuthi wayengenaso isikhundla futhi engavelele njengabaholi bosuku lwakhe. Noma kunjalo, wayenokuhlakanipha okwakukudlula kude okwanoma yimuphi umuntu onesono. Abantu endaweni uJesu akhulela kuyo benqaba ukukwamukela ukuthi le ‘ndodana yombazi’ yayibonakalisa ukuhlakanipha okunjalo futhi yenza imisebenzi yamandla enjalo. Nokho, lelo kwakuyiphutha elingathi sína, ngoba ukulandisa kuqhubeka kuthi uJesu “akenzanga imisebenzi eminingi yamandla lapho ngenxa yokuntula kwabo ukholo.” Yeka indlela labo bantu abalahlekelwa ngayo!—Mathewu 13:54-58.

Kwangathi singelenze iphutha elifanayo. UJesu wathi: “Ukuhlakanipha kubonakaliswa kulungile yimisebenzi yako.” Labo abenza umsebenzi kaNkulunkulu, badlulisele nokuhlakanipha kwasezulwini ababonakali ngezikhundla zabo noma ngokuma kwabo emphakathini, kodwa babonakala ‘ngezithelo ezinhle’ abazibonakalisayo ukholo nezenzo zabo okusekelwe eBhayibhelini.—Mathewu 7:18-20; 11:19.