Wafela Ukuphila Ngezimiso
“SIKHUMBULA u-August Dickmann (owazalwa ngo-1910), owayengomunye woFakazi BakaJehova.” Aqala kanjalo amazwi aqoshwe oqwembeni (oluboniswe lapha) olusanda kuvulwa endaweni eyayiyikamu lokuhlushwa eSachsenhausen. Kungani omunye woFakazi BakaJehova ayengafanelwa uqwembe olunjalo? Ingxenye esele yala mazwi aqoshiwe iyalandisa: “Wabulawa obala i-SS ngo-September 15, 1939, ngenxa yokwenqaba ukuya empini ngesizathu sikanembeza.”
U-August Dickmann wafakwa ekamu lokuhlushwa laseSachsenhausen ngo-1937. Ngemva kwezinsuku ezintathu kugqashuke iMpi Yezwe II ngo-1939, wayalwa ukuba asayine iphepha lokubuthelwa empini. Lapho enqaba, umkhuzi wezempi wasekamu waxhumana noHeinrich Himmler, umphathi we-SS (Schutzstaffel, onogada abakhethekile bakaHitler), wacela imvume yokubulala uDickmann phambi kwabo bonke ayevalelwe nabo ekamu. Ngo-September 17, 1939, i-New York Times yabika iseJalimane: “U-August Dickmann, oneminyaka engu-29 ubudala, . . . udutshulwe yiqembu labadubuli lapha.” Leli phephandaba lathi wayengumJalimane wokuqala owenqaba ukuya kuleyo mpi ngenxa kanembeza.
Ngemva kweminyaka engu-60, ngo-September 18, 1999, ukufa kukaDickmann kwakhunjulwa i-Brandenburg Memorial Foundation, futhi lolu qwembe lwesikhumbuzo manje lukhumbuza izivakashi ngesibindi nokholo lwakhe oluqinile. Uqwembe lwesibili olusodongeni lwangaphandle lwendawo eyayiyikamu lukhumbuza izivakashi ukuthi uDickmann wayemane nje engoyedwa koFakazi BakaJehova abangaba ngu-900 abahlupheka eSachsenhausen ngenxa yezinkolelo zabo. Kunabaningi abengeziwe abahlupheka nakwamanye amakamu. Yebo, ngisho nangaphansi kwezimo ezimbi kakhulu zasemakamu okuhlushwa, abaningi baqhubeka bethembekile ezimisweni zokuhlonipha uNkulunkulu.
KoFakazi BakaJehova, kuwumthwalo womKristu ‘ukuzithoba emagunyeni aphakeme [kahulumeni].’ (Roma 13:1) Nokho, lapho ohulumeni bezama ukubaphoqelela ukuba beqe imithetho kaNkulunkulu, balandela isibonelo sabaphostoli bakaKristu, abathi: “Kumelwe silalele uNkulunkulu njengombusi kunabantu.” (IzEnzo 5:29) Ngenxa yalokho, ezweni lapho ubutha bezizwe nenzondo engokohlanga kuye kwaholela onyeni olushaqisayo, oFakazi BakaJehova yonke indawo, njengo-August Dickmann, baphishekela ukuthula. Balandela isikhuthazo seBhayibheli: “Ungazivumeli ukuba unqotshwe okubi, kodwa qhubeka unqoba okubi ngokuhle.”—Roma 12:21.