Akukhumbulayo NgeNew York City

UPHAWU oluboniswe lapha luye lwabekwa lwagqama kwesinye sezakhiwo zefektri ye-Watchtower Society eBrooklyn, eNew York kusukela ngawo-1950. Abahamba ngezinto zokuhamba, ababuki bamazwe nabanye abadlula lapho bakhunjuzwa ukuba bafunde iBhayibheli nsuku zonke. Incwadi elandelayo, evela entombazanyaneni enguFakazi, ibonisa ukuphumelela kwalesi sikhumbuzo.

Ngangixoxa nengifunda naye ekilasini ngalokho engifuna ukukwenza lapho ngiqeda esikoleni esiphakeme. Ngaqala ukukhuluma ngeBethel, indlunkulu yoFakazi BakaJehova, futhi wajabula kakhulu. Wangitshela ukuthi wayehlale eNew York City ukuphila kwakhe konke. Umkhaya wakubo wawungebona abantu abayithanda kakhulu inkolo, kodwa njalo ekuseni lapho ebheka efasiteleni, kwakunophawu olwaluthi ‘Funda IZwi LikaNkulunkulu IBhayibheli Elingcwele Nsuku Zonke.’ Ngakho iBhayibheli lakhe wayelifunda nsuku zonke ngaphambi kokuba aye esikoleni.

“Ngemva kokusuka kulelo dolobha, uthi into ayikhumbulayo ngeNew York City ukuthi lapho evuka, akasasiboni isikhumbuzo sokuba afunde iBhayibheli lakhe. Kodwa ngenxa yophawu olusesakhiweni se-Watchtower Society, ukufunda iBhayibheli kuye kwaba umkhuba, ngakho uyaqhubeka efunda iBhayibheli nsuku zonke!”

Iyiphi indlela engaba ngcono yokuqala usuku kunokufunda ingxenye yeZwi likaNkulunkulu! Ngokwenza kanjalo, akungabazeki ukuthi uyowaqonda amazwi omphostoli uPawulu athi: “Imibhalo engcwele, [ikwazi] ukukuhlakaniphisela insindiso ngokholo olumayelana noKristu Jesu.”—2 Thimothewu 3:15-17.