Igama Laphezulu Seliyabizwa Kwa-Israyeli
SEKUNGAMAKHULU eminyaka ubuJuda bakuqala benqabela abalandeli babo ukuba babize igama laphezulu, elithi Jehova. NgokweMishnah, noma ngubani obiza igama likaNkulunkulu “ngeke abe nengxenye ezweni elizayo.”—Sanhedrin 10:1.a
Ngo-January 30, 1995, lowo owayengurabi oyinhloko wobuSephardi kwa-Israyeli walibiza ngamabomu igama laphezulu. Wenza kanjalo lapho ephindaphinda i-tikkun, umthandazo wokulungisa wamaCabala. Lo mthandazo wenzelwa ukuba uNkulunkulu abuyisele isilinganiso esithile sokuvumelana endaweni yonke, lokho ngokwabakhulekeli, okwaphazanyiswa ibutho lemimoya emibi. Iphephandaba i-Yedioth Aharonoth lika-February 6, 1995, lathi: “Lona umdanti wokukhulekela onamandla amakhulu kangangokuba amazwi awo asencwajaneni ekhethekile engenakuthengiselwa umphakathi.” Kucatshangwa ukuthi ukubizwa kwegama likaNkulunkulu kulesi simo kwenza isicelo sibe namandla ngokukhethekile.
Kungokuphawulekayo ukuthi iBhayibheli liyala izinceku zikaNkulunkulu ukuba zisebenzise igama laphezulu, elithi Jehova. (Eksodusi 3:15; IzAga 18:10; Isaya 12:4; Zefaniya 3:9) Embhalweni wokuqala weBhayibheli wesiHeberu, lelo gama livela cishe izikhathi ezingu-7 000. Nokho, iBhayibheli liyakulahla ukusetshenziswa kabi kwegama likaNkulunkulu. Umyalo wesithathu eMiyalweni Eyishumi uthi: “Ungaliphathi ngeze igama likaJehova uNkulunkulu wakho, ngokuba uJehova akayikumyeka oliphatha ngeze igama lakhe.” (Eksodusi 20:7) Lingase liphathwe kanjani ngeze igama likaNkulunkulu? Incwadi yokuhlaziya ye-Jewish Publication Society iphawula ukuthi igama lesiHeberu elihunyushwe ngokuthi “ngeze” alisho “ukulisebenzisela ubala” kuphela igama laphezulu kodwa lihlanganisa ‘nokuphindaphinda umthandazo ngokungadingekile.’
Khona-ke, kufanele siwubheke kanjani umthandazo wokulungisa wamaCabala, i-tikkun? Uyini umsuka wawo? Ngekhulu le-12 nele-13 C.E., ubuJuda obungaqondakali, obubizwa ngokuthi ubuCabala, baqala ukuthandwa. Ngekhulu le-16, u-Isaac Luria, urabi, wafaka i-“tikkunim” emidantini yokukhulekela yobuCabala. Igama likaNkulunkulu lasetshenziswa njengekhubalo elingaqondakali elinamandla akhethekile, futhi laba ingxenye yomdanti wokukhulekela wamaCabala. Ingabe unomuzwa wokuthi lena indlela efanele yokusebenzisa igama likaNkulunkulu?—Duteronomi 18:10-12.
Kungakhathaliseki ukuthi uwuphendula kanjani lowo mbuzo, uyovuma ukuthi ukubizwa kwegama likaNkulunkulu obala kwa-Israyeli wanamuhla kwakuyisenzakalo esingavamile kakhulu. Nokho, uNkulunkulu ngokwakhe wabikezela: “Niyakusho ngalolo suku ukuthi: ‘Bongani uJehova, nibize igama lakhe, nizazise izenzo zakhe phakathi kwezizwe, nimemezele ukuthi igama lakhe liphakeme. Hlabelelani kuJehova, ngokuba wenzile izinto ezinkulu; lokhu makwazeke emhlabeni wonke.’”—Isaya 12:4, 5.
Ngokujabulisayo, kwa-Israyeli, njengasemazweni angaphezu kuka-230 emhlabeni wonke, oFakazi BakaJehova benza wonke umzamo ukuze basize omakhelwane babo bathole ulwazi olunembile ngoJehova. Banethemba lokuthi kusenabaningi abengeziwe abasazofinyelela ekuqondeni incazelo yemibhalo enjengamaHubo 91:14 athi: “Ngenxa yokuba enamathele kimi [mina Jehova], ngakho ngiyamkhulula; ngiyamphakamisa ngokuba elazi igama lami.”
[Umbhalo waphansi]
a IMishnah iqoqo lokuhlaziya elithathe indawo yomthetho ongokomBhalo, elisekelwe ezincazelweni zaworabi ababizwa ngokuthi amaTannaim (abafundisi). Yabhalwa phansi kusukela ekupheleni kwekhulu lesibili kuya ekuqaleni kwelesithathu C.E.
[Isithombe ekhasini 28]
Lapha eNegeb, abantu bakaJehova benza igama lakhe neZwi lakhe kwaziwe
[Isithombe ekhasini 29]
Uqwembe olubonisa igama laphezulu