Okuthile Okungcono Kunezimonyo

NGEMVA kokubhekisela ‘ezintweni ezisiza ekubukekeni kwangaphandle’ abesifazane ababezisebenzisela ukuthuthukisa ubuhle, umphostoli uPetru weluleka: “Kunalokho, ubuhle benu kufanele bube obobuntu benu bangempela bangaphakathi, ubuhle obungagugi bomoya omnene nothule, obungobenani elikhulu emehlweni kaNkulunkulu.”—1 Petru 3:3, 4, Today’s English Version.

Ngokuthakazelisayo, lapho umphostoli ebhala ngalokhu kuhloba kwangaphandle, wasebenzisa uhlobo lwegama lesiGreki u-koʹsmos, okuvela kulo negama lesiNgisi elithi “cosmetic,” elisho “okukwenza ube muhle ikakhulukazi ngebala lesikhumba.” Ingabe uPetru wayebeka umthetho owenqabela abesifazane abangamaKristu ukuba basebenzise izimonyo nezinye izinto ezinjalo ezithuthukisa ubuhle? Akukho lutho eZwini likaNkulunkulu olusikisela lokho. Kunalokho, livumela umuntu ngamunye ukuba azinqumele kule ndaba, ngakho kungase kulindeleke isilinganiso esithile sokuhluka ekukhetheni.

Nokho, uma izimonyo zigcotshwe ngokweqile noma ngezinga eliphazamisa abaningi, zinikeza muphi umbono? Azinikezi yini umbono wokuba ngumuntu oyidlabha, oyiqhalaqhala, oweqisayo, obukisayo noma ozazisayo? Ngempela, zingakululaza ukubukeka kowesifazane, futhi kungenzeka zinikeze nombono ongewona ngokuphathelene nokuziphatha kwakhe.—Qhathanisa noHezekeli 23:36-42.

Eqaphela lokhu, owesifazane ‘othi uhlonipha uNkulunkulu,’ uma ekhetha ukugcoba izimonyo, uyozama ukwenza ubuso bakhe buveze isimo sokuhluzeka kwengqondo, ubumnene, umusa nokuzithoba. Izimfanelo ezinjalo ziyomenza abukeke kahle ngokwengeziwe futhi akhange. Empeleni, kungakhathaliseki ukuthi ukhetha ukugcoba izimonyo noma cha, uyobonisa isizotha nobuhle bangaphakathi. Lokhu kuyobonisa ukuthi uyazi ukuthi kunokuthile okungcono kunezimonyo, njengoba kusikisela amazwi kaPetru acashunwe ngenhla.—1 Thimothewu 2:9, 10.