Ubudlova—Ngokushesha Buzophela Phakade!
“Ubudlova Bufaka Izwe Engozini”—The New York Times, United States.
“Ubudlova Ekhaya”—O Globo, Brazil.
“Ubudlova Bucathamela Abesifazane Bomhlaba”—The Globe and Mail, Canada.
LEZI zihloko ezigqamile ezithathwe emaphephandabeni aseNyakatho naseNingizimu Melika zibonisa isimo esandayo esiphazamisayo emhlabeni wonke. Njengoba i-World Health Organization iye yakubeka muva nje, “zonke izinhlobo zobudlova ziye zanda ngokuphawulekayo emashumini amuva eminyaka.”
Cabangela amanye amanani asangulukisayo:
Ukubulawa kwabantu. ELatin America naseCaribbean, abantu abangaba ngu-1 250 babulawa ngobudlova usuku ngalunye. Ngenxa yalokho, “engxenyeni yamazwe akulesi sifunda, ukubulawa kuyimbangela yesibili eyinhloko yokufa entsheni eneminyaka engu-15-24.”
Ukuphathwa ngobudlova kwezingane. Ukuhlukunyezwa kwezingane ngokomzimba, ngokobulili nangokomzwelo yizinkinga ezikhungethe umhlaba wonke. Ngokwesibonelo, “ukuhlolwa kwabantu abadala emazweni amaningana anezimboni kusikisela ukuthi u-10%-15% wezingane uyizisulu zokunukubezwa ngokobulili—iningi lazo amantombazane.”
Ukuphathwa ngobudlova kwabesifazane. Ngemva kokuhlola ukuphathwa kabi kwamalungelo abantu emhlabeni wonke ngo-1997, abacwaningi baphetha ngokuthi “ubudlova basekhaya buye baba ngenye yezimbangela eziyinhloko zokulimala kwabesifazane cishe kuwo wonke amazwe omhlaba.” (Human Rights Watch World Report 1998) Njengoba ubudlova basekhaya busakazekile kodwa buyinkinga engabikwa kakhulu, sebubizwa ngokuthi “inkinga engabikwa yekhulu lama-20.”—The Globe and Mail, Canada.
Umhlaba “wagcwala ubudlwangudlwangu” ngendlela efanayo nangezinsuku zikaNowa. (Genesise 6:9-12) Kodwa uJehova uNkulunkulu wagcina lowo “mshumayeli wokulunga” nomkhaya wakhe bephila “lapho eletha uzamcolo phezu kwezwe labantu abangamhloniphi uNkulunkulu.” UNkulunkulu uyothatha isinyathelo esifanayo nasosukwini lwethu. Uyolondoloza “abantu abanokuzinikela kokuhlonipha uNkulunkulu” lapho esusa abantu abanobudlova nababi futhi enza lo mhlaba ube yipharadesi ezweni lakhe elisha alithembisile. (2 Petru 2:4-9; 3:11-13) Akukwenzi yini ujabule ukwazi ukuthi ngokushesha ubudlova buyophela phakade?