“Niyilokho UNkulunkulu Alindele Ukuba Sibe Yiko”

NGOKUBAMBISANA neziphathimandla zezwe “ngenxa yeNkosi‚” amaKristu angalindela ‘ukudunyiswa njengabenzi bokuhle.’ (1 Petru 2:13-15) Yilokho okwenzeka koFakazi BakaJehova eNingizimu Afrika esikhathini esithile esidlule emhlanganweni wesigodi ababa nawo ehholo lasekolishi.

Ngosuku lokuqala lomhlangano, onogada bakuleli kolishi bama ngomumo belindele inani elivamile labantu abanolaka nabangenakho ukubambisana, abanjengalabo ababebhekana nabo emihlanganweni yolunye uhlobo. Nokho, njengoba babengakaze basebenzelane noFakazi BakaJehova, babezomangala ngendlela ejabulisayo!

Njengengxenye yokuhlola okuvamile abakwenzayo emasangweni, labo nogada babesesha imoto ngayinye engenayo nephumayo emagcekeni. Bamangala lapho bebingelelwa ngobungane, ngesineke nangenhlonipho, nakuba lokhu kuseshwa kwakubabambezela ababeze emhlanganweni. Kwakungekho kudaza inkani, ukuphikisana nenhlamba okwakuvamile. Omunye unogada waphawula: “Ngokungafani nezinye izivakashi, nibonisa umoya wokuthobeka nesizotha osobala kithi sonke.”

Lapho isikhulu sonogada siqaphela indlela oFakazi BakaJehova ababebambisana ngayo nabo, sanquma ukuthi kwakungadingekile ukuba kuseshwe izimoto, sithi: “Ngoba niziphethe kahle kakhulu.” Ngenxa yalokho, izimoto ezazinesigqebhezana sokupaka esithi “JW [Jehovah’s Witnesses]” zavunyelwa ukuba zingene zingaseshiwe.

Lapho umhlangano uphela, isikhulu sonogada sathi sethemba ukuphinde sibonane noFakazi ngokushesha uma bephinda beza. Sathi: “Asikaze sibabone abantu abaziphethe kahle kangaka. Niyilokho uNkulunkulu alindele ukuba sibe yiko.” Ukunconywa okunjalo kuwakhuthaza ngokwengeziwe amaKristu eqiniso ukuba ‘alondoloze ukuziphatha okuhle,’ ukuze abantu ‘bakhazimulise uNkulunkulu ngenxa yemisebenzi yawo emihle abangofakazi bayo bokuzibonela.’—1 Petru 2:12.