Ukuziphatha Okuhle Kuletha Udumo

IPHEPHANDABA lase-Italy i-Gazzetta del Mezzogiorno latusa oFakazi BakaJehova ngokunyathelisa isihloko esithi “IMatera—Idolobha Elinezindlu Eziyimihume Eyingqayizivele.” Lesi sihloko savela kumagazini i-Phaphama! ka-July 8, 1997, owasakazwa kabanzi ngezilimi eziningi. Okwamanje i-Phaphama! ihunyushwa ngezilimi ezingu-81 futhi kusakazwa amakhophi angaphezu kwezigidi ezingu-19 emhlabeni wonke. Leli phephandaba laphawula ukuthi i-Phaphama! yayidle ubhedu kuleli hlobo “emikhankasweni yokukhangisa ukuze kuqokonyiswe ifa elingokomlando nelobuciko ledolobha [laseMatera].”

Leli phephandaba lancoma oFakazi ngoMhlangano Wesigodi ‘Wokholo EZwini LikaNkulunkulu’ owaqhutshwa eMatera ngo-1997. Lesi sihloko saphawula ukuthi oFakazi bakwazi “ukumemela abantu abangu-4 000 e-XXI Settembre Stadium [yedolobha] maphakathi nehlobo elangeni elalikhiph’umkhovu etsheni; bahlanza, bapenda, futhi balungisa izinto ezithile kulesi sikhungo sezemidlalo (ikakhulukazi izindlu zangasese) mahhala, bekhokha izindleko zokuthenga izinto zokusetshenziswa ezidingekayo bona ngokwabo.”

OFakazi BakaJehova balwela ukuba omakhelwane abahle. (Mathewu 22:37-39) Futhi balandela umyalo ongokomBhalo: “Londolozani ukuziphatha kwenu kukuhle phakathi kwezizwe, ukuze . . . zikhazimulise uNkulunkulu ngosuku lokuhlola kwakhe ngenxa yemisebenzi yenu emihle ezingofakazi bayo bokuzibonela.”—1 Petru 2:12.