Odokotela, Amajaji NoFakazi BakaJehova

EMUVA ngo-March 1995, oFakazi BakaJehova baxhasa imihlangano emibili eBrazil. Yayiyini injongo? Ukufuna ukubambisana nabezokwelapha nabomthetho lapho isiguli esisesibhedlela singomunye woFakazi BakaJehova futhi singeke sikwamukele ukumpontshelwa igazi.—IzEnzo 15:29.

Ngokudabukisayo, kwezinye izimo odokotela babeye bazishaye indiva izifiso zeziguli ezingoFakazi futhi bafune imvume yenkantolo ukuze baphoqelele ukumpontshelwa kwegazi. Ezimweni ezinjalo oFakazi basebenzisa noma iyiphi indlela engokomthetho eyayikhona ukuze bazivikele. Nakuba kunjalo, bakhetha ukuba kuxoxiswane kunokuba kuxatshanwe. Ngakho-ke imihlangano yagcizelela ukuthi kunezindlela eziningi ezingasetshenziswa esikhundleni sokwelashwa ngokumpontshelwa igazi lomunye umuntu nokuthi oFakazi BakaJehova bazemukela ngenjabulo.a

Umhlangano we-Regional Council of Medicine yaseSão Paulo wawusuye wakusekela kakade ukuma koFakazi. Ngo-January 1995, wanquma ukuthi uma isiguli singavumelani nokwelapha okutuswa udokotela, sinelungelo lokukwenqaba nokukhetha omunye udokotela.

Kuyancomeka ukuthi manje kunamakhulu odokotela emphakathini wezokwelapha waseBrazil azimisele ukwelapha ngaphandle kwegazi iziguli zawo ezikucelayo. Kusukela ngemihlangano ka-March 1995, ukubambisana phakathi kodokotela, amajaji, noFakazi BakaJehova eBrazil kuye kwathuthuka ngokuphawulekayo. Ngo-1997 umagazini wezokwelapha waseBrazil i-Âmbito Hospitalar wanyathelisa isihloko esagcizelela ukuthi amalungelo oFakazi BakaJehova okuma kwabo ngokuqondene negazi kumelwe ahlonishwe. Manje sekuqashelwa kabanzi ukuthi, “umsebenzi kadokotela wokuvikela impilo yesiguli sakhe akufanele weqele ngalé komsebenzi wakhe wokusekela ilungelo lokuzikhethela kwesiguli,” njengoba kwasho i-Regional Councils of Medicine yamazwe aseRio de Janeiro naseSão Paulo.

[Umbhalo waphansi]