Ukumelana Nokusolwa Okungamanga EFrance
MUVA nje oFakazi BakaJehova eFrance babe yizisulu zokusolwa okuningi okungamanga. Besizakala ngezenzakalo ezesabekayo ezihilela amahlelo enkolo eYurophu naseJapane, abezindaba basakaza ukwaziswa okusontekile ngoFakazi. Bachazwa ngokungafanele njengelinye lamahlelo amakhulu nayingozi kunawo wonke.
Bezama ukulungisa leyo ndaba, oFakazi BakaJehova banyathelisa ipheshana eliphendula imibuzo enjengalena: Bangobani oFakazi BakaJehova? Ingabe bangamaKristu? Ingabe bayakwamukela ukwelashwa? Kungani behamba indlu ngendlu? Umsebenzi wabo usekelwa kanjani ngokwezimali? OFakazi BakaJehova bawuzuzisa kanjani umphakathi?
Leli pheshana elifundisayo elalingolimi lwesiFulentshi lalinesihloko esithi Jehovah’s Witnesses—What You Need to Know. Ukuze lishiywe kubantu abaningi ngangokunokwenzeka, kwahlelwa umkhankaso. Kusukela ngo-May 13 kuya ku-June 9, 1996, kwasakazwa amakhophi angaphezu kwezigidi ezingu-9.
Leli pheshana labahlaba umxhwele abaningi, kuhlanganise nezisebenzi zikahulumeni. “Ukugxeka okubhekiswe koFakazi BakaJehova kungenza ngigcwale intukuthelo,” kubhala ilungu lomkhandlu wesifunda ngemva kokufunda leli pheshana. “Izikhathi eziningi ngiye ngawazisa umsebenzi wenu obonisa isihawu nokungabi nabugovu.” Lisabela kulokho okukuleli pheshana, ilungu le-European Parliament labhala: “Iningi labantu likwazi kahle ukubona umehluko phakathi kweqembu lamaKristu eniyingxenye yalo namahlelo.”
EBrittany uFakazi wanika umpristi leli pheshana, owalamukela ngaphandle kokunqikaza. “Ngiyanincoma ngalokho enikwenzayo,” kusho lompristi. Wabe esenezela: “Ngikhuthaza amalungu esonto lami ukuba anamukele emakhaya awo anenzele nenkomishi yekhofi. Ngisho nalabo enihlangana nabo ningabatshela ukuthi benikwami. Ngifisa nokunitshela ukuthi ngiyakuthanda ukufunda izincwadi zenu.”
Ngemva kokuthola leli pheshana, indoda engumProthestani e-Alsace yabhalela i-Watch Tower Society icela isifundo seBhayibheli. “Njengoba ngingasalithembi nhlobo isonto lami,” ibhala, “ngibheke phambili esiqalweni esisha esingokomoya.” Naphezu kokumangalelwa kwabo ngamanga ngezinye izikhathi, oFakazi BakaJehova eFrance—yebo, kuzo zonke izingxenye zomhlaba—bayaqhubeka besiza abantu ukuba bafinyelele ulwazi olunembile lwezinjongo zikaNkulunkulu, njengoba zivezwe eBhayibhelini.—2 Thimothewu 3:16, 17.