Abamemezeli BoMbuso Bayabika
‘Bakhanya Njengezinkanyiso Ezweni’
OFAKAZI BAKAJEHOVA bahlukile futhi ngokuvamile bayajivazwa emphakathini ngenxa yokungamukeli kwabo ukumpontshelwa igazi. Nokho, lokhu kuma kusekelwe ngokuqinile eBhayibhelini. Libonisa ukuthi uNkulunkulu uyakulahla ukusetshenziswa kabi kwegazi, njengoba igazi liyigugu emehlweni akhe. (Genesise 9:3, 4; Levitikusi 17:14) Ngenxa yokuhlola imiBhalo ngokuphathelene nalendaba, oFakazi BakaJehova baphetha ngokuthi kuyacaca ukuthi isiqondiso seBhayibheli sokuba ‘badede egazini’ sihlanganisa nendlela yesimanje yokumpompela igazi.—IzEnzo 15:19, 20, 28, 29.
Eminyakeni yamuva amalungu omgwamanda wezokwelapha, kanye nezinkantolo zakwamanye amazwe, aye asekela oFakazi BakaJehova kulendaba. Ngokwesibonelo, eDenmark umama osemusha owayejwayelene nombono weBhayibheli ngegazi washona ngenxa yengozi yemoto. Ngenxa yokwenqaba kwakhe ukwamukela ukumpontshelwa igazi, odokotela bakhe bagqugquzela umkhankaso wenzondo wokumelana noFakazi BakaJehova ngemithombo yezindaba owathatha inyanga.
Abazali balona wesifazane osemusha bacela ukuba kwenziwe uphenyo, futhi ngo-April 1994 i-Denmark’s Commission of Patients’ Complaints yakhipha isinqumo. Yathi lesi siguli asishonanga ngenxa yokuthi senqaba igazi, kodwa ngenxa yobudedengu babezokwelapha. Lesi sinqumo sasisekelwe ophenyweni olwenziwa i-Board of Forensic Medicine neziphathimandla zezempilo. Encwadini eyathunyelwa kuzo zonke izikhungo zezempilo eDenmark, i-National Board of Health yathi odokotela banesibopho sokunikeza oFakazi BakaJehova ukwelashwa okuhlukile okungcono kakhulu okutholakalayo, becabangela ukwenqaba kwabo ukwamukela igazi.
Esinye isenzakalo sasihilela uDan, uFakazi oneminyaka engu-15 ubudala owabulawa i-leukemia. Kulokhu odokotela basihlonipha isinqumo sikaDan sesibindi sokwenqaba ukumpontshelwa igazi. Lokhu kwabangela umkhankaso omkhulu wabamaphephandaba okwakugxekwa kuwo odokotela ngokufa kukaDan. Nokho, abaningi abazange bavumelane nalenkulumo-ze engeyinhle.
Ngokwesibonelo, uthisha-nhloko wesikole uDan ayefunda kuso wayekhona eHholo LoMbuso eze emngcwabeni. Wazwakalisa ukushaqeka ngenxa yombiko ongemuhle wabezindaba ngokufa kukaDan. Ngemva kokubuza asebenza naye onguFakazi imibuzo eminingana emayelana noFakazi BakaJehova, wamukela ikhophi ye-video ethi Jehovah’s Witnesses—The Organization Behind the Name. Le-video yamhlaba umxhwele kangangokuthi wahlela ukuba bonke othisha esikoleni bayibukele. Kamuva, le-video yaboniswa bonke abafundi, ikilasi elilodwa ngesikhathi.
Nongqongqoshe wezempilo waseDenmark akavumelananga nokujivazwa kodokotela bakaDan emphakathini. Wathi odokotela babenze into efanele ngokuhlonipha kwabo isinqumo sikaDan sokuvuthwa nokholo lwakhe olunesisekelo esihle.
Kunezigidi zabamemezeli boMbuso abalalela imithetho kaNkulunkulu. Ngenxa yokulalela kwabo, bahlukile, ‘bakhanya njengezinkanyiso ezweni.’—Filipi 2:12, 15.