Bakwenza Ngenxa Yothando
UMFELOKAZI okholekile, onomoya wokungenisa izihambi waseCanada wayekhulisa amadodakazi amancane amane njengamaKristu eqiniso. Abadala ebandleni baqaphela ukuthi umuzi wakhe wawudinga ukulungiswa okukhulu. Wayengenayo imali futhi engenalo nekhono lokuzenzela lomsebenzi. Ngakho ngokuvumelana nesimiso esivezwe kweyoku-1 Thimothewu 5:9, 10, ngokuqonda abadala bahlela ukuba enzelwe lomsebenzi. Kanjani?
Kwahlelwa ukuba lomfelokazi nezingane zakhe bangabi bikho izinsuku ezinhlanu. Abangaphezu kuka-80 ebandleni basekela ngezinhliziyo zabo zonke, benikela ngezinto zokusebenza, izimali, nesikhathi. Emizuzwini embalwa ngemva kokuhamba kwalomkhaya, izisebenzi ezishisekayo zatheleka njengezinyosi kulomuzi. Lonke ingaphandle lendlu lavuselelwa. Izindonga zalungiswa futhi zapendwa. Phansi kwahlikihlwa futhi kwapendwa kabusha. Kwafakwa ama-tile aphansi nokhaphethi omusha. Zonke izinto zikagesi nezokukhanyisa ezidingekile ezazifakiwe zathuthukiswa. Ngisho nefenisha eyase igugile yashintshwa. Konke kwavuselelwa ngokuphelele ngezinsuku ezinhlanu kuphela!
Umoya wenjabulo nokusebenza wenza lokhu kwaba undab’ uzekwayo emphakathini. Umakhelwane oneminyaka engu-80 ubudala washukunyiswa kakhulu imizamo yalaboFakazi kangangokuthi weza nebhulashi lakhe likapende futhi waphikelela ngokuthi ufuna ukusiza. Umqashi wesinye sezisebenzi zokuzithandela wanikela ngento yokudonsa iphunga yesitofu sasekhishini. Omunye umqashi wanikela ngamakhabethe amasha asekhishini. Enye indoda yahlabeka umxhwele kangangokuthi yafuna ukuthola okwengeziwe ngoFakazi BakaJehova. Yayamukela imagange incwadi ethi Ungaphila Phakade EPharadesi Emhlabeni.
Lapho lomfelokazi namadodakazi akhe bebuya kwakubhalwe ukumangala ebusweni babo. Kwagcwala izinyembezi, uhleko, nokwangana—inkathi yothando nomzwelo wobuKristu engenakulibaleka. Ngempela, uthando nokukhathalela kwangempela ngamalungu ebandla aswele kuwuphawu lobuKristu beqiniso, ngoba uPawulu wabhala: “Khona-ke ngempela, uma nje sinesikhathi esihle sakho, masisebenzeni okuhle kubo bonke, kodwa ikakhulukazi kulabo abahlobene nathi okholweni.”—Galathiya 6:10.