Abamemezeli BoMbuso Bayabika
“Baqhubeka Ngaphandle Kokuyekethisa”
KUSUKELA ezinsukwini zikaJesu Kristu nabaphostoli bakhe, abaholi benkolo baye basebenzisa noma iziphi izindlela ezitholakalayo emizamweni yabo yokuvimbela ukushunyayelwa kwezindaba ezinhle zoMbuso kaNkulunkulu. Abaphostoli ‘bayalwa’ ngokucacile nangokuphindaphindiwe iziphathimandla zendawo eJerusalema ukuba “bayeke ukukhuluma ngesisekelo segama likaJesu.” (IzEnzo 5:27, 28, 40) Noma kunjalo, ukulandisa kweBhayibheli kuthi “izwi likaNkulunkulu laqhubeka likhula, isibalo sabafundi saqhubeka siphindaphindeka kakhulu eJerusalema.”—IzEnzo 6:7.
Ezinkulungwaneni ezimbili zeminyaka kamuva sisathola abaholi benkolo kwa-Israel abathonya iziphathimandla zendawo ukuba ziphazamise umsebenzi wamaKristu eqiniso kulelozwe. Zingaphansi kokucindezela okushoshozelwa amalungu ashisekela inkolo ngokweqile, ngo-November 1987, iziphathimandla zendawo eTel Aviv, kwa-Israel, zayala oFakazi ukuba bayeke ukuba nemihlangano yobuKristu eHholo LoMbuso elisehhovisi legatsha le-Watch Tower Society. Lomyalo waqala ukusebenza ngo-October 1989. Belalela, oFakazi babehlangana ezindaweni eziqashiswayo kulendawo iminyaka emithathu kuyilapho iHholo LoMbuso labo lihleli lingasetshenziswa cishe ngokuphelele.
Phakathi naleso sikhathi, lendaba yalethwa ekunakekeleni kweNkantolo Ephakeme Yobulungisa yakwa-Israel. Ihhovisi labameli balelizwe labukeza ubufakazi obalethwa oFakazi futhi lathi isikhalo sabo sasingenakwenqatshwa ngenxa yokuthi kwakuhileleke ubandlululo olubi kakhulu olungokwenkolo. Ngakho, iziphathimandla zendawo zaphoqeleka ukuba zihoxise isinqumo sazo, futhi oFakazi BakaJehova baphindela ngenjabulo eHholo LoMbuso labo.
Ingabe umsebenzi wokushumayela amaqiniso eBhayibheli wakhinyabezeka phakathi naleyo minyaka? Lutho neze! Ngesikhathi sokuvalwa kweHholo LoMbuso, kwakunamabandla amabili eTel Aviv neqembu elizimele lesifundo seBhayibheli edolobheni eliseduze laseLod. Eminyakeni emithathu kamuva, lapho leli Hholo LoMbuso liphinde livulwa, oFakazi BakaJehova base bande baba amabandla amane, futhi iqembu elisha lesifundo seBhayibheli lalihlanganyela eBeersheba.
Ukwanda kwa-Israel akulinganiselwe emaqenjini ezilimi eziyinhloko kuphela, isi-Arabhu nesiHeberu. Kuye kwaba nokuthutheleka okukhulu kwabafuduki abavela ezweni elaliyiSoviet Union, ngakho oFakazi BakaJehova abakhuluma isiRussia manje bamatasa bahlanganyela nabo izindaba ezinhle. Eminye imihlangano yolimi lwesiRussia iyaqhutshwa emabandleni amathathu; abantu abangaphezu kwekhulu basanda kuhlangana emhlanganweni owawuqhutshwa ngesiRussia.
Ngokungangabazeki, abashisekeli benkolo abanobandlululo bayoqhubeka nomkhankaso wabo ngokumelene nokukhulekela kweqiniso. Kodwa abamemezeli boMbuso bayaqhubeka belingisa amaKristu ekhulu lokuqala okwathi, naphezu kokuphikiswa, ‘aqhubeka ngaphandle kokuyekethisa efundisa futhi ememezela izindaba ezinhle ngoKristu, uJesu.’—IzEnzo 5:42.