Zincane Kodwa Zinamandla

UROBERT, insizwa yaseCanada, wazulazula kulo lonke elaseYurophu efuna injongo ekuphileni. Wabona izinto eziningi ezamshiya ezizwa engenathemba ngokuphathelene nesikhathi esizayo.

Esahlezi esitolo sokudlela eSeville, eSpain, uRobert wanikwa ipheshana elinyatheliswa oFakazi BakaJehova. Ekuqaleni, uRobert waba nokungabaza. “Nokho, ngalifunda,” esho. “Anginakukuchaza, kodwa ngokushesha ngezwa okuthile okwakuzwakala kunengqondo. Phakathi nohambo lwami, ngangiboné izinhlobo eziningi zokucindezeleka nokuwa komuntu, futhi ngangikhungathekile ngokungakwazi kwami ukushintsha izinto. Ngemva kokufunda lelipheshana, ngazibuza, ‘Ingabe “lelizwe elisha” kungenzeka libe khona?’ Khona-ke, ngacabanga, ‘Yebo, mhlawumbe kungenzeka.’”

Enethemba elivuselelwe, uRobert wabhalela ihhovisi loFakazi BakaJehova eliseCanada, ecela ukuba othile amvakashele lapho ebuyela ekhaya futhi amsize ukuba aqonde iBhayibheli.

Ngokungangabazeki, izwi lomlomo linamandla. Nokho, ungawathathi kalula amandla esigijimi esilotshiwe. Kungakhathaliseki ukuthi zincane kangakanani, izincwadi ezisekelwe eBhayibhelini zivusa isithakazelo ngokunamandla. Zithinta ingqondo nenhliziyo, zinikeza ithemba eliqinisekile lesikhathi esizayo.—Heberu 4:12.