Ukufuna Amagugu Afihliweyo

NGONYAKA ka-1848 igolide latholakala esizeni sakwaSutter sendlu yoMshini wokusaha amapulangwe eCalifornia, e-U.S.A. Ngo-1849 izinkulungwane zazithutheleka kulendawo zinethemba lokuthi zizoceba ngokushesha, ngaleyondlela kwakuwukuqala kokuthuthekela ezizeni ezintsha zegolide okukhulu kunakho konke emlandweni wase-United States. Esikhathini esingangonyaka, isikhumulo semikhumbi esiseduze, iSan Francisco, sakhula sisuka ekubeni idolobhana saba idolobha elikhulu labantu abangu-25 000. Ithemba lokunotha ngokushesha labonakala liheha kakhulu.

Inkosi yakwa-Israyeli wasendulo uSolomoni yayiyazi indlela abantu abawamba ngayo ngokuzikhandla amagugu afihliweyo, futhi yabhekisela kukho lapho ibhala: “Yebo, uma ukhala ngengqondo, uzwakalisa izwi lakho ngokuqonda, uma ukufuna njengesiliva, ukuphenya njengamagugu afihliweyo, khona uyakuqonda ukumesaba uJehova, ufumane ukumazi uNkulunkulu.”—IzAga 2:3-5.

Ungenza izinto eziningi ngegolide nangesiliva, kodwa ungenza okuningi kakhulu ngokuqonda nangokuhlakanipha. Lokhu kungakusiza ukuba wenze izinqumo eziqondile, uxazulule izinkinga, uphumelele emshadweni, futhi uthole injabulo. (IzAga 2:11, 12) Ngokufanayo, ulwazi lweqiniso nokuhlakanipha kungakusiza ukuba wazi uMdali wakho, uqonde izinjongo zakhe, umlalele futhi umjabulise. Igolide ngeke likunikeze nokukodwa kwalezizinto.

Lamazwi eBhayibheli ayiqiniso: “Ukuhlakanipha kungumthunzi njengoba nemali ingumthunzi, kodwa inzuzo yokuhlakanipha yile: ukuhlakanipha kulondoloza ukuphila kwalowo onakho.” (UmShumayeli 7:12, New International Version) Nakuba abaningi becabanga ngokuceba ngokushesha, yeka ukuthi kuwukuhlakanipha kangakanani ukuvula iBhayibheli bese umba ukuhlakanipha, nokuqonda, nolwazi, lokho okuyingcebo yeqiniso.