Ingabe Unjengomunye Walezi?

‘KUNGCONO ukuba ibhubesi usuku olulodwa kunokuba yiwundlu iminyaka eyikhulu.’ Lawomazwi kuthiwa ashiwo uBenito Mussolini, owayengumashiqela waseItaly.

NjengoMussolini abantu abaningi bangakwenqaba ukuchazwa njengabangamawundlu nezimvu. Nokho, inkosi yakwaIsrayeli ewumhubi yasendulo uDavide yathi: “UJehova ungumalusi wami. . . . Uyangiyisa ngasemanzini okuphumula.” (IHubo 23:1, 2) Yebo, uJehova uNkulunkulu unguMalusi Omkhulu, onikeza abantu bakhe ukunakekela kothando njengokungathi bayizimvu ezingenangozi.

Abantu bakaNkulunkulu kukhulunywa ngabo njengabayizimvu ezingokomfanekiso kumaHubo 95:7, lapho sifunda khona ukuthi: “Ngokuba [uJehova] unguNkulunkulu wethu, thina singabantu bedlelo lakhe nezimvu zesandla sakhe.” Kungenzeka ukuthi abanye babelindele ukuba umhubi akhulume “ngezimvu zedlelo lakhe” “nabantu besandla sakhe.” Kodwa lapha izinto ziphanjanisiwe, futhi ngaleyondlela abantu bakaJehova ngokwabo baphawulwa njengabayizimvu zakhe. Bajabulela izinzuzo zedlelo likaNkulunkulu futhi baholwa yisandla sakhe sothando.

INdodana kaJehova, uJesu Kristu, inguMalusi Omuhle. Yayivamé ukubiza abantu ngezimvu. Ngokwesibonelo, uJesu wakhuluma ‘ngomhlambi omncane’ ‘nangezinye izimvu.’ (Luka 12:32; Johane 10:14-16) Ngokuphathelene nabafundi bakhe abathobeke njengezimvu, uJesu wathi: “Izimvu zami ziyalizwa izwi lami; nami ngiyazazi, ziyangilandela; ngizinika ukuphila okuphakade, azisoze zabhubha naphakade; akakho ongazihlwitha esandleni sami.” (Johane 10:27, 28) Esandleni sombusi onomusa, izikhonzi zakhe ziyazuza emandleni, emuseni, esiqondisweni, nasesivikelweni sakhe.—IsAmbulo 1:16, 20; 2:1.

Akekho ongahlwitha abantu abanjengezimvu ngempela esandleni sikaJesu esiyisivikelo. Namuhla, uhlukanisa abantu ‘abanjengezimbuzi’ abantula umusa wakhe noma ‘abanjengezimvu’ abayojabulela ukuphila phakade ngaphansi kokubusa koMbuso kaNkulunkulu wasezulwini. (Mathewu 25:31-46) Ingabe uyozibonakalisa ungomunye walezozimvu ezibusisiwe?

[Umthombo Wesithombe ekhasini 32]

Garo Nalbandian