Ingabe Uyakhumbula?
Ingabe uye wakujabulela ukufunda omagazini bamuva beNqabayokulinda? Uma kunjalo, ngokungangabazeki uyokuthola kuthakazelisa ukukhumbula lokhu okulandelayo:
▫ Yibuphi ubufakazi obugculisayo obanikezwa yizindlela ezihlukahlukene umoya ongcwele owawusebenza ngazo ekhulwini lokuqala leminyaka?
Lezindlela owawusebenza ngazo zanikeza ubufakazi obubonakalayo bokuthi uNkulunkulu wayengasasebenzisi ibandla lamaIsrayeli elase lineminyaka engu-1 500 likhona njengabantu bakhe abakhethekile, kodwa manje wayemukela ibandla elisha lobuKristu, elamiswa yiNdodana yakhe ezelwe yodwa. (Qhathanisa namaHeberu 2:2-4.)—8/15, ikhasi 5.
▫ Yini ebangela ukwanda okuphawulekayo okubonwa oFakazi BakaJehova?
Ngokuyinhloko, lokhu kungenxa yesibusiso sikaNkulunkulu. Lona umsebenzi kaNkulunkulu. Lokho oFakazi BakaJehova abakufundisayo emsebenzini wabo wokushumayela kusekelwe eBhayibhelini. Esinye isihluthulelo sempumelelo yabo ukuqaphela kwabo ngokugcwele uKristu Jesu njengeNhloko emisiwe yebandla lobuKristu.—9/1, ikhasi 19.
▫ Kungani uJehova ambonisa umusa uDavide ngokuphathelene nesono sakhe esikhulu noBati-sheba?
Lokhu ngokuyinhloko kwakungenxa yesivumelwano soMbuso uNkulunkulu ayesenze noDavide, kodwa futhi kwakungenxa yomusa kaDavide ngokwakhe nokuphenduka kwakhe okuqotho. (1 Samuweli 24:4-7; 2 Samuweli 7:12; 12:13; IHubo 51:1, 2, 17)—9/15, amakhasi 10, 11.
▫ Yiziphi izinhlobo ezintathu zobufakazi imiBhalo YamaKristu YesiGreki ebunikezayo ekusekeleni ukuba kukaJesu uMesiya?
Uhlu lozalo lukaJesu luwubufakazi bokuqala. (Mathewu 1:1-16; Luka 3:23-38) Obunye ubufakazi isiprofetho esigcwalisekile. Kuneziprofetho eziningi, njengaleso esitholakala kuDaniyeli 9:25, eziphawula uJesu njengoMesiya. Uhlobo lwesithathu lobufakazi ubufakazi bukaNkulunkulu ngokwakhe; lobufakazi wabunikeza ngeZwi lakhe siqu ezenzakalweni ezintathu. (Mathewu 17:5; Luka 3:21, 22; Johane 12:28)—10/1, amakhasi 10, 12.
▫ Njengoba kulotshwe kuMathewu 24:37, uJesu wayesho ukuthini lapho ethi: “Ngokuba njengasemihleni kaNowa, kuyakuba-njalo ukufika kweNdodana yomuntu”?
UNowa wayakha umkhumbi futhi exwayisa abantu ababi amashumi amaningi eminyaka ngaphambi kokuba uZamcolo ufike futhi uqothule lesosimiso sezwe esonakele. Ngendlela efanayo, ukuba khona kukaKristu okungabonakali kuthatha inkathi engamashumi athile eminyaka, okuthi phakathi nayo kunikezwe ubufakazi ngaphambi kokuba nayo ifinyelele ekubhujisweni okukhulu.—10/1, ikhasi 16.
▫ Yiziphi ezinye zezinto ezibalulekile ukuze isifundo seBhayibheli somkhaya sibe esizuzisayo?
Kudingeka kuthengisiswe isikhathi sesifundo. Akufanele sisivumele ukuba sicinaniswe yiTV noma ezinye izinto. Kumelwe kucatshangelwe izidingo ezikhethekile zomkhaya. Sebenzisa imibuzo efuna imibono ukuze uqiniseke ukuthi izingane ziyakuqonda lokho ezikufundayo. (Mathewu 17:25) Gcina isimo singesokukhululeka. Yiba nentshiseko, futhi uhilele wonke umuntu esifundweni.—10/15, ikhasi 17.
▫ AmaKristu kufanele akhathazeke kangakanani ngokuthi izakhi zegazi kungenzeka ziye zafakwa emikhiqizweni yokudla?
AmaKristu kufanele aqaphele ukuba angaphazanyiswa yinto acabanga ukuthi ingenzeka noma inzwabethi, futhi ukulinganisela kuyadingeka ngisho nasekuhloleni amalebula noma ekubuzeni ngezilaha. Nokho, uma kwaziwa ukuthi igazi liyasetshenziswa kabanzi endaweni—kungakhathaliseki ukuthi ekudleni noma kwezokwelapha—amaKristu kufanele aqaphele ukuba alalele umyalo kaNkulunkulu wokuyeka igazi. (IzEnzo 15:28, 29)—10/15, amakhasi 30-1.
▫ Incwadi yezAga ikuqokomisa kanjani ukujula okungokomoya kwezindlela zokufundisa ezazisetshenziswa kwaIsrayeli?
Incwadi yezAga ibonisa ukuthi injongo yayo kwakuwukufundisa “abangenalwazi” izinto eziphakeme ezinjengokuhlakanipha, ukuyala, ukuqonda, ukwahlulela, ulwazi, namasu—konke ‘ekumesabeni uJehova.’ (IzAga 1:1-7; 2:1-14)—11/1, ikhasi 12.
▫ Yimuphi umbono olinganiselayo ngemfundo intsha okufanele ibe nawo namuhla?
AmaKristu kufanele abheke imfundo njengendlela yokufinyelela umphumela ofiselekayo. Injongo yawo kulezinsuku zokugcina iwukukhonza uJehova kakhulu nangokuphumelela ngangokunokwenzeka enkonzweni yesikhathi esigcwele uma engase akwazi.—11/1, ikhasi 18.
▫ Kungani uJehova ayefuna ukuba isizwe sakwaIsrayeli sikhokhe okweshumi?
Okokuqala, ukuze babonakalise ngendlela ephathekayo ukwazisa kwabo ngobuhle bukaJehova. Okwesibili, ukuze babe nengxenye ekusekeleni amaLevi, okwakuzowenza akwazi ukugxilisa ukunakekela kwawo ezibophweni zawo, kuhlanganise nokufundisa uMthetho. (Bheka ezesi-2 IziKronike 17:7-9.)—12/1, ikhasi 9.
▫ Yikuphi okweshumi amaKristu amenywa ukuba akulethe? (Malaki 3:10)
Okweshumi kumelela ingxenye yalokho okungokwethu esikuletha kuJehova noma esikusebenzisa enkonzweni yakhe. Lokhu kuyindlela yokubonakalisa uthando lwethu ngaye nokuqaphela kwethu ukuthi singabakhe.—12/1, ikhasi 15.