Sidinga Othile Ongalalela
NJENGABANTU, sizama ukuthola injabulo nokwaneliseka ekuphileni. Kodwa lapho kuphakama izinkinga zomuntu siqu, yeka indlela okuwusizo nokududuza ngayo ukuba nothile esingakhuluma naye ngezinkinga zethu!
UDkt. George S. Stevenson uthi: “Ukuxoxa ngezinto kuyasiza ekunciphiseni ukucindezeleka kwakho, kukusiza ukuba ukubone kangconywana lokho okukukhathazayo, ngokuvamile kuyakusiza ukuba ubone lokho ongakwenza ngakho.” UDkt. Rose Hilferding waphawula: “Sonke siyakudinga ukuxoxa ngezinkinga zethu. Siyakudinga ukuxoxa ngokusikhathazayo. Kumelwe sibe nomuzwa wokuthi kunothile emhlabeni ozimisele ukulalela futhi okwaziyo ukuqonda.”
Yiqiniso, akekho umuntu ongasigcwalisa ngokuphelele lesidingo. Ngenxa yokuba ngabalinganiselwe esikhathini nakwezinye izici, abantu esithembele kubo bangase bangatholakali lapho sibadinga kakhulu, noma singase sinqikaze ukuxoxa ngezindaba ezithile ngisho nabangane bethu abaseduze kakhulu.
Nokho, amaKristu eqiniso ngeke angabi naye ngokuphelele umuntu ongalalela, ngoba umzila womthandazo uhlala uvulekile. IBhayibheli lisikhuthaza ngokuphindaphindiwe ukuba sithandaze kuNkulunkulu, uMdali wethu, ogama lakhe linguJehova. Siyalwa ukuba sithandaze ngobuqotho, ngegama likaJesu, nangokuvumelana nentando kaNkulunkulu. Ngisho nezindaba zomuntu siqu nezangasese ziyizinto ezifanelekile ezingase zithandazelwe. “Kukho konke izicelo zenu mazaziwe nguNkulunkulu,” sitshelwa lokho kwabaseFilipi 4:6. Yeka isipho esimangalisayo! UMbusi oyiNkosi wendawo yethu yonke uhlala ekulungele ukwamukela imithandazo yezinceku zakhe ezithobekile noma nini lapho zifisa ukuza kuye.—IHubo 83:18; Mathewu 6:9-15; Johane 14:13, 14; 1 Johane 5:14.
Nokho, ingabe uNkulunkulu uyalalela ngempela? Abanye bangase bacabange ukuthi amandla omthandazo axhomeke ekhonweni lomuntu: Umuntu uyathandaza, ehlela imicabango yakhe bese eyibeka ngamazwi. Eseyichaze kanjalo inkinga yakhe, ufuna ikhambi elifanelekayo futhi uqaphela konke okungaba nengxenye ekulitholeni. Lapho inkinga yakhe isixazululekile, angase abonge uNkulunkulu, kodwa empeleni yingqondo yakhe siqu nemizamo okubangele imiphumela abeyifisa.
Abaningi namuhla bacabanga ukuthi umthandazo usho lokho kuphela. Ingabe ucabanga kanjalo? Ingabe amandla omthandazo alinganiselwe kangako? Kuyavunywa, imizamo yomuntu engokwengqondo kanye nehilela izenzo ezivumelana nemithandazo yakhe inendima ebalulekile ekutholeni izimpendulo. Nokho, kuthiwani ngendima kaNkulunkulu siqu kulendaba? Ingabe uNkulunkulu uyalalela lapho uthandaza kuye? Ingabe ubheka imithandazo yakho njengebalulekile, ecabangela lokho ekuqukethe futhi asabele kuyo?
Izimpendulo zalemibuzo zibalulekile. Uma uNkulunkulu engayinaki imithandazo yethu, khona-ke umthandazo awufezi lutho ngaphandle kokwanelisa isidingo sengqondo. Ngakolunye uhlangothi, uma uNkulunkulu ewamukela futhi elalela ngamunye wemithandazo yethu futhi enesithakazelo kuwo, yeka indlela okufanele sibonge ngayo ngelungiselelo elinjalo! Kufanele kusishukumisele ukuba silisebenzise nsuku zonke lelolungiselelo.
Khona-ke, sikumema ukuba uqhubeke ufunda, njengoba lamaphuzu kukhulunywa ngawo esihlokweni esilandelayo.