Wathola Ipheshana Emzileni Wesitimela

KWAKUNGUNYAKA ka-1921. Ezinkangala zaseNtilasifali, eyisifundazwe saseNingizimu Afrika, iqembu lamadoda alungisa umzila wesitimela lalisebenza engxenyeni ethile yomzila kaloliwe. Umphathi wezisebenzi, iBhunu eligama lalo lalinguChristiaan Venter, wabona isiqeshana sephepha sibambeke ngaphansi kukajantshi. Kwakuyipheshana elalikhishwe yiWatch Tower Bible and Tract Society.

Ngemva kokuyala amadoda akhe ukuba ame, uChristiaan wafunda lelipheshana ngesithakazelo esijulile. Wagijima ehlangabeza umkhwenyana wakwakhe, uAbraham Celliers, futhi wamemeza ngenjabulo: “Abraham, namuhla ngilitholile iqiniso!”

Ngokushesha ngemva kwalokho, babhalela abanyathelisi bepheshana ukuze bathole ukwaziswa okwengeziwe. Ekuphenduleni, igatsha laseNingizimu Afrika leWatch Tower Society lathumela izincwadi zeBhayibheli ezengeziwe. Lamadoda amabili azifunda ndawonye phakathi nekhefu lawo lokudla kwasemini kanye nasebusuku impela. Ngokushesha aqala ukuhlanganyela iqiniso nabangane kanye nabantu angabazi.

Ekugcineni, bobabili uChristiaan noAbraham baba oFakazi BakaJehova abazinikezele. Ngenxa yentshiseko yabo nokwethembeka, abantu abaningi baseNingizimu Afrika basizwa ukuba bafinyelele olwazini lweqiniso. Ngaphezu kwalokho, abazukulu babo abangaphezu kwekhulu bangoFakazi abakhuthele BakaJehova namuhla! Omunye wabo ukhonza endlunkulu yomhlaba wonke yoFakazi BakaJehova eBrooklyn, eNew York, kanti omunye ukhonza emahhovisi eWatch Tower Society eNingizimu Afrika.

Namuhla, cishe eminyakeni engu-70 kamuva, amapheshana eBhayibheli asaqhubeka efeza ingxenye ebalulekile ekusakazeni isigijimi soMbuso.