Ingabe Uyakhumbula?

Ingabe uye wabacabangela ngokunakekela omagazini bamuva beNqabayokulinda? Uma kunjalo, ngokunokwenzeka uzokwazi ukukhumbula lokhu okulandelayo:

◻ Ingabe amanye amaKristu agcotshiwe ayosinda “osizini olukhulu” futhi aphile emhlabeni isikhathi esithile ngaphambi kokuba athathwe ayiswe ezulwini?—IsAmbulo 7:14.

IBhayibheli alicacisi kulokhu. Okunye ukulandisa kweBhayibheli kubonakala kusikisela ukuthi abagcotshiwe bangase baqhubeke bephila baze bangene ezweni elisha. Nokho, izigidi zalabo abanethemba lokuphila phakade emhlabeni ziye zathola ukuqeqeshwa okudingekayo ukuze ziqalise izwe elisha. Ngakho, insali encane ngeke idingeke ukuze yenze lomsebenzi, futhi uNkulunkulu angase akhethe ukuyiyisa ezulwini ngenxa ‘yomshado weWundlu’ ngemva kokubhujiswa kwesifebe esingokwenkolo, “iBabiloni Elikhulu.” (IsAmbulo 18:2, 10; 19:2, 7, 8)—8/15, ikhasi 31.

◻ Kungaziphi izisusa indoda okumelwe ifisele ngazo ukuba umbonisi ongumKristu? (1 Thimothewu 3:1)

Indoda kumelwe ilwele ukufanelekela isikhundla sombonisi, yenza lokho ngokuzithoba ngenxa yokuthi ifuna ukukhonza abanye. Lapho ishukunyiswa ngaleyondlela yizisusa ezinhle, lesinyathelo sayo singaphumela ezibusisweni ezingokomoya kubo bonke abahilelekile.—9/1, ikhasi 18.

◻ Kungani umphostoli uPawulu engazange adumale naphezu kwakho konke lokho okwakumelwe akukhuthazelele?

UPawulu uyachaza: “Nginamandla ukwenza konke ngaye ongiqinisayo.” (Filipi 4:13) UPawulu akazange azame ukuzithwalela umthwalo wakhe eyedwa. Kunalokho, wabheka kuJehova ukuba amsekele. (IHubo 55:22)—9/1, ikhasi 30.

◻ Isho ukuthini inkulumo kaPawulu kweyabase-Efesu 4:26 ethi: “Thukuthelani ningoni”?

Lamazwi ayakuvuma ukuthi umuntu angase acasuke ngokufanelekile, kodwa uma lokhu kwenzeka, umuntu akufanele ahlale ‘esimweni sokuthukuthela kuze kushone ilanga.’ (Efesu 4:26) Ngani? Ngoba lokhu kuyonikeza uDeveli ithuba lokuba asizakale ngalowomuntu, mhlawumbe amyengele ekubeni enze okuthile okubi, ukuze angemukelwa uNkulunkulu. (IHubo 37:8, 9)—9/15, ikhasi 21.

◻ Imuphi umehluko omkhulu okhona phakathi kwendlela oFakazi BakaJehova abafundisa ngayo nendlela yabefundisi beLobukholwa?

OFakazi BakaJehova bafundisa ngegunya leZwi likaNkulunkulu, kanti abefundisi beLobukholwa basekela imfundiso yabo esikweni lobuqaba elingokwenkolo elalisuka eBabiloni naseGibithe.—10/1, ikhasi 25.

◻ INdodana kaNkulunkulu yeza emhlabeni ngenxa yasiphi isizathu esibaluleke kakhulu?

UJesu weza emhlabeni ngokuyinhloko ngenjongo yokuxazulula impikiswano eyaphakanyiswa uSathane ngokuphathelene nobukhosi bukaJehova.—10/15, ikhasi 13.

◻ Ngokubiza amagunya ezwe ngokuthi “aphakeme,” ingabe ngandlela-thile siyaphambuka enhloniphweni efanele uJehova? (Roma 13:1, NW)

Cha, njengoba uJehova engaphezu kakhulu kokuba nje “ophakeme.” ‘UyiNkosi enguMbusi,’ “oBedlula Bonke.” (IHubo 73:28, NW; Daniyeli 7:18, 22, NW) Amagunya ezwe aphakeme nje ngokuphathelene nabanye abantu kanye nasezikhundleni zawo zomsebenzi. Anomthwalo wemfanelo wokubusa nokuvikela imiphakathi.—11/1, ikhasi 12.

◻ Kungani uthando luyisithelo somoya kaNkulunkulu esikhulu kunazo zonke kweziyisishiyagalolunye okukhulunywe ngazo kweyabaseGalathiya 5:22, 23?

Ezinye izithelo zomoya kaNkulunkulu eziyisishiyagalombili, ziwukubonakaliswa, noma izici ezihlukahlukene zothando, leso okuqalwe ngaso. Zonke lezi ezinye izithelo zomoya ziyizimfanelo ezidingekayo, kodwa ngeke zisizuzise uma sintula uthando. (1 Korinte 13:3)—11/15, ikhasi 14.

◻ Ziyini izinzuzo zokuthandazela esikholwa kanye nabo?

Uma senza inhlala-kahle yabanye engokomoya ibe ukukhathalela kwethu emthandazweni, sisondela ngokwengeziwe kubo ngothando lobuzalwane. Futhi siba nozwela ngabo, sihlanganyela ezithakazelweni zabo nasosizini lwabo. Ngakho, noma yiluphi usizi luyaphela, luvulele indawo imicabango eyakhayo esenza sibe nothando futhi sijabule.—11/15, amakhasi 21-2.

◻ Yiziphi izizathu ezishukumisayo zokuba sikhulekele uJehova uNkulunkulu?

Kumelwe sikhulekele uJehova ngoba unguMdali futhi izimfanelo zakhe zisisondeza kuye. (Duteronomi 32:3, 4; 1 Johane 4:8; IsAmbulo 10:6) IBhayibheli lithi: “Ukumesaba uNkulunkulu kusiza ezintweni zonke, kunesithembiso salokhukuphila nalokho okuzayo.” (1 Thimothewu 4:8) Akekho unkulunkulu ngaphandle kukaJehova ongathembisa isiphetho esinjalo abese egcwalisa isithembiso sakhe.—12/1, amakhasi 6-7.