Ukuphila NeNkonzo KaJesu
Bayahluleka Ukuhila UJesu Ngamazwi
UJESU ubefundisa ethempelini futhi usanda kutshela izitha zakhe zenkolo imifanekiso emithathu edalula ububi bazo. AbaFarisi bayathukuthela futhi benza icebo lokumhila ukuba asho okuthile abangambophisa ngakho. Baceba icebo bese bethuma abafundi babo, nabalandeli beqembu likaHerode, ukuba bazame ukumhila ngamazwi.
Lamadoda athi: “Mfundisi, siyazi ukuthi uqinisile, ufundisa indlela kaNkulunkulu ngeqiniso; awukhathali ngamuntu, ngokuba awubheki ubuso babantu. Ngakho sitshele, uthini wena? Kuvunyelwe ukuthela kuKesari noma qha?”
UJesu akaluthwa yilokho kuthopha. Uyaqaphela ukuthi uma ethi, ‘Cha, akuvunyelwe noma akulungile ukukhokha lentela,’ uzoba necala lokuvukela umbuso waseRoma. Kodwa, uma ethi, ‘Yebo, kufanele niyikhokhe lentela,’ amaJuda akuzondayo ukubuswa kwawo amaRoma, azomzonda. Ngakho uphendula ngokuthi: “Bazenzisi, ningilingelani na? Ngitshengiseni imali yokuthela.”
Lapho beletha imali kuye, uyabuza: “Ngokabani lomfanekiso nalombhalo na?”
“NgokaKesari,” bephendula.
“Ngakho-ke nikani uKesari okukaKesari noNkulunkulu okukaNkulunkulu.”
Nokho, lapho lamadoda ezwa lempendulo yobungcweti, ayamangala. Ayahamba ahlukana naye.
Bebona ukwehluleka kwabaFarisi ukuthola okuthile abangammangalela ngakho uJesu, abaSadusi, abathi alukho uvuko lwabafile, beza kuye bese beyabuza: “Mfundisi, uMose wathi: Uma umuntu efa engenabantwana, umfowabo kamngene umkakhe, amvusele umfowabo inzalo. Kwakukhona-ke kithi izelamani eziyisikhombisa: owokuqala waganwa, wafa; engenanzalo washiya umkakhe kumfowabo. Kanjalo nowesibili nowesithathu, kwaze kwaba-kowesikhombisa. Emva kwabo bonke wafa umfazi. Pho, ekuvukeni kwabafileyo uyakuba-ngumkabani kwabayisikhombisa, lokhu bonke babenaye, na?”
Ephendula uJesu uthi: “Angithi nidukile ngenxa yokuba ningayazi imibhalo namandla kaNkulunkulu na? Ngokuba mhla bevuka kwabafileyo abaganwa, abendiswa, kodwa banjengezingelosi ezulwini. Kepha maqondana nabafileyo ukuthi bayavuswa anifundanga yini encwadini kaMose ngesihlahla ukuthi uNkulunkulu wakhuluma kuye, wathi: NginguNkulunkulu ka-Abrahama, noNkulunkulu kaIsaka, noNkulunkulu kaJakobe, na? Akasiye uNkulunkulu wabafileyo kodwa owabaphilayo. Nidukile kakhulu.”
Izixuku zimangele futhi ngenxa yempendulo kaJesu. Ngisho nabanye bababhali bayavuma: “Mfundisi, ukhulumé kahle.”
Lapho abaFarisi bebona ukuthi uJesu ubavale imilomo abaSadusi, beza kuye beyiqembu. Ukuze bamlinge ngokwengeziwe, omunye wabo uyabuza: “Mfundisi, ngumuphi umyalo omkhulu emthethweni na?”
UJesu uyaphendula: “Owokuqala ngowokuthi: Yizwa, Israyeli: iNkosi uNkulunkulu wethu, iNkosi, yinye. Woyithanda iNkosi, uNkulunkulu wakho ngayo yonke inhliziyo yakho, nangawo wonke umphefumulo wakho, nangayo yonke ingqondo yakho, nangawo onke amandla akho. Owesibili yiló: Womthanda umakhelwane wakho njengalokhu uzithanda wena. Awukho omunye umyalo omkhulu kunalé.” Eqinisweni, uJesu uyanezela: “Kuleyomiyalo emibili kubambelela umthetho wonke nabaprofethi.”
Omunye umbhali uyavuma: “Yebo, Mfundisi, ushilo ngeqiniso ukuthi yinye, ayikho enye ngaphandle kwayo; futhi ukuyithanda yona ngenhliziyo yonke, nangengqondo yonke, nangamandla onke, nokuthanda umakhelwane njengalokhu umuntu ezithanda yena kudlula yonke iminikelo yokushiswa nemihlatshelo.”
Ebona ukuthi lombhali uphendulé ngokuhlakanipha, uJesu uyamtshela: “Awukude nombuso kaNkulunkulu.”
Izinsuku ezintathu manje—iSonto, uMsombuluko, noLwesibili—uJesu ubefundisa ethempelini. Abantu bebemlalele ngenjabulo, kodwa abaholi benkolo abakhungathekile bafuna ukumbulala. Mathewu 22:15-40; Marku 12:13-34; Luka 20:20-40.
◆ Iliphi icebo abaFarisi abalicebayo ukuze bahile uJesu ngamazwi, futhi kwakungenzekani uma ayengase aphendule ngokuthi yebo noma cha?
◆ UJesu naye uyibhuntshisa kanjani imizamo yabaSadusi yokumhila?
◆ Imuphi omunye umzamo abaFarisi abawenzayo ukuze balinge uJesu, futhi uba yini umphumela?
◆ Phakathi nenkonzo yakhe yokugcina eJerusalema, uJesu ufundisa izinsuku ezingaki ethempelini, futhi kuba namuphi umphumela?