Abamemezeli BoMbuso Bayabika

‘Bayavutha Emoyeni’ EMexico

“IZWE lonke libonakala lishiseka futhi liphithizela.” Libhala kanjalo ihhovisi legatsha leWatch Tower Society laseMexico, futhi yeka ukuthi lawomazwi ayiqiniso kangakanani! Ukuphithizela kulelozwe kufakazelwa ukuthi kusukela ngoAugust, kube namanani aphakeme angama-70 alandelanayo abamemezeli anyanga zonke afinyelela inani eliphakeme kunawo wonke labamemezeli abangu-277 436. Ngaphezu kwalokho, kwabikwa izifundo zeBhayibheli ezingaphezu kwezi-400 000, futhi ababa khona eSikhumbuzweni ngonyaka odlule bafinyelela ku-1 046 291. Yeka isisekelo esihle sokwanda kwesikhathi esizayo!

Ingqopha-mlando yango-1989 kuye kwaba ushintsho esimweni sokuqashelwa soFakazi BakaJehova eMexico. Ngenxa yalokho, iBhayibheli selingasetshenziswa emsebenzini wokushumayela wendlu ngendlu okokuqala ngqá, futhi imihlangano isingavulwa ngomthandazo. Lokhu kuye kwaba nomphumela osheshayo. Ngezinyanga ezimbili, inani labamemezeli landa ngabamemezeli abangaphezu kwezi-17 000.

Injabulo yabazalwane ngalentuthuko ibonakala emazwini abo. Omunye wabhala: “Lapho incwadi ifundwa ebandleni, yaphazanyiswa kabili yihlombe elalishaywa ngokuzenzakalelayo. Kwakuhlaba umxhwele!” Omunye wathi: “Sasingenakuzibamba izinyembezi zenjabulo. Imiphumela ibonakaliswa ukufika ngesikhathi okuye kwathuthuka. Wonke umuntu ufuna ukuba khona emthandazweni wokuvula.”

Omunye uFakazi wathi: “Ensimini yethu, owesifazane othile omatasa esimisweni sokufundwa kweBhayibheli seSonto lamaKatolika wathi: ‘Uma ngaphambili ngamazwi abo nje nangomagazini, [oFakazi] babesishiya sinkemile, manje njengoba sebelivula iBhayibheli ezindlini, seziyime emthumeni!’”

OFakazi BakaJehova eMexico futhi bagcizelela ukufakaza ngokwethukela ngeBhayibheli. Omunye udade wahlangana nowesifazane owambuza ukuthi uyini umbono wakhe ngokukhipha isisu. UFakazi waphendula: “Lokho engikucabangayo akubalulekile ukudlula lokho iBhayibheli elikushoyo.” Ngemva kokufunda imiBhalo embalwa, udade wathi: “Ukuphila kubaluleke kakhulu kuMdali, ngisho nokuphila kwalabo abangakazalwa.”

Lentokazi yasho ukuthi yayikhulelwe ingane yayo yokuqala, kodwa ukuhlolwa kwezokwelapha kusikisela ukuthi ingane izokhubazeka. Udokotela wayo wayefuna ukuba isikhiphe isisu, futhi nomnyeni wayo wavuma, kodwa lentokazi ngokwayo yayingaqiniseki. Ummemezeli wakhuluma nayo kabanzi ngeBhayibheli, wayinika igama lakhe, base behlukana.

Eminyakeni emihlanu kamuva emhlanganweni wesigodi, umbhangqwana othile onengane eneminyaka emine wawufuna ukubona lodade nomyeni wakhe. Kwakuyileyankosikazi! Kwakwenzekeni? Ngemva kwengxoxo yayo noFakazi, yanquma ukuba iyibelethe ingane yayo. Udokotela wayo wenqaba ukuphinde ayibone, nomyeni wayo wayisongela ngisho nangokuthi wayezoyishiya uma ingabeletha ingane ekhubazekile. Lapho kufika isikhathi sokuba ibelethe, yaya kudokotela eyamthola kuqala ukuze ithole usizo.

Ngokushesha ngemva kokuba ingane isizelwe, udokotela wathi: “Siyakubongela mame! Unentombazanyana enhle ethandekayo.” Engakukholelwa ayekuzwa, wamcela ukuba ayihlole ngokucophelela ingane yakhe. Wabe esemlandisa indaba yakhe. Okuwukuphela kwento udokotela ayengayisho kwakuwukuthi: “Yisimanga lesi.” Lona wesifazane wajabula ngokuthi waba nesibindi sokuhlonipha umbono kaNkulunkulu ngobungcwele bokuphila, futhi wetha ingane yakhe enhle, enempilo ngalowodade. Ngokushesha ngemva kokuba esenamandla ngokwanele, wafuna oFakazi BakaJehova futhi waqala ukufunda nabo iBhayibheli. Esikhathini esingaphansi konyaka, yena nomyeni wakhe babhapathizwa.

Umphostoli uPawulu wanxusa: “Nivuthe emoyeni, nikhonze iNkosi.” (Roma 12:11) OFakazi BakaJehova eMexico, njengamaKristu eqiniso kuyo yonke indawo, basabela kulokhu kunxusa ngenhliziyo yabo yonke. Yingakho izwe lonke lishiseka futhi liphithizela emsebenzini ongokomoya. Yeka indlela uJehova ababusisa ngokucebe ngayo abathembekileyo bakhe!