IPharadesi Elingokomoya
EZINCWADINI eziningi zeBhayibheli zesiprofetho, kunezithembiso zaphezulu ngokuphathelene nokubuyiselwa kukaIsrayeli esuka emazweni ayedingiselwe kuwo eya ezweni lakubo elenziwe incithakalo. UNkulunkulu wayeyobangela ukuba lelozwe elishiyiwe lilinywe futhi litshalwe, likhiqize ngokucebile, futhi ligcwaliswe ngesintu nangezilwane, imizi yayiyokwakhiwa kabusha futhi ihlalwe, nabantu babeyothi: “Lelizwe ekade laliyize selinjengensimu yase-Edene.” (Hezekeli 36:6-11, 29, 30, 33-35; qhathanisa noIsaya 51:3; Jeremiya 31:10-12; Hezekeli 34:25-27.) Nokho, leziprofetho zibonisa futhi ukuthi izimo zepharadesi zazibhekisela kubantu ngokwabo, labo, ngokwethembeka kuNkulunkulu manje ‘ababezoqhakaza’ futhi bande ‘njengezihlahla zokulunga,’ bejabulela ukuchuma okuhle okungokomoya “njengensimu eniselweyo,” abagelezelwa izibusiso eziningi ezivela kuJehova ngenxa yokuba nomusa wakhe. (Isaya 58:11; 61:3, 11; Jeremiya 31:12; 32:41; qhathanisa namaHubo 1:3; 72:3, 6-8, 16; 85:10-13; Isaya 44:3, 4.) Abantu bakwaIsrayeli babeyisivini sikaNkulunkulu, okutshaliweyo kwakhe, kodwa ububi babo nokuhlubuka ekukhulekeleni kweqiniso kwakubangele ‘ukubuna’ okungokomfanekiso kwensimu yabo engokomoya, ngisho nangaphambi kokuba ukwenziwa incithakalo kwezwe labo okungokoqobo kwenzeke.—Qhathanisa noEksodusi 15:17; Isaya 5:1-8; Jeremiya 2:21.
Ngokungangabazeki lokhu kunikeza isihluthulelo sokuqonda incazelo kaPawulu yombono (ngokusobala ayebe nawo, njengoba wakha ingxenye yokuvikela kwakhe ubuphostoli bakhe siqu) okubhekiselwe kuwo kweyesi-2 Korinte 12:1-7. Ehlwithwé wayiswa “kwelesithathu izulu,” umboni wombono wangena “epharadesi” wezwa amazwi angakhulumekiyo. Ukuthi lelipharadesi elabonwa embonweni lingabhekisela esimweni esingokomoya phakathi kwabantu bakaNkulunkulu, njengasendabeni kaIsrayeli ongokwenyama, kungabonakala eqinisweni lokuthi ibandla lobuKristu ngokufanayo ‘laliyinsimu kaNkulunkulu,’ isivini sakhe esingokomoya, ligxiliswe kuKristu Jesu futhi lithela izithelo zokudumisa uNkulunkulu. (1 Korinte 3:9; Johane 15:1-8) Njengelinjalo, lalithathele isizwe sakwaIsrayeli indawo emseni kaNkulunkulu. (Qhathanisa noMathewu 21:33-43.) Nokho, ngokunengqondo umbono kaPawulu kumelwe ukuba wawubhekisela esikhathini esithile esizayo, ukuze wenze ‘isambulo.’ (2 Korinte 12:1) Ukuhlubuka kwase kuzoqala phakathi kwebandla lobuKristu futhi kakade kwase kwenzeka osukwini lukaPawulu; kwakuyophumela esimweni esifana naleso sensimu ehlwanyelwe ngokhula. (Mathewu 13:24-30, 36-43; IzEnzo 20:29; 2 Thesalonika 2:3, 7; qhathanisa namaHeberu 6:7, 8.) Ngakho umbono kaPawulu wepharadesi ngokunengqondo awusebenzi nakuba kwakunjalo kodwa ngokusobala ubhekisela esikhathini ‘senkathi yokuvuna’ lapho amaKristu oqobo ehlanganiselwa ndawonye abavuni abayizingelosi futhi ejabulela izibusiso ezicebile nokuchuma okungokomoya okuvela kuNkulunkulu.
Nokho, kusobala ukuthi iziprofetho zokubuyiselwa ezalotshwa abaprofethi bamaHeberu zihlanganisa izici eziyogcwaliseka ngokwenyama ePharadesi lasemhlabeni elibuyiselwe. Ngokwesibonelo, kuIsaya 35:1-7 kunezici, njengokuphulukiswa kwezimpumputhe nezinyonga, ezingagcwalisekanga ngokoqobo ngemva kokubuyiselwa bevela eBabiloni lasendulo, futhi kanjalo azigcwaliseki epharadesi elingokomoya lobuKristu. Kuyoba okungafanelekile ngoNkulunkulu ukuphefumlela iziprofetho ezinjalo njengalezo ezikuIsaya 11:6-9, Hezekeli 34:25, nakuHoseya 2:18, enenhloso yokuba zibe nencazelo engokomfanekiso noma engokomoya kuphela, ngaphandle kokuba kube nokugcwaliseka okungokoqobo kwalezizinto kokuhlangenwe nakho okungokomzimba kwezinceku zikaNkulunkulu.