Imibuzo Evela Kubafundi
◼ Ingabe uJehova usebenzisa ubuqili noma ukukhohlisa kubantu, kuhlanganise nezinceku zakhe, njengoba uJeremiya 4:10 no-20:7 ebonakala esikisela lokho?
Cha, uMdali akakhohlisi, noma aphambe ezindleleni zakhe. Nokho, angayifeza futhi uyayifeza intando yakhe yokulunga naphezu kwalokho abantu abangase bakulindele.
Sibona esinye isici salokhu kuJeremiya 4:10, lapho lomprofethi athi khona: “Awu, Nkosi Jehova, ubakhohlisile nokubakhohlisa lababantu neJerusalema ngokuthi: Niyakuba-nokuthula; nokho inkemba ifinyelele emphefumulweni.”
UJehova wasebenzisa uJeremiya ukuba abikezele inhlekelele ezayo esizweni esihlubukayo okwakulindeleke ukuba simkhulekele. (Jeremiya 1:10, 15-19; 4:5-8; 5:20-30) Nokho, kwakukhona abanye ababethi bangabaprofethi. (Jeremiya 4:9) Yini abantu abayizwa kubaprofethi abanjalo bokuzisholo? UNkulunkulu wakuchaza ngalendlela: “Abaprofethi baprofetha amanga, . . . abantu bami bayakuthanda kanjalo.”—Jeremiya 5:31; 20:6.
Nakuba uJehova engazange abathume labobaprofethi bamanga, akazange futhi abavimbele ekusakazeni izigijimi, njengezithi, “Niyakuba-nokuthula” nesithi, “Aniyikwehlelwa ngokubi.” (Jeremiya 23:16, 17, 25-28, 32) Abantu kwakudingeka bakhethe—bamukele iziprofetho eziyiqiniso ezazinikezwa uJeremiya noma bazivumele badukiswe abaprofethi bamanga, abaprofethi bokuzibeka, njengoHananiya noShemaya. (Jeremiya 28:1-4, 11; 29:30-32) Ngenxa yokuthi uNkulunkulu akabavimbelanga labaprofethi abadukisayo, kungase kuthiwe ngaye: “Ubakhohlisile nokubakhohlisa lababantu neJerusalema ngokuthi: Niyakuba-nokuthula.”
Ngomqondo ohlukile, uJeremiya wakhohliswa. “Ungikhohlisile, O Jehova, ngakhohliseka. Usebenzise amandla akho kimi, wanqoba. Ngaba yinhlekisa usuku lonke; bonke abantu bangenza inhlekisa.”—Jeremiya 20:7, NW.
UPhashuri, umpristi ovelele, wahlasela uJeremiya obala wayesemfaka esitokisini. Ngokombono wabantu, uJeremiya kungenzeka ukuthi wazizwa esefinyelele ekugcineni, ukuthi wayengenawo nje amandla okuqhubeka ebhekene nokungabi naluzwela, ukunganakwa, ukwenziwa inhlekisa, nokushaywa ngobudlova. Kodwa kwakungenjalo. UJehova wasebenzisa amandla aKhe ngokumelene (noma ngokuphambene) nokuthambekela kobuntu kukaJeremiya. UNkulunkulu wakhohlisa uJeremiya ngokuthi wasebenzisa lomuntu ongaphelele ukuba afeze lokho umprofethi ayengenakukwenza ngamandla akhe siqu. Njengoba uJeremiya ayekhohlisiwe noma emangele ngalokho, kwaba nomphumela omuhle: Labo abamshushisayo bahlaziswa, futhi isigijimi sikaNkulunkulu sanikezwa.—Jeremiya 20:11.
Khona-ke, uma eqondakala ngokomongo wakhe, uJeremiya 4:10 no-20:7 uvumelana nesiphetho sikaElihu esithi: “Impela uNkulunkulu akenzi okubi; uSomandla kahlanekezeli ukwahlulela.”—Jobe 34:12.