Ikilasi Lama-84 LaseGileyadi—Lenza Njengoba Kwakulindelwe!
IZAGA 10:28 zithi: “Ithemba labalungileyo liyakuba-yintokozo.” Kwakunjalo ekuseni ngoMarch 6, 1988. Kwakusobala kunoma isiphi isibukeli ukuthi amathemba ayemakhulu kakhulu phakathi kwabayizi-4 360 ababehlangene eHholo LoMhlangano LoFakazi BakaJehova eDolobheni laseJersey.
Iqiniso lokuthi cishe wonke umkhaya waseBethel yaseBrooklyn nowaseWatchtower Farms wakwazi ukuba ndawonye endaweni enhle kangaka lona ngokwalo laliyisizathu senjabulo enkulu nokwesasa! Nokho, ababekhona babefike benethemba lokungaphezu kokuhlangana okukhulu komkhaya. Okwakuphambili ezingqondweni zabo kwakuyilokho ababazi ukuthi kwakuzoba isenzakalo esiqopha umlando: ukuthweswa iziqu kwekilasi lama-84 leWatchtower Bible School of Gilead.
Njengoba manje isendlunkulu yomhlaba wonke yoFakazi BakaJehova eBrooklyn, eNew York, iGileyadi yamiswa ngo-1943 ukuze kuqhutshekiselwe phambili umsebenzi oyalwe uNkulunkulu ‘wokwenza abafundi.’ (Mathewu 28:19, 20) Ngemva kokuphothula imfundo yezinyanga eziyisihlanu yokufunda ngeBhayibheli, abathweswe iziqu baseGileyadi bathunyelwa, hhayi emsebenzini oholelayo, kodwa ensimini yomhlaba wonke njengezithunywa zevangeli. (Mathewu 13:38) Khona-ke, ngokuqondakalayo noma ubani oke waba nelungelo lokufunda eGileyadi unamathemba amakhulu.—Qhathanisa noLuka 12:48.
Isimiso sokuthweswa iziqu saveza lamathemba akhanya ngokunamandla. Saqala ngomthandazo wentshiseko owenziwa uGeorge Gangas, ilungu leNdikimba Ebusayo. UC. W. Barber, naye ongoweNdikimba Ebusayo, wakhonza njengosihlalo walolosuku. ‘Sihlanganyela emkhankasweni wokufundisa omkhulu kunayo yonke emlandweni,’ kusho uBarber. Ecaphuna kuIsaya isahluko 6, wachaza ukuthi ngokuvamile kumelwe sishumayele ngaphansi kwezimo ezingezinhle. Futhi njengasosukwini lukaIsaya, “ingxenye yeshumi” engokomfanekiso kuphela, noma ‘insali,’ engasabela esigijimini sethu. (Isaya 6:13; Roma 9:27) Nokho, masingalokothi sibe nomuzwa wokuthi imizamo yethu yokushumayela iyize!
Lokhu kuphawula okukhuthazayo kwavusa ukulangazelela kulokho okwakuzolandela: uchungechunge lwezinkulumo ezimfushane, kodwa ezinamandla, ezaziqondiswe kwabathweswa iziqu. UCalvin Chyke weKomiti yeFektri waqala ngokubuza umbuzo othi, ‘Ingabe niyobonakala niyisibusiso kwabanye?’ Babeye bamukela izibusiso eziningi eGileyadi. Manje kumelwe baphe izibusiso, bedlulisela kwabanye ‘izipho ezingokomoya.’ (Roma 1:11, 12) Ngisho nalapho kuphakama izimo ezivivinyayo, njengokungabi namali, izithunywa zevangeli kumelwe ziqhubeke ‘zipha’ ngokomoya. (Luka 6:38) Khona-ke amazwi eHubo 84:6, NW athi: “Umqeqeshi uzilethela izibusiso eziningi,” ayogcwaliseka kubo.
UDavid Olson weKomiti YoMnyango Wenkonzo ngokulandelayo wakhumbuza izithunywa zevangeli ngobuzalwane bethu bomhlaba wonke. Zaziye zajabulela uthando nokusekela kwabangane ezazifunda nabo izinyanga eziyisihlanu—manje zizithola zisakazwa kuyo yonke imbulunga. UOlson waziqinisekisa ukuthi zaziyojabulela ukugcwaliseka kukaMarku 10:29, 30, ozithembisa abangane ‘nemikhaya’ emisha.
UDaniel Sydlik weNdikimba Ebusayo wagcizelela isidingo sokuba abathweswa iziqu ‘Bahlakulele Amathemba Amakhulu Namahle.’ UJehova usidale sinekhono lokuba namathemba namaphupho. Khona-ke, akumelwe yini ukuba izithunywa zevangeli zibe namathemba amakhulu ngazo ngokwazo? ‘Zibekeleni umgomo, zikhandleni!’ kukhuthaza uSydlik. ‘Lwazini kahle ulimi lwezwe enabelwe kulo. Hambisanani nomagazini beNqabayokulinda nePhaphama! ngolimi lwenu ukuze nilondoloze ingokomoya lenu. Lapho nifundisa abanye,’ kuqhubeka uSydlik, ‘babekeleni nabo amathemba amakhulu. Benzeni bazi ukuthi kulindeleke ukuba baye emihlanganweni nokuba balungiselele izifundo kusengaphambili.’
Izikhulumi ezilandelayo zaqhubeka ngomqondo ofanayo. ULyman Swingle, naye ongoweNdikimba Ebusayo, wakhumbuza abafundi: ‘UJesu Kristu onithumayo. Futhi nguye ngokwakhe owathunywa ensimini engaphandle lapha emhlabeni.’ NjengoJesu, izithunywa zevangeli kumelwe zibheke isabelo sazo ngokungathi sína. Nokho, akumelwe zizicabangele kakhulu. ‘Yibani ngabakwaziyo ukuzihleka uma nenza okuthile okuwubuwula,’ kusho uSwingle. ‘UmShumayeli 3:4 usikhumbuza ukuthi kukhona “isikhathi sokuhleka.”’
Abafundisi ababili abakhulu besikole babe sebeba nelungelo lokunikeza abafundi babo iziyalezo zokugcina. Isihloko sikaJack Redford sasithi ‘Ningalokothi Nikhohlwe Ukuthunywa Kwenu!’ Abefundisi beLobukholwa baye balahlekelwa umbono wokuthunywa kwabo, abaningi bazihilela kwezombangazwe. Nokho, uJesu Kristu wafeza isabelo sakhe sokushumayela, engalokothi aphambukiswe okuvezwa izwe likaSathane. Ngakho-ke izithunywa zevangeli kumelwe zikhumbule njalo ukuthi kungani zithunyiwe—ukuze zisuthise ngokomoya isintu esilambayo. (Qhathanisa noMathewu 9:36.) Ngakho-ke kumelwe zigweme izingibe ezinjengokuthanda izinto ezibonakalayo nokuziphatha okubi. Ngokugxila esabelweni sazo sokushumayela, zinethemba lokujabulela okuhlangenwe nakho okuhle okuningi ensimini!
U-U. V. Glass walandela ngomfanekiso ohilela ingilazi yamanzi nomgexo wamaparele. Emazweni amaningi ukuhlanzeka kwengilazi yamanzi kuyangatshazwa. Ukuthi umgexo wenziwe ngamaparele oqobo yini kungangatshazwa ngokufanayo. ‘Kuthiwani ngokuthenjelwa kwenu?’ kubuza uGlass. ‘Ukungabi nokuthenjelwa kuye kwabizwa ngokuthi “umbhubhisi wobuhlobo ongumshoshaphansi.”’ Abathweswe iziqu bangakwakha kanjani ukuthenjelwa kwabo? ‘Khulumani iqiniso,’ kusho uGlass, ‘ningalihlobisi noma nilisonte. Ubuqotho buyisisekelo sokuthenjelwa.’—Efesu 4:25.
Okwakuvelele ekuseni kwakuyinkulumo yokuphetha eyayinikezwa umongameli weWatch Tower Society oneminyaka engu-94 ubudala, uF. W. Franz. Ngezwi elisaqinile futhi elingahoshozeli, uFranz wabukeza umlando weGileyadi. Phakathi nempi yezwe yesibili, iNdikimba Ebusayo yaqaphela ukuthi ‘IMpi Yezwe II yayingeke iholele kuyiArmagedoni. Yayiyophela futhi kulandele inkathi yokuthula.’ IGileyadi yamiselwa ukuba isebenzise lenkathi ephakathi nendawo ngokugcwele—futhi ibilokhu iba namandla kusukela yamiswa! ‘Siphila esikhathini esingcono kunazo zonke!’ kumemeza umongameli weNhlangano. Izilaleli zabonisa ukwazisa kwazo ngenxa yesikhuthazo ngalenceku kaJehova esinesikhathi eside ngokushaya ihlombe elikhulu!
Kwase kuvulwa amakhethini, kwavela abafundi abangu-24 bekilasi lama-84 laseGileyadi behlezi endaweni yesikhulumi. Nakuba benesilinganiso seminyaka engama-31,6 ubudala, ababona neze abashumayeli abasafufusa. Phela, banesilinganiso seminyaka eyi-11,3 beshumayela ivangeli isikhathi esigcwele! Futhi bayiqembu elivela ezizweni zonke, bedabuka eNetherlands, eAustralia, eFinland, eSweden, eJalimane, naseUnited States. Ngosizo luka-A. D. Schroeder, owayengomunye wabafundisi bokuqala baseGileyadi, uC. W. Barber wabanikeza amadiploma abo. Izilaleli zavuswa amadlingozi ukuzwa ukuthi abathweswe iziqu babeyothunyelwa emazweni ayisishiyagalolunye: ePhilippines, eSierra Leone, eNtshonalanga Samoa, eTaiwan, eTanzania, ePapua New Guinea, eBolivia, eGuam, naseColombia! Khona-ke omunye wabafundi wafunda incwadi enhle yokwazisa emelele ikilasi.
Ngemva kwekhefu elifushane lokudla kwasemini, izilaleli zabuye zahlangana ukuba zithole iSifundo SeNqabayokulinda esifushanisiwe, esasiqhutshwa uRobert Wallen weKomiti yaseBethel. Lapho sesiphelile isifundo, kwafiphazwa izibani. Usihlalo wesimiso wanxusa izilaleli: ‘Khululekani nijabulele isipho enisiphiwa abafundi, isimiso sabafundi bekilasi lama-84, esinesihloko esithi “Ukukhazimulisa Inkonzo Yethu.”’
Ngezingoma, okuhlangenwe nakho, nangemidlalo, abafundi base benikeza umbono wokuphila kokuba umfundi nokuba isithunywa sevangeli. Ngokwesibonelo, kwaboniswa indlela insimu yokushumayela ehlukile yaseDolobheni laseNew York esetshenziswa ngayo njengendawo yokuqeqeshela izithunywa zevangeli. Omunye umdlalo ohlekisayo, owawusekelwe kokuhlangenwe nakho okungokoqobo kwabafundi baseGileyadi, wabonisa indlela abafundi abafunda ngayo ukunikeza ubufakazi bokwethukela obuphumelelayo ezindledlaneni zabahamba ngezinyawo zasedolobheni. Okwabukiswa futhi ngendlela ehlekisayo, kodwa engokoqobo, kwakuyizenzakalo zezithunywa zevangeli zenza izinguquko ngokuvamile ezinzima empucukweni nasemikhubeni yakwamanye amazwe.
Esinye isithunywa sevangeli esathweswa iziqu sahlanganisa isimiso kahle ngamafuphi, sithi: ‘Iyiphi indlela engcono yokukhazimulisa inkonzo yethu kunokusiza abanye ukuba bancike ngokuphelele eZwini likaJehova?’ Akungabazeki ukuthi bonke ababekhona bashukunyiselwa ukuba bacabangele indlela abangahlanganyela ngayo kakhulu ngokwengeziwe ngokomuntu siqu emsebenzini wokushumayela. Ekuphetheni, abafundi babe sebedlala idrama yosuku lwanamuhla eyayigcizelela isidingo sokuba sizithobe kuNkulunkulu. Esinye isenzakalo esaqopha umlando sabe sesiphethwa ngomthandazo wokwazisa owenziwa uJ. E. Barr weNdikimba Ebusayo.
Ngokungangabazeki, isimiso sokuthweswa iziqu zaseGileyadi senzeka njengoba kwakulindelwe. Nokho, kuthiwani ngekilasi ngokwalo elathweswa iziqu? Siyaqiniseka ukuthi, njengabanduleli balo, leliqembu lamuva kunawo onke liyokwenza okungaphezu kokulindelekile, yebo, okufunwa uJehova kulo—ukuba likhazimulise inkonzo yalo ezabelweni zalo zakwamanye amazwe!
[Isithombe ekhasini 24]
Ikilasi Elathweswa Iziqu Lama-84 LeWatchtower Bible School of Gilead
Ohlwini olungezansi, izinombolo zezinhlu zisuka phambili ziya emuva kanti amagama ahlelwe kusuka ngakwesobunxele kuya ngakwesokudla ohlwini ngalunye.
(1) Norberg, C.; Holmes, T.; Holland, J.; Vehlen, B.; Rector, D.; Thomas, K. (2) Rajalehto, T.; Rajalehto, T.; Hoefnagels, J.; Moonen, A.; Summers, C.; Wahl, H. (3) Holland, J.; Holmes, F.; Hoefnagels, H.; Koivula, V.; Moonen, M.; Thomas, B. (4) Wahl, M.; Rector, W.; Summers, G.; Keighley, P.; Vehlen, P.; Norberg, O.