Enye Intuthuko Emfundweni YeBhayibheli
ULWESINE October 1, 1987, wawungenye intuthuko emfundweni yeBhayibheli njengoba inikezwa iNhlangano yoFakazi BakaJehova yomhlaba wonke. Waphawula ukuqaliswa kweSikole Sokuqeqeshela Inkonzo. Ikilasi lokuqala labazalwane abangashadile abangama-24 liye lafika lizothola ukuqeqeshwa okukhethekile eHholo Lomhlangano elikhulu lasePittsburgh eCoraopolis, ePennsylvania. Abaninikhaya abanezinhliziyo ezinhle abangoFakazi kuleyondawo babevule amakhaya abo ukuba bangenise labafundi ukuze bathole ukuqeqeshwa kwabo kwamasonto ayisishiyagalombili.
Abafundi babhaliswa ekuseni, bethola izincwadi zabo zokufunda kanye neziyalo zokuqalisa. Ngo–7:30 kusihlwa ngalolosuku, iHholo Lomhlangano laligcwele oFakazi abajabulayo abayi-1 518 beshisekela ukuhlanganyela ekuvulweni okungokomthetho kwalesikole esisha.
UAlbert Schroeder, oyilungu leNdikimba Ebusayo yoFakazi BakaJehova, wakhonza njengosihlalo. Ngemva kwengoma nomthandazo, wethula uRobert Dawson, umbonisi wedolobha lasePittsburgh. UMzalwan’ uDawson ngemfudumalo wemukela labobafundi abangama-24 ePittsburgh futhi watusa nabanini bamakhaya ayi-13 abaye babalungiselela ngokuzithandela izindawo zokulala. Wakhumbuza abaninikhaya ukuthi kwakuyoba yilungelo ngabo ukubonisa uthando olubekezelayo, olukholwayo, oluthembayo, nolukhuthazelela izinto zonke. (1 Korinte 13:7) Wakhumbuza abafundi ukuthi, njengezimenywa, kufanele babonakalise ukubonga, ukuthobeka, nokuba wusizo. Ngalendlela, kungaphumela ebuhlotsheni obungahlala kukho konke ukuphila.
Khona-ke abafundi bethulwa, ngamunye enikeza igama lakhe futhi esho ukuthi wayevelaphi nokuthi ubelokhu ekhonza njengani enkonzweni kaJehova. Abanye babevela ePuerto Rico, eArgentina, eCanada, naseHong Kong, abanye bevela engxenyeni engasempumalanga yeUnited States. Ngaphandle kwesiNgisi, abanye babo bakhuluma iSipanish, isiFulentshi, isiNtaliyane, noma isiShayina.
Ngokulandelayo usihlalo wethula uJames Hinderer njengomunye wabaqeqeshi. Amazwi akhe esekelwe kuMathewu 7:24, 25, uMzalwan’ uHinderer wagcizelela ukubaluleka kokufeza ukufundiswa kwabo ngokwenza izinto, nokwenza lokho abakufundile. Ngakho-ke, labobafundi babeyobe bakha “indlu” yabo phezu kwedwala kunokuba kube phezu kwesihlabathi esikhukhulekayo.
Ngokulandelayo uRandall Davis, omunye umqeqeshi, wakhuluma nabafundi. Amazwi akhe esekelwe kuIsaya 54:13, waphawula ukuthi babezofundiswa uJehova ukuze bakwazi ukudlulisela lemfundo kwabanye. Babezodinga ukuncika kakhulu “kumsizi” weqiniso, umoya ongcwele kaJehova uNkulunkulu.—Johane 14:26, NW.
Ngokulandelayo uAlbert Schroeder wakhuluma ngendlela lesosikhathi sakusihlwa esasimkhumbuza ngayo ngenye intuthuko emfundweni yeBhayibheli. Wayekhumbula uFebruary 1, 1943, lapho abafundi abayikhulu, abaqeqeshi abane (kuhlanganise naye), nezimenywa ezazivela eBrooklyn behlangene eNingizimu Lansing, eNew York, ukuzovula iSikole SeBhayibheli seWatchtower saseGileyadi. Eminyakeni engaphezu kwama-44 kusukela lapho, iSikole saseGileyadi siye saba nesibusiso sikaJehova, njengoba kubonwa ekusakazweni kwezithunywa zevangeli eziqeqeshwe ngeBhayibheli ezingaphezu kwezi-6 000 kuwo wonke umhlaba. UMzalwan’ uSchroeder wayesephawula izihloko ezihlukahlukene ezizofundiswa eSikoleni Sokuqeqeshela Inkonzo. Phakathi kwazo yiziMfundiso ZeBhayibheli, iNhlangano EngokwaseZulwini (egxilisa ukunakekela okukhulu emithwalweni yemfanelo yababonisi nezinceku ezikhonzayo), ukuPhatha kukaNkulunkulu, nokuKhuluma Eningini. Wadonsela futhi ukunakekela ezincwadini ezihlukahlukene, kuhlanganise Ukubonisana NgemiBhalo. Ekuphetheni uMzalwan’ uSchroeder waphawula ukugcwaliseka kukaIsaya 45:23, ethi abaphikisi abangokwenkolo babezoguqa ngamadolo kuNkulunkulu ngoba kwakumelwe bavume ukuthi oFakazi BakaJehova bayanemba ezifundweni zokwelapha, zomthetho, nezokubalwa kwezinsuku zezenzakalo zeBhayibheli.
Amazwi athi “Yibani-Ngabalingisi BakaPawulu” ayeyisihloko esasikhethwe isikhulumi esasilandela, uKarl Klein weNdikimba Ebusayo. Wabonisa indlela umphostoli uPawulu acela ngayo abanye ngokuphindaphindwe ukuba bamlingise. Wayengakwenza lokhu ngoba wayelingisa uKristu. (1 Korinte 11:1) Abafundi belulekwa ukuba balingise uPawulu elwazini lwakhe nasekusebenziseni imiBhalo ngekhono, ekushumayeleni kwakhe ngesibindi nangentshiseko, ekungabini nabugovu, esizotheni sakhe nokuzithoba, nasekubekezeleni kwakhe.
UTheodore Jaracz, naye oyilungu leNdikimba Ebusayo, wayesenikela inkulumo yokuqalisa, ethi “Isikole Esisha—Esayiphi Injongo?” Waqala ngokuphawula ukuthi labo abangenela lesisikole ngokuzithandela bavuma ukukhonza nomaphi lapho ababeyodingeka khona ensimini yomhlaba wonke. Njengoba kunoFakazi abangaphezu kwezigidi ezintathu nengxenye eyodwa kwezine emabandleni angaphezu kwezi-54 000, kunesidingo esikhulu samadoda afanelekayo ukuba eluse, afundise, futhi ahole emsebenzini omkhulu wokushumayela ivangeli. Esikhathini eside esidlule, uJehova wabikezela ukuthi wayeyolungiselela “izipho ezisesimweni sabantu.” (IHubo 68:18, NW) Wakwenza lokhu ezikhathini zabaphostoli, ngisho nanjengoba kwaboniswa umphostoli uPawulu kwabase-Efesu 4:8-11. Namuhla, uJehova ulungiselela futhi ‘izipho ezingabantu’ futhi uqeqesha ezinye zazo ngaso lesisikole esisha.
UMzalwan’ uJaracz waqhubeka ephawula ukuthi nakuba bonke abafundi benamakhono angokwemvelo, uKristu anganezela kuwo. Kodwa lokho kudinga umzamo, futhi isikhulumi sabonakalisa ukuba nethemba lokuthi labobafundi abangama-24 babezowenza lowomzamo. Saveza ukuthi akusoze kube khona ukuchezuka ezindinganisweni zikaJehova zokulunga futhi sathi labo abaholayo bangasiza ngesibonelo sabo siqu, nethonya. Ezingxenyeni eziningi zomhlaba, kunesidingo esikhulu samadoda afanelekayo ukwamukela imithwalo yemfanelo engokwenhlangano. Lesidingo sihlanganisa ngisho namabandla amakhulu okungenzeka anomdala oyedwa vo noma ababili nenani elilinganiselwe lezinceku ezikhonzayo. Ngakho kuyakhanya ukuthi kungani Isikole Sokuqeqeshela Inkonzo kwakudingeka simiswe—ukuze kuqeqeshwe abadala abangashadile nezinceku ezikhonzayo ukuba bakhonze nomaphi ensimini yomhlaba wonke. Ngenxa yokuqeqeshwa kwabo, bazohlonyiswa kangcono ukuba banakekele ukwanda njengabelusi.
Bonke oFakazi BakaJehova bangambonga uNkulunkulu ngenxa yokwenza Isikole Sokuqeqeshela Inkonzo sibe nokwenzeka. Ekuphetheni, uMzalwan’ uJaracz wathi: “Ngiyaqiniseka ukuthi sonke simunye ngemicabango nangemizwa kuNkulunkulu njengoba kubonakaliswe kuHubo 79:13: ‘Khona thina-bantu bakho, izimvu zedlelo lakho, siyakukubonga kuze kube-phakade, sishumayele udumo lwakho ezizukulwaneni ngezizukulwane.’” Khona-ke, ngengoma nomthandazo, sona kanye lesenzakalo esikhumbulekayo nesijabulisayo saphetha.