Ingabe Ikusasa Labagugile Lifiphele?
“KADE ngimusha,” kwasho, iNkosi uDavide. “Manje sengimdala.” (IHubo 37:25) Ezikhathini zeBhayibheli abagugile babeyidlanzana elaziswayo. Nokho, uma ukuthambekela kwamanje kuqhubeka, ngokushesha abagugile “bangase bangabe besaba idlanzana noma abaziswayo.
EUnited States kuphela, kunabantu abalinganiselwa ezigidini ezingama-26 abaneminyaka engaphezu kwengama-65 ubudala. Ngonyaka ka-2040 lesibalo siyocishe siphindeke kathathu! Ngokukamagazini iAsiaweek, ezinye izizwe zaseAsia “zilindele ukuba isibalo sabakhulile bazo siphindeke kabili eminyakeni eyishumi ezayo.” Nokho, umbono wokuthi inani lasebekhulile liyocishe lidlule elabasebasha awubikezeli neze okuhle ngasebekhulile. Kakade, inani elithusayo lizithola liswele futhi lingenamakhaya. Abanye bashiywa ukuba bagugele ezibhedlela noma emakhaya abagugile—bebodwa, bengavakashelwa futhi benganakekelwa. Izimo ezithusayo zokunganakwa nokuphathwa kabi zibikwa ngisho nasemazweni lapho abazali babehlonishwa khona ngokwesiko.
UG. M. Ssenkoloto wabhala kumagazini iWorld Health: “Ngokwesiko emazweni a.maningi aseAfrika, futhi yebo nasezindaweni eziningi zamazwe ampofu, umkhaya ngamunye wawubanakekela abesifazane bawo asebekhulile. Owesifazane owayengenabo abantwana bokumnakekela wayenakekelwa omakhelwane noma umphakathi uwonke.” Nokho, uyabika: “Imikhuba emihle yakudala iyashintsha. Izimo ezimbi ezingokomnotho, ukusetshenziswa kabi kwengcebo, isifiso sezinto ezibonakalayo, ukulwela ukuzazi nesikhundla—zonke lezinto zithatha isikhundla semikhuba emihle yesiko ngokuqondene nokusekelwa kwasebekhulile.”
Ngakho amazwi omlobi weBhayibheli uAguri abonakala eyiqiniso ngezinga elikhulu. “Kukhona isizukulwane esithuka uyise, esingabusisi unina.” (IzAga 30:11) Yebo, ase bekhulile bayasuswa esikhundleni sokuhlonipheka ababesijabulela ezikhathini ezidlule. Abaningi bababheka njengabayizikweletu zomphakathi kunanjengabawusizo. Ngokuvamile ikusasa labo lifiphele.
Nokho, amaKristu eqiniso ababheka kanjani asebegugile? Ingabe bayayigcina “imikhuba emihle yesiko” ngokuqondene nabo?