Incwajana Enokubukeka Okusha
UKWAZISWA okwandulela lesihloko kwanikezwa emhlabeni wonke emihlanganweni yesigodi yoFakazi BakaJehova “Yokuthula Kwaphezulu” ka-1986. Lapha sibuyekeza okunye uku khulumela okuthakazelisayo okwenziwa isikhulumi:
“Bheka, Ngenza Konke Kube Kusha.” Kwakuyisihloko sencwajana eyakhishwa yiWatch Tower Society emuva ngo-1959. Incwajana yaloluhlobo yayicelwe izithunywa zevangeli eJapane. Kwabonakala kunesidingo lapho sencwadi eyayingabeka isigijimi soMbuso ngendlela ekhanyayo, elula ngokwenzuzo yabantu abangajwayelene kahle neBhayibheli ngokwalo. Ngaphansi kokuqondiswa yiWatch Tower Society, izithunywa zevangeli ezingaphezu kwama-30 zahlanganyela ekuhlanganiseni lencwajana. Ingabe lencwajana entsha yasigcwalisa isidingo njengoba yaba ithuluzi eliyinhloko lokuqalisa izifundo ezintsha eJapane?
Imiphumela iyazikhulumela. Ngesikhathi sokukhululwa kwencwajana ethi “Bheka!,” kwakunenani eliphakeme labamemezeli boMbuso eliyi-1 390 eJapane. Namuhla, inani eliphakeme labamemezeli boMbuso liyizi-114 480. Cishe bonke laba baqaliselwa isifundo seBhayibheli ngencwajana ethi “Bheka!” Phakathi neminyaka engama-27 edlule, kuye kwasakazwa iziboniselo zalencwajana ezingaphezu kwezi-8 750 000 ngolimi lwaseJapane kuphela. Futhi eminyakeni engama-20 edlule, iJapane iye yabika inani eliphakeme labamemezeli boMbuso inyanga ngayinye ngaphandle kwezimbili. Nakuba kungenakungatshazwa ukuthi ezinye izimbangela ziye zanezela kulokhu kwanda okuhle, akungabazeki ukuthi ukusebenzisa incwajana ethi “Bheka” ekuqaliseni izifundo zeBhayibheli kuye kwaba isici esiyinhloko.
Manje lencwajana isibukeziwe, ngokwezidingo zamanje, futhi yakhululwa emihlanganweni ‘Yokuthula Kwaphezulu’ njengencwajana engangomagazi ni enamakhasi angama-32. Kunengxenye entsha eye yanezelwa esihlokweni esithi “Izinto Ezimbi—Kungani UNkulunkulu Ezivumela?” Ngokungaphezulu, izigaba zokuphetha ziye zalotshwa kabusha ukuze zinikeze umfundi isikhuthazo esifudumele sokuhlanganyela nenhlangano kaJehova. Manje lencwajana isibhalwe ngamagama agqamile, afundekayo kanye nemifanekiso eminingana efundisayo. Imibala yayo emine emisha emihle esesembozweni incishisiwe ekhasini elingaphakathi.
Ingabe lencwajana entsha ethi, “Bheka, Ngenza Konke Kube Kusha!,” izosetshenziswa kuphela empumalanga? Akungabazeki ukuthi iyophumelela kakhulu lapho. Nokho, kuthenjwa ukuthi incwajana ethi “Bheka” iyoba usizo futhi ekuqaliseni izifundo kuyo yonke insimu yezwe. Cishe sekudlule iminyaka engama-30 kusukela incwajana yokuqala yakhishwa. Ngalesosikhathi, ulwazi lweBhayibheli lwaluphansi, ngisho nasemazweni azisholo ukuba ngawamaKristu. Kunokuzwa abazali baso bekhuluma ngezindaba ezaziwa kahle ezivela eBhayibheli, isizukulwane esisha siye sakhula sinamehlo nezindlebe okugxiliswe kuthelevishini, sincela noma yini izwe eliyinikezayo. Lesi, kanye nezinye iziphazamiso zezwe elihlanyiswa injabulo, siye sadla amahora ayigugu angase asetshenziselwe ekuthuthukeni ngokomoya. Isizukulwane samanje, kungakhathaliseki ukuthi sikweLobukholwa noma sikuyiphi indawo, sazi okuncane kakhulu ngeZwi likaNkulunkulu. Sidinga ‘ubisi lwezwi,’ njengoba kubekwe ngokucacile encwajaneni ethi “Bheka.”—Heberu 5:12.
Emhlabeni wonke, kunabantu abanhliziyo zabo zithambekele ekulungeni futhi abayojabula ngokufunda indlela abangase bazihlanganise ngayo ‘nesixuku esikhulu’ esiyosinda eArmagedoni. (IsAmbulo 7:9, 14) Enkonzweni yethu yendlu ngendlu, singase sithole abaningi abahlatshwa umxhwele isembozo esinesithombe esihle sencwajana kanye nencazelo ekhangayo yePharadesi ezigabeni zokuqala. Lapho senza impindelo, singasebenzisa uhlu lwemibhalo ecashuniwe ekusekeleni lezozigaba ukuze sibonise ukuthi lelithemba alilona nje iphupho. Khona-ke, ngesifundo seBhayibheli esivamile, sisebenzisa incwajana ethi “Bheka,” singabasiza ukuba baqalise indlela eya ekuphileni. Kunjengoba uJesu asho emthandazweni oya kuYise: “ukuphila okuphakade yilokhu ukuba bazi wena-Nkulunkulu wedwa oqinisileyo, nomthumileyo, uJesu Kristu.”—Johane 17:3.
Kwangathi sonke singayisebenzisa ngentshise ko incwajana ethi “Bheka” ekukhanyiseni iqiniso loMbuso, “isixuku esikhulu” sihlanganyela nabaseleyo abagcotshiweyo bobupristi bobukhosi ‘ekwenzeni ukukhaya kwabo kukhanye phambi kwabantu.’ (Mathewu 5:16) Kwangathi igama elingenakulinganiswa leNkosi eNkulu uJehova lingangcweliswa ngokugcwele. Kwangathi kungabonakaliswa ngaso sonke isikhathi ukuthi izithembiso zikaJehova uNkulunkulu, uMdali wezulu nomhlaba ‘zithembekile futhi ziyiqiniso’ njalo. Nguye omemeza esesihlalweni sobukhosi ezulwini: “Bheka, ngenza konke kubekusha.”—IsAmbulo 21:5.
Incwajana ethi “Bheka, Ngenza Konke Kube Kusha” nezincwajana eziwumngane wayo Uhulumeni Oyoletha IPharadesi nethi IGama Laphezulu Eliyohlala Phakade ziyothunyelwa ekhelini lakho uma uzicela, lapho kwamukelwa umnikelo ka-R1,50. Siza u-ode ekhelini elifanelekile, njengoba lilotshwe ekhasini lesibili.