Ukuvuma KomJesuit

ABANINGI namuhla basakholelwa ukuthi uDecember 25 uwusuku olungcwele, usuku lokuzalwa kukaJesu. Nokho, iqiniso lokuthi ukubaluleka kwangempela okungokwenkolo kwalolusuku sekukade kwaziwa abaholi abangokwenkolo kuboniswa yingcaphuno elandelayo evela encwadini kaUrbanus Holzmeister, isazi esingumJesuit:

“Namuhla ngokuvamile kuyavunywa ukuthi umkhosi wokugujwa kosuku lukaDecember 25 kwakuwumkhosi owawugujwa amaqaba ngalolusuku. UPetavius [isazi somFulentshi esingumJesuit, ngo-1583-1652] kakade wayesephawule ngokuqondile ukuthi ngoDecember 25 kwakugujwa ‘usuku lokuzalwa kwelanga elingenakunqotshwa.’

“Ofakazi balomkhosi yilaba: (a) IKhalenda likaFurius Dionysius Filocalus, elenziwa ngonyaka ka-354 [C.E.], okuphawulwe kulo ukuthi: UDecember 25, uSuku lokuzalwa (kweLanga) elingenakunqotshwa.’ (b) ikhalenda lomfundi wezinkanyezi uAntiochus (elenziwa cishe ngo-200 [C.E.]) lithi: ‘Inyanga kaDecember . . . 25 . . . Usuku lokuzalwa kweLanga; imini iba yinde.’ (c) UCaesar Julian [Isihlubuki uJulian, umbusi waseRoma kusukela ngo-361-363 C.E.] watusa imidlalo eyayidlalwa ekupheleni konyaka ukuze kudunyiswe ilanga, elalibizwa ngokuthi ‘ilanga elingenakunqotshwa.’”—Chronologia vitae Christi (Umlando Wokuphila kukaKristu), Pontificium Institutum Biblicum, Rome, 1933, ikhasi 46.