Ukuphila NeNkonzo KaJesu

UJesu Uqeda Usizi Lomfelokazi

MASINYANE ngemva kokuba esephulukise inceku yenduna, uJesu uya eNayini, umuzi ongamakhilomitha angaphezu kwama-32 ukuya eningizimu-ntshonalanga yeKapernawume. Uhamba nabafundi bakhe nesixuku esikhulu. Cishe bafika emaphethelweni eNayini sekuntambama, lapho behlangana khona nomngcwabo. Isidumbu sensizwa sikhishelwa ngaphandle ukuyongcwatshwa.

Isimo sikanina singesidabukisa kakhulu, njengoba engumfelokazi futhi lona kuwukuphela komntanakhe. Lapho umyeni wakhe efa, wayengaduduzwa iqiniso lokuthi wayenendodana. Amathemba akhe, izifiso nemigomo kwakugxiliswe esikhathini sayo esizayo. Kodwa manje akusekho-muntu owayengamduduza. Usosizini olukhulu njengoba abantu bomuzi behamba naye beya emangcwabeni.

Lapho uJesu ebona lona wesifazane, inhliziyo yakhe ithintwa ukudabuka kwakhe okukhulu. Ngakho ngomusa, nangokuqina okunikeza isibindi, uthi kuye: “Ungakhali.” Isimo sakhe nesenzo kubamba ukunakekela kwesixuku. Ngakho lapho esondela futhi ethinta uhlaka okuthwelwe ngalo isidumbu, abaluthwele bayama. Kumelwe ukuba bonke bayazibuza ngalokho azokwenza.

Kuyiqiniso ukuthi labo abahamba noJesu baye bambona ephulukisa ngokuyisimangaliso abantu abaningi ezifweni. Kodwa ngokusobala abakaze bambone evusa noma ubani kwabafileyo. Ingabe wayengayenza into enjalo? Ekhuluma nesidumbu, uJesu uyayala: “Nsizwa, ngithi kuwe: Vuka!” Futhi insizwa iyavuka! Iqala ukukhuluma, futhi uJesu uyinikeza unina.

Lapho abantu bebona ukuthi ngempela insizwa iyaphila, baqala ukuthi: “Kuvele umprofethi omkhulu phakathi kwethu.” Abanye bathi: “UNkulunkulu ubahambele abantu bakhe.” Ngokushesha izindaba zalesenzo esimangalisayo zisakazeka kulo lonke elaseJudiya nakulo lonke elangakhona.

UJohane uMbhapathizi usalokhu esejele. Kodwa abafundi bakhe bambikela ngazo zonke lezinto ababona uJesu ezenza. UJohane usabela kanjani? Futhi kuyini ukusabela kwabanye abaningi abasezindaweni lapho uJesu enza khona izimangaliso zakhe? Umagazini wethu olandelayo uyophendula. Luka 7:11-18.

◆ Yini eyenzekayo njengoba uJesu esondela eNayini?

◆ UJesu uthinteka kanjani ngalokho akubonayo, futhi yini ayenzayo?

◆ Abantu basabela kanjani esimangalisweni sikaJesu?