Imibuzo Evela Kubafundi
◼ Kungani uDavide afaka ngamabomu uAhimeleki umpristi omkhulu engozini, okwaholela ekufeni kompristi, njengoba uDavide avuma kweyoku-1 Samuweli 22:22?
Eqinisweni, eyoku-1 Samuweli 22:22 ayibonisi ukuthi uDavide wazi kusengaphambili ukuthi inkambo yakhe yayiyoholela ekufeni kuka-Ahimeleki. Lelivesi lithi: “UDavide wathi kuAbiyathara [indodana ka-Ahimeleki]: Ngazi ngalolosuku mhla uDowegi wakwaEdomi elapho ukuthi [uDowegi] uyakumtshela nokumtshela uSawule; yimi engibangele ukuba bafe abantu bonke bendlu kayihlo [uAhimeleki].”
UDavide, ebalekela iNkosi ethukuthele uSawule, waya eNobi, lapho kwakukhona umpristi omkhulu uAhimeleki. Mhlawumbe ngenxa yokukhathazeka ngokuthi umpristi omkhulu wayengazizwa enesibopho sokuveza umkhondo kaDavide eNkosini, uDavide akazange asembule isizathu sangempela sokungabikho kwakhe eJerusalema. Nokho ukuba khona kwakhe eNobi kwaphawuleka. UmEdomi ogama lakhe linguDowegi wabona uDavide futhi kamuva wabikela uSawule othukuthele.
Nokho, akukho lutho kulendaba ekufakazela ukuthi uDavide wazi kusengaphambili ngokuba khona kukaDowegi. UDowegi “wayelapho ngalolosuku, ebambekile phambi kukaJehova.” (1 Samuweli 21:7) Cishe, uDavide wamangala, waze washaqeka ngisho nokushaqeka, ukuthi uDowegi ongenamthetho wayembone enoAhimeleki. Nokho, njengoba kwase kwenzekile kwase kwenzekile. UDavide wayengenakukuguqula lokho; noma avimbele imiphumela eyesabekayo intukuthelo kaSawule eyayiletha kumpristi omkhulu nakwabanye abapristi abaningi, nakwabesifazane, abantwana, nezilwane eNobi.—1 Samuweli 22:9-19.
Unalokhu engqondweni phawula futhi amazwi kaDavide okudabuka kuAbiyathara, owayesindile ekufeni kwabantu abaningi: “Ngazi ngalolosuku mhla uDowegi wakwaEdomi elapho . . . Iphuzu likaDavide singaliqonda ngokuthi, ‘Ngazi ngalolosuku, ngokushesha lapho ngibona ukuthi uDowegi wayengibonile nginoAhimeleki . . .’ Kodwa kwase kwephuze kakhulu. Ngokungalindelekile uDowegi wayelapho futhi wambona uDavide enompristi omkhulu. Ngakho uDavide ngokushesha waphetha ngokuthi uDowegi wayeyobikela uSawule. Kungakho kamuva uDavide avuma kuAbiyathara umuzwa othile wecala, ngisho noma uDavide anikela kuphela ngendlela engaqondile ekufeni kwabantu abaningi okwalandela. Wanxusa uAbiyathara ukuba ahlale naye, ngoba uDavide wayethembele esiqondisweni nasesivikelweni sikaJehova.—1 Samuweli 22:22, 23.
■ Ingabe kufanelekile ukuba abazalwane ababili noma abathathu bahlanganyele ekucwiliseni umuntu ngesikhathi sobhapathizo lobuKristu?
Ngokuvamile isikhonzi sesilisa esisodwa kuphela esidingekayo ukuze sibhapathize othile.
Nakuba iBhayibheli lingabeki uhla lwemithetho ngenqubo ephathelene nobhapathizo lobuKristu, singafunda embhalweni ongokweBhayibheli. Ubhapathizo lwamanzi lukaJesu lufundisa ngokukhethekile.
IBhayibheli liyabika: “Khona uJesu evela eGalile wafika kuJohane [uMbhapathizi] eJordani ukuba azobhapathizwa nguye.” (Mathewu 3:13) Qaphela ukuthi lithi “nguye,” hhayi yibo. Ukulandisa kwamaVangeli akunikezi lutho olubonisa ukuthi kukhona owahlanganyela noJohane ekubhapathizeni uJesu. Eqinisweni, ngokusobala kwakungekho zibukeli kulolobhapathizo, ngoba uJohane kuphela ekuqaleni owachaza uJesu ‘njengeWundlu likaNkulunkulu elisusa izono zezwe.’ (Johane 1:29, 33, 34) Khona-ke, ubhapathizo lukaJesu, lubeka isibonelo sokucwiliswa ngokuphelele emanzini, kodwa lusikisela futhi ukuthi inceku kaNkulunkulu yesilisa eyodwa okumelwe ibhapathize.
Kungenzeka ukuthi kwakukhona ufakazi oyedwa noma abangaphezulu lapho uFiliphu ebhapathiza umthenwa wase-Etiyopiya “emanzini,” kodwa uFiliphu wayeyedwa ekubhapathizeni. (IzEnzo 8:36-39) Ngaphezu kwalokho, imibhalo engokweBhayibheli yokunye ukubhapathiza ayibonisi ukuthi abazalwane ababili noma abathathu bahlanganyela ekucwiliseni umuntu ngaphansi kwamanzi nasekukhuphuleni lowomzalwane noma udade omusha bamkhiphe kuwo. Nokho, ezimweni eziningi, ngokusobala kwakunezibukeli, noma ofakazi, bobhapathizo.
Yebo, eminyakeni edlule kuye kwaba nezimo ezikhethekile okuye kwadingeka ukuba zicatshangelwe lapho kwenziwa ubhapathizo oluthile. Ngokwesibonelo, lapho okuwukuphela kwamanzi atholakalayo kuwumfula onamandla cishe noyingozi, ngenxa yokulondeka kungase kutuswe ukuba abazalwane ababili basebenze ndawonye. Noma isimo esingokomzimba salowo obhapathizwayo, esinjengokukhubazeka noma ukuba buthakathaka ngokwedlulele, kungase kudinge ukuba abazalwane abangaphezu koyedwa babhapathize. Nokho, lezi izimo ezingavamile okumelwe zisingathwe ngendlela ebonakala iwukuhlakanipha. Into ejwayelekile phakathi koFakazi BakaJehova iwukuba owesilisa oyedwa acwilise umfundi obhapathizwayo.