U-1986—Ingabe Unyaka “Wokulondoloza Ukuthula”?
IUN iye yamemezela u-1986 njengonyaka Wokuthula Wezizwe Zonke. Iyiphi intuthuko ekhona ekuletheni ukuthula kwezwe? Ukukhulumela okulandelayo kuvela kuwo wonke umhlaba.
Kusukela ngoApril 7 kuya ku-12, 1986, izishaya-mthetho ezivela emazweni ayi-103 zaba nengxenye emhlanganweni wama-75 weNhlangano YasePhalamende [Inter-Parliamentary Union (IPU)], eDolobheni laseMexico.
UNobhala-Jikelele weUN uJavier Pérez de Cuéllar wadlulisela lesigijimi eNhlanganweni: “Njengoba sekuqala uNyaka Wokuthula WeZizwe Zonke, sonke masiqaphele ukuthi isihloko sawo—‘Ukulondoloza Ukuthula Nekusasa Lesintu’—asinikezi umbono obalulekile ngo-1986 kuphela kodwa nangeminyaka ezayo. Masiwabambe ngokuzimisela amathuba ka-1986.”
Umongameli weIPU wabika ukuthi wahambela amazwe amaningi “eyozwa ukuthi izikhulu zasephalamende lapho zazingaba yini izikhulu zasephalamende zokuthula.” Waphetha ngokuthi: “Ngathola ukuthi lokhu kunzima kangakanani, ngempela kwezinye izimo akuthembisi.”
IQembu laseMexico ngokwalo labonisa “ukudabuka okukhulu ngokuthi naphezu kokukhathazeka okukhulayo komphakathi ngezingozi zokuncintisana ngezikhali nemizamo eyenziwa yiZizwe Ezihlangene, ayikho intuthuko ehlala njalo eye yenziwa eminyakeni yamuva ohlangothini lokuyeka izikhali.”
IQembu laseArgentina lahlanganisa “ukuthi izigidi ezingamashumi ayisithupha zabafa empini yezwe yesibili, noma isiphetho sayo senuzi eHiroshima, noma izimpi eziyikhulu namashumi amathathu eziye zalwiwa ngezikhali kusukela lapho bekunganele ukuba kufundise isintu ukuthi sisonqenqemeni lokuzibhubhisa.” Kwakhathazekwa ngokujulile ngokuthi ‘iMibuso eyisihlanu yenuzi iye yanqwabelanisa izikhali zenuzi ezingaphezu kwezi-50 000, isibalo esilingana namametric tons ayi-2,7 eziqhumane zezikhali ezivamile esakhamuzini ngasinye saleplanethi.”
Kwakukhona namalungu asebenza ngokugcwele oMkhandlu Wokulondeka WeUN, futhi nakhu okunye ukukhulumela kwawo:
IQembu laseBrithani lathi: “Umgomo oyinhloko kumelwe kube ukuvimbela umncintiswano wezikhali emkhathini. Nokho sidinga ukubhekana namaqiniso . . . Sezikhona kakade izikhali ezisemkhathini.” IQembu laseFrance lagcizelela “ukuthi ukwehluleka kweZizwe Ezihlangene ukulondoloza ukulondeka nokuthula okunobunye kubangelwa ikakhulukazi ukwephula kweminye iMibuso izimiso ezibalulekile zomthetho wezizwe zonke nowokuziphatha.” IQembu lase-U.S.S.R. labonisa “ukukhathazeka okukhulu ngengozi yenhlekelele yenuzi esongela isintu, engaholela ekupheleni kwempucuko emhlabeni.” Ilungu laseU.S. labikwa lithi ‘laliyozama ukuxoxa ngesidingo sokubambisana kwezizwe zonke ukuze kunqotshwe ubuphekula.’
Ngakolunye uhlangothi lomhlaba, uNyaka Wokuthula WeZizwe Zonke waphawulwa ngo-March 21 ngomhlangano owawuseHholo Elikhulu Labantu eBeijing. Umholi oyiShayina uZhao Ziyang wayeqiniseka kakhulu kunabanye lapho ethi: “Uma nje abantu bomhlaba beqhubeka nemizamo yabo ngokungayekethisi, ngokuqinisekile bayokuzuza ukuthula.”
Ngokuphathelene noNyaka Wokuthula WeZizwe Zonke WeUN, uPapa John Paul II wathi iHoly See ifuna ukushukumisa “umkhankaso womhlaba wonke womthandazo wokuthula ohilela zonke izizwe nazo zonke izinkolo.”
Lelizwe liphelelwa ukuthula. Futhi ngani? Ukuthula kwangempela kumelwe kusekelwe othandweni; lomhlaba uhlukaniswe ukuqhosha kwezizwe nenzondo. Ukuthula kwangempela kudinga ukubusa kokuhlakanipha nokokulunga; ababusi abangaphelele abangabantu abanakuyifinyelela lendinganiso. Ukuthula kwangempela kumelwe kugxiliswe ekukhulekeleni okunobunye kowukuphela kukaNkulunkulu weqiniso; izinkolo zezwe zihlukaniswe ngokungenathemba zaba yizinkulungwane zamahlelo, akukho nelilodwa lawo elidumisa uJehova njengeNkosi enguMbusi. Ukuthula kwangempela kudinga ukususwa ‘kukankulunkulu walelizwe,’ uSathane uDeveli nesimiso sakhe sokubusa; uMbuso kaJehova kuphela ezandleni zikaKristu waKhe ongachoboza uSathane nemisebenzi yakhe.—2 Korinte 4:4.
[Izithombe ekhasini 15]
Idollar legolide “lokuthula” laseAustralia
Isitembu sosheleni abayi-10 “bokuthula” baseKenya