Ukuphila NeNkonzo KaJesu
Uphendula Abamangaleli Bakhe
YISABATHA. UJesu uphilisa indoda esineminyaka engama-38 igula. Abaholi benkolo bobuJuda bambeka icala lokwephula iSabatha. Kodwa uJesu uyaphendula: “UBaba usebenza kuze kube-manje, nami ngiyasebenza.”
Naphezu kokumangalela kwabaFarisi, umsebenzi kaJesu akuwona owohlobo olwenqatshelwe umthetho weSabatha. Umsebenzi wakhe wokushumayela nokuphilisa uyisabelo esivela kuNkulunkulu, futhi elingisa isibonelo sikaNkulunkulu, uqhubeka ewenza zonke izinsuku. Nokho, impendulo yakhe yenza amaJuda acasuke ngisho nangokwengeziwe kunangaphambili, futhi afuna ukumbulala. Ngani?
Ngenxa yokuthi manje akukhona nje ukuthi bakholelwa ukuthi uJesu uphula iSabatha kuphela kodwa babheka ukusho kwakhe ukuthi uyiNdodana kaNkulunkulu njengokuhlambalaza. Nokho, uJesu akesabi futhi uqhubeka ebaphendula ngokuqondene nobuhlobo bakhe obuhle noNkulunkulu. Uthi: “UYise uyayithanda iNdodana, uyikhombisa konke akwenzayo yena.”
UJesu uyaqhubeka: “Njengalokhu uYise evusa abafileyo, abaphilise, kanjalo neNdodana iyabaphilisa labo ethanda ukubaphilisa.” Ngempela, iNdodana isiyabavusa kakade abafileyo ngendlela engokomoya! “Ozwa izwi lami, akholwe ngongithumileyo,” kusho uJesu, “usephumile ekufeni, wangena ekuphileni.” Yebo, uyaqhubeka: “Isikhathi siyeza, sesikhona namanje, lapho abafileyo beyakulizwa izwi leNdodana kaNkulunkulu; abezwayo bayakuphila.”
Nakuba kuze kube yilesikhathi ungekho umlando obonisa ukuthi uJesu ukhona aseye wamvusa ngokoqobo kwabafileyo, utshela abamangaleli bakhe ukuthi okunjalo ukuvuswa koqobo kwabafileyo kuyokwenzeka. Uthi, “ningamangali ngalokho, ngokuba isikhathi siyeza, lapho bonke abasemathuneni beyakulizwa izwi layo [baphume].”
Kuze kube manje, uJesu ngokusobala ubengakaze ayichaze phambi kwabantu indima yakhe ebalulekile enjongweni kaNkulunkulu ngendlela ekhanya neqondakala kangaka. Kodwa abamangaleli bakaJesu sebenobufakazi obungaphezu kobakhe ngalezizinto. UJesu uyabakhumbuza, “nina nithumele kuJohane, walifakazela iqiniso.”
Eminyakeni nje emibili ngaphambi kwalokho, uJohane uMbhapathizi watshela abaholi benkolo bobuJuda ngaLowo oza emva kwakhe. Ebakhumbuza ngokwazisa kwabo okukhulu ababenakho ngoJohane manje oseboshiwe, uJesu uthi: “Nina-ke benithanda ukuthokoza isikhashana ekukhanyeni kwakhe.“ UJesu ubakhumbuza lokhu ngethemba lokubasiza, yebo, ukubasindisa. Nokho akancikile ebufakazini bukaJohane.
“Yona lemisebenzi engiyenzayo [kuhlanganise izimangaliso asanda kuzenza], iyangifakazela ukuthi uBaba ungithumile.” Kodwa ngaphandle kwalokho uJesu uyaqhubeka: “NoBaba ongithumileyo ufakazile ngami.” Ngokwesibonelo, uNkulunkulu wafakaza ngoJesu, ekubhapathizweni kwakhe, ethi: “Lo uyiNdodana yami ethandekayo engithokozile ngayo.”
Ngempela, abamangaleli bakaJesu babengenazo izaba zokwenqaba uJesu. Yona kanye imibhalo ababethi bayayihlola ifakaza ngaye! UJesu uyaphetha, “uma benikholwa nguMose, beniyakukholwa yimina, ngokuba yena waloba ngami. Kodwa uma ningakholwa imibhalo yakhe, niyakukholwa kanjani ngamazwi ami na?” Johane 5:17-47; 1:19-27; Mathewu 3:17.
◆ Kungani umsebenzi kaJesu ungewona ophula iSabatha?
◆ UJesu uyichaza kanjani indima yakhe ebalulekile enjongweni kaNkulunkulu?
◆ Ubufakazi bukabani uJesu akhomba kubo, ukuze abonise ukuthi uyiNdodana kaNkulunkulu?