Ukuhlambalaza Igama LikaNkulunkulu—Ngokungalisebenzisi
UJEHOVA wabonisa umusa kubantu bakwaIsrayeli ngenxa yegama lakhe, ukuze lingahlanjalazwa phakathi kwezizwe. (Hezekeli 20:9, 13, 14, 22) Nokho, ngokuhamba kwesikhathi, amaIsrayeli ayeka ukusebenzisa igama likaNkulunkulu, okwenza ukuthi ekugcineni ukuphinyiselwa kwalo kulahleke. Lokhu kusetshenziswa kabi kwegama likaNkulunkulu kwakufana nokulihlambalaza.
Ngokuqondene nalokhu, uR. Laird Harris waphawula: “Kuyiqiniso elisobala ukuthi ukuphinyiselwa kwasendulo kwegama likaNkulunkulu wakwaIsrayeli kuye kwalahleka ngokuphelele. Ukholo lwamaIsrayeli kwakuyilo kuphela olwalwaziwa endulo. Lwaluyinkolelo yezwe yokuqala yokuthi uNkulunkulu munye futhi luwukuphela kokholo lwasendulo oluye lwaba yinkolo yezwe yangempela. Lwalungoluvelele ngokuba ngcwele kwalo ngokomoya futhi kwakungekho sithixo esasiwumfanekiso walo. Futhi ngokudabukisayo yilo kuphela olwalahlekelwa ukuphinyiselwa kwegama likaNkulunkulu walo. Isimo singesimangalisa ngempela futhi sabangelwa yilawo madoda aqotho azizwa engenasibindi sokuphimisa igama elingenakushiwo ngokwesaba ukulihlambalaza. Umphumela wabonakala ngempela uwukuhlambalaza kohlobo olwehlukile. Ukungalisebenzisi igama likaNkulunkulu kubonakala kuwukulihlambalaza niengoba nje kunjalo nangokuliphatha kabi iGama Kodwa amaqiniso asobala. AmaHeberu asendulo, ngokwemvelo, aliphimisela futhi alibhala igama likaNkulunkulu.”—The Law and the Prophets, ebhalwe ngu John H. Skilton, Nutley, New Jersey, 1974 ikhasi 215.
AmaIsrayeli ayazi ukuthi uma ekhohlwa igama likaJehova, uNkulunkulu ngokwakhe lokhu ‘wayengakuhlola.’ (IHubo 44:20, 21) Kamuva, ngesikhathi lokhu kwenzeka, ‘uNkulunkulu wathathela igama lakhe isizwe kubo abezizwe.’ (IzEnzo 15:14) Nakuba thina namuhla singayazi ngokuthe nse indlela yokuphimisela igama laphezulu ngesiHeberu, igama lesiNgisi elifanelekile nelanelisayo elihunyushwe lisuselwa kuTetragrammaton (izihlamvu zamagama esiHeberu ezine ezimelela leligama) elithi Jehovah. Namuhla, abantu abangaphezu kwezigidi ezintathu baziwa ngokuthi oFakazi BakaJehova, futhi bayakujabulela ukufakaza ngegama likaNkulunkulu wabo nokuphawulwa ngalo.