Ukuphila NeNkonzo KaJesu

Ukushisekela Ukukhulekela UJehova

NGEMVA komshado waseKhana, uJesu uya eKapernawume, umuzi oseduzane noLwandle lwaseGalile. Uhamba nabafundi bakhe, unina, nabafowabo, abangoJakobe, uJosefa, uSimoni, noJuda. Nokho, ngaphambi kokuthatha loluhambo, kungenzeka bama ekhaya lakubo kaJesu eNazaretha ukuze umkhaya ulungiselele izinto owawuyozidinga.

Kodwa kungani uJesu eya eKapernawume, kunokuba aqhubeke nenkonzo yakhe eKhana, eNazaretha, noma kwenye indawo ezintabeni zaseGalile? Kungenxa yokuthi, iKapernawume isendaweni eyaziwa kakhulu futhi ngokusobala ingumuzi omkhulu. Futhi, abafundi abaningi uJesu asanda kubathola bahlala eKapernawume noma eduze kwakhona, khona-ke akudingekile bashiye amakhaya abo ukuze ayobaqeqesha.

Ngesikhathi eseKapernawume, uJesu wenza izimangaliso, njengoba yena ngokwakhe akufakazela lokho ezinyangeni ezithile kamuva. Kodwa ngokushesha uJesu nabangane bakhe basendleleni futhi. Sekuyintwasahlobo, futhi basendleleni eya eJerusalema baya ephasikeni lika-30 C.E. Ngesikhathi belapho, abafundi bakhe babona okuthile ngoJesu abangakaze bakubone ngaphambili.

NgokoMthetho kaNkulunkulu, amaIsrayeli kudingeka enze umhlatshelo wezilwane. Ngakho-ke, ukuze babenzele lula, abathengisi eJerusalema bathengisa izilwane noma izinyoni ngenxa yalenjongo. Kodwa bathengisela khona phakathi ethempelini, futhi badla izimali zabantu ngokubakhokhisa kakhulu.

Egcwele intukuthelo, uJesu wenza inkalivasi ngezintambo futhi uxosha abathengisi. Uchitha imali yabashintshayo futhi ugumbuqela amatafula abo. Uthi kwabathengisa ngamajuba, “susani lokhu lapha, ningayenzi indlu kaBaba indlu yokuthengelana.”

Uma abafundi bakaJesu bebona lokhu, bakhumbula isiprofetho ngeNdodana kaNkulunkulu: “Ukushisekela indlu yakho kuyangidla.” Kodwa amaJuda ayabuza “Usitshengisa sibonakaliso sini ukuba wenze lokhu na?” UJesu uyaphendula: “Bhidlizani lelithempeli, ngizakulivusa ngezinsuku ezintathu.”

AmaJuda acabanga ukuthi uJesu ukhuluma ngethempeli elingokoqobo, kodwa ukhuluma ngethempeli eliwumzimba wakhe. Futhi eminyakeni emithathu kamuva ngesikhathi evuswa kwabafileyo abafundi bakhe bayawakhumbula lamazwi akhe. Johane 2:12-22; Mathewu 13:55; Luka 4:23.

◆ Ngemva komshado eKhana, yiziphi izindawo uJesu aya kuzo?

◆ Uthukutheliswa yini uJesu, futhi yini ayenzayo?

◆ Yini abafundi bakaJesu abayikhumbulayo uma bebona akwenzayo?

◆ UJesu wathini “ngalelithempeli,” futhi wayesho ukuthini?