Ukuphila NeNkonzo KaJesu

Ukubhapathizwa KukaJesu

CISHE ezinyangeni eziyisithupha ngemva kokuba uJohane eqalise ukushumayela, uJesu, oseneminyaka engama-30 manje, uza kuye eJordani. Ngasiphi isizathu? Ukumvakashela njengomngane? Ingabe uJesu umane unesithakazelo endleleni umsebenzi kaJohane oqhubeka ngayo? Cha, uJesu ucela uJohane ukuba ambhapathize.

Zisuka nje uJohane uyenqaba. Uyabuza: “Yimi engiswela ukubhapathizwa nguwe, wena uza kimi na?” UJohane uyazi ukuthi umzala wakhe uJesu uyiNdodana kaNkulunkulu ekhethiweyo. Phela, uJohane wagxuma ngenjabulo esibelethweni sikanina lapho uMariya, ekhulelwe uJesu, ebavakashela! Akungabazeki ukuthi unina kaJohane uElisabethe wamtshela ngalokhu kamuva. Futhi kungenzeka ukuba wamtshela nangesimemezelo sengelosi sokuzalwa kukaJesu nangokubonakala kwezingelosi kubelusi ngobusuku azalwa ngabo.

Ngakho uJesu akayena umfokazi kuJohane. Futhi uJohane uyazi ukuthi ukubhapathiza kwakhe akukhona okukaJesu. Kungokwalabo abaphenduka ezonweni zabo, kodwa uJesu akanasono. Nokho, naphezu kokwenqaba kukaJohane, uJesu uyaphikelela: “Vuma kalokhu, ngokuba kusifanele ukugcwalisa kanjalo ukulunga konke.”

Kungani kulungile ngoJesu ukuba abhapathizwe? Ngoba ukubhapathizwa kukaJesu akusona isibonakaliso sokuphenduka ezonweni, kodwa esokuziletha kwakhe ekwenzeni intando kaYise. UJesu wayengumbazi, kodwa manje isikhathi sesifikile ngaye ukuba aqalise inkonzo uNkulunkulu amthuma emhlabeni ukuba ayifeze. Ucabanga ukuthi uJohane wayelindele noma yini engajwayelekile ukuba yenzeke lapho ebhapathiza uJesu?

Nokho, uJohane kamuva wabika: “Owangithuma ukubhapathiza ngamanzi wathi kimi: Lowo oyakubona uMoya ehla ahlale phezu kwakhe, nguyena obhapathiza ngoMoya oNgcwele.” Ngakho uJohane wayelindele umoya kaNkulunkulu ukuba uze kothile ayembhapathiza. Ngakho-ke, mhlawumbe akazange amangale ngempela, lapho njengoba uJesu ephuma emanzini, ‘umoya kaNkulunkulu onjengejuba wehlela phezu kwakhe.’

Kodwa okungaphezu kwalokho kwenzeka ekubhapathizweni kukaJesu. Amazulu avuleka, futhi izwi lathi: “Lo uyiNdodana yami ethandekayo engithokozile ngayo.” Kwakungelikabani lelozwi? Kwakuyizwi likaJesu ngokwakhe? Lutho neze! KwakungelikaNkulunkulu. Ngokusobala, uJesu uyiNdodana kaNkulunkulu, akayena uNkulunkulu ngokwakhe, njengoba kusho abanye abantu. Mathewu 3:13-17; Luka 3:21-23; 1:34-36, 44; 2:10-14; Johane 1:32-34; Heberu 10:5-9.

◆ Kungani uJesu ayengeyena umfokazi kuJohane?

◆ Njengoba ayengenzanga izono, kungani uJesu abhapathizwa?

◆ Ngokucabangela lokho uJohane ayekwazi ngoJesu, kungani ayengenakumangala lapho umoya kaNkulunkulu uza phezu kukaJesu?