Imibuzo Evela Kubafundi
◼ Ingabe amazwi kaJesu athi “kuzakuphola uthando lwabaningi” asho ukuthi lokho kuzokwenzeka phakathi kwabakhulekeli beqiniso manje?
Ngesizathu esihle sikholelwa ukuthi uJesu wayengabikezeli ukuphola okukhulu kothando phakathi kwabantu bakaJehova.
Abaphostoli babecele ‘isibonakaliso sokuza kukaJesu nesokuphela kwezwe.’ UJesu wabikezela izimpi, ukuzamazama komhlaba, indlala nokushushiswa kwamaKristu. Wanezela: “Ngenxa yokwanda kobubi kuzakuphola uthando lwabaningi.”—Mathewu 24:3-12.
Isiprofetho sagcwaliseka kakhulu phakathi kwalesosikhathi (ngo-33 C.E.) nosizi olukhulu eJerusalema olwenziwa ngamaRoma ngo-70 C.E. (Qhathanisa noLuka 19:41-44; 21:5-28.) Phakathi nalesosikhathi, ingabe uthando lwamaKristu amaningi agcotshiwe lwaphola? Cha. Labo abahlubuka ebuKristwini phakathi nalesosizukulwane ngokusobala babeyingcosana. AmaKristu amaningi ayeshushiswa ngamaJuda aqhubeka “eshumayela izwi levangeli,” ebonakalisa uthando ngoNkulunkulu, kwabangakholwa nakumaKristu akanye nawo. (IzEnzo 8:1-25; 9:36-42) Kodwa uthando lwaphola kumaJuda, lawo ayezisholo ukuthi angabakhulekeli beqiniso. Inani elikhulu lawo alisinakanga isixwayiso sikaJesu, lavukela iRoma futhi lasebenzisa ubudlova ukuze livikele isizwe salo.
Isiprofetho sikaJesu asisebenzi kuphela ekhulwini lokuqala kodwa sigcwaliseka kakhulu namuhla. (IsAmbulo 6:2-8) Njengoba kwakunjalo ngamaJuda ngalesosikhathi, uthando lwabantu luya luncipha. Izigidi ziye zayeka ukukholelwa kuNkulunkulu. Ngisho nakweLobukholwa abantu bathambekele ekuboniseni uthando oluncane ngomakhelwane, futhi ababakhona esontweni nolwazi lweBhayibheli ngokuvamile kuyancipha. Abaningi ababonakala bekholwa bazama ukulungisa izinkinga zesintu ngezombangazwe. Ngakho ukuphola kothando ngokusobala kuphakathi kwabakhulekeli bakaNkulunkulu bokuzisholo.
Nokho, amaKristu eqiniso akumelwe anganaki. Ngenxa yokuthi amanye amaKristu ekhulwini lokuqala alahlekelwa uthando lwawo lwakuqala noma aphazanyiswa kulo izinkinga, singase sithole uthando lwethu luphela. (2 Thimothewu 2:16-19; IsAmbulo 2:4) Uma lokho kwenzeka siyoba ngabahlukile kubantu abaningi bakaJehova, iqiniso lokuthi kungase kwenzeke kithi ngabanye ligcizelela isidingo ngathi ‘sokukhuthazela kuze kube sekupheleni’ ukuze sisindiswe.—Mathewu 24:13.