Ukuphila Kwakho, Ubuqotho Bakho Nekhadi
“OQONDILEYO uyayibona ingozi, acashe, kepha abangenalwazi badlula nje, bahlupheke ngayo.”—IzAga 27:12, Septuagint, kaCharles Thomson.
Lesisaga esiphefumlelwe sigcizelela ukubaluleka kokucabanga kusengaphambili. Enye “ingozi” noma inhlekelele izinceku zikaNkulunkulu ezifuna ukuyigwema ukonakaliswa kobuqotho bazo. Sekuyiminyaka eminingi oFakazi BakaJehova benza lokho ngenkuthalo ngokuphathelene nomyalo kaNkulunkulu wokuthi amaKristu kumelwe ‘ayeke igazi.’—IzEnzo 15:28, 29.
AmaKristu ayaqaphela ukuthi ngemva kwengozi angase aquleke noma angakwazi ukunikeza incazelo eningiliziwe yokuthi kungani engenakwamukela ukumpontshelwa kwegazi. Ngisho noma uFakazi olimele engakhuluma futhi asho—ngokuvumelana nesinqumo esisekelwe olwazini—ukuthi akakufuni ukufakwa igazi, odokotela noma izisebenzi zasesibhedlela zingase zikhathazeke ngokuthi zingase zibe necala uma zingazange zilandele ukwelapha okuyisimiso. Ngakho sekuyiminyaka eminingi oFakazi BakaJehova bephatha ikhadi iMedical Alert. Leli ikhadi elisayiniwe, elinofakazi elikhulula odokotela nezikhulu zasesibhedlela ecaleni lanoma imiphi imixhantela yesifo engase ibonakale iwumphumela wokuvumelana nokwenqatshwa kwegazi. Unyaka ngamunye kusayinwa ikhadi elisha kulotshwe nosuku; kanjalo, lelikhadi lihlala lingelaleso sikhathi futhi lisebenza.
Uma ufuna ukulalela umthetho kaNkulunkulu ngegazi, ingabe njalo uphatha elinye lalamakhadi? Ingabe uyaqiniseka ukuthi lingelalesosikhathi, futhi uma kunokwenzeka, lisayinwe izihlobo zakho eziseduze? Phawula kulencwadi elandelayo ukuthi kungani kumelwe wenze kanjalo:
“Mina nomyeni wami sifuna ukunibonga kakhulu ngokusilungiselela ukudla okungokomoya ngesikhathi esifanele ngekhadi eliyalayo lokusisiza. Ngifuna ukulandisa indlela lelokhadi elasindisa ngayo ukuphila kwethu.
“KwakungoJune 6, 1983, futhi lina ngaleyontambama njengoba sasilibhekise ekhaya sivela emsebenzini. Sasisebenza njengenkontileka ekwakhiweni kwezindlu ezintsha amakhilomitha angama-48 kusuka ekhaya futhi sasisanda kuthatha abantabethu abathathu bebuya esikoleni. Njengoba umyeni wami, uJohn, eshayela iveni yethu iqonde ngasenyakatho ngomgwaqo omkhulu, sasixoxa ngomhlangano wesigodi owawusondela. Ngabona iloli elidonsa inqola eliya ngaseningizimu ligobela phakathi, lijika futhi lishaya emdweshwini ohlukanisa umgwaqo ngamandla lindizisa udaka notshani. Ngokuphazima kweso leliloli ladlula umdweshu futhi lama ngaphambi kwethu njengodonga olukhulu lwezitini.
“Sasivame ukuzibuza ukuthi yini eyayingenzeka uma singahileleka engozini. Sasiye salandela iziyalezo zokukhuluma nodokotela wethu womkhaya nesibhedlela sendawo yakithi ngokusebenzisa ukumpontshelwa ngegazi. Kodwa kuthiwani uma siqulekile, ngaphandle kwedolobha futhi singenakukwazi ukunqaba ukumpontshelwa ngegazi? Kulapho lapho olunye lwalolosizo lwenu [Watchtower Society] eniye nalulungiselela ngothando olungaka lapho lwasiza khona ngempela: ikhadi iMedical Alert. Siphatha awethu ngaso sonke isikhathi. Agcwaliswe kahle, anosuku futhi asayiniwe.
“Lapho ngiqulekile phakathi kwaleyonhlekelele, intokazi engumhlengikazi ongokomthetho yama. Yafuna ukuthatha abantwana ababili ababengatholakala, ngoba omunye wabo wayopha kabi enxebeni elalisekhanda, futhi uJohn wavuma. Enye intombazane encane yayivaleleke nami evenini kwaze kwaba yilapho kugqekezwa umnyango.
“Lapho kufika [iambulense], uJohn wacela isisebenzi sayo ukuba sithintane nabesibhedlela ngomsakazo futhi sibatshele ukuthi noma kunjani bangabafaki abantwana igazi. Lesisebenzi senqaba, kwaze kwaba yilapho uJohn esifundisa ikhadi iMedical Alert. Lasanelisa ukuba siyise isigijimi esibhedlela ngomsakazo.
“UJohn wayesesimweni esibucayi, esikeke kabi ekhanda, isihlakala sobunxele siphukile futhi nemihuzuko eminingi. Kodwa wayelokhu ethandazela ukuba ahlale engaqulekile isikhathi eside ngokwanele ukuba akwazi ukuqiniseka ukuthi izidingo nezifiso zomkhaya wakhe ziyahlangatshezwa.
“Ngephuka izinqulu zombili, enye yazo ivithikile, futhi ngiphuke ithambo lenyonga, okwabangela ukopha ngaphakathi. Lapho sifika esibhedlela ngangisaqulekile. Udokotela watshela uJohn ukuthi emahoreni ambalwa alandelayo ngangizolahlekelwa okungaphezu kwengxenye yegazi lami futhi ngangizokufa uma ngingampontshelwa ngegazi. Naphezu kwesimo sakhe, uJohn waqhubeka ebatshela, ‘Hhayi igazi.’ Babelokhu bemhlupha, bemtshela ukuthi wayezolahlekelwa umkakhe, futhi bethi, ‘Ubani-ke oyonakekela abantwana?’ Ekugcineni bathola ikhadi lami iMedical Alert. Udokotela wenza amakhophi alo futhi waliloba embhalweni. Njengoba liyincwadi engokomthetho, balihlonipha futhi bayeka ukuzama ukuphoqelela ukumpompela igazi. Ngemva kwamahora ayisithupha ngaphaphama ngokuphelele futhi ngakwazi ukuzikhulumela. Kodwa ikhadi elincane elimangalisayo—nakuba abanye bengalibheka njengelingabalulekile—langisindisa ukuba ngingaphoqelelwa ukumpontshelwa igazi lapho ngisaqulekile.
“Ngaba sesibhedlela cishe amasonto ayisikhombisa, kodwa nginomuzwa wokuthi ukululama kwashesha kakhudlwana, ngokwengxenye ngenxa yokuba ngingazange nginikezwe igazi okungelona elami, nemixhantela yalo yesifo. Sonke simunye njengomkhaya futhi silulama kahle. Ukubonga kuya kuJehova ngokusilungiselela usizo olumangalisa kanjalo, njengekhadi iMedical Alert. Liwusizo ngempela!”
OFakazi BakaJehova bathola lamakhadi awusizo kubadala emabandleni akubo. Okuhlangenwe nakho okungenhla kubonisa indlela wena nomkhaya wakho okumelwe ‘niqonde’ ngayo futhi niphathe njalo ikhadi iMedical Alert eligcwaliswe kahle nelangaleso sikhathi.—IzAga 22:3.