Imibuzo Evela Kubafundi

◼ Lapho eyamaHeberu 8:13 ikhuluma ngesivumelwano soMthetho njenge“sigugile; . . . [nesi]seduze nokunyamalala,” ingabe ibhekisela ekupheleni kwesimiso sobuJuda okwakusondela ngo-70 C.E.?

Qha. Abanye baye bachaza amaHeberu 8:13 ngaleyondlela. Kepha umongo wendaba uyabonisa ukuthi ibhekisela esimweni sesivumelwano soMthetho kusukela esikhathini lapho uJeremiya ebikezela isivumelwano esisha.

KumaHeberu isahluko sesishiyagalombili umphostoli uPawulu uqhathanisa izivumelwano ezimbili. ‘Isivumelwano sokuqala’ sasiyisivumelwano soMthetho esasinoMose njengomlamuleli. Isivumelwano ‘sesibili,’ noma esisha, ‘siyisivumelwano esihle kakhulu’ esinoJesu njengoMlamuleli ‘nesimiswe ngokwezithembiso zakhe ezinhle kakhulu.’—Heberu 8:6, 7.

UPawulu wacaphuna uJeremiya 31:31-34, lapho uJehova athembisa ‘ukwenza isivumelwano esisha nendlu kaJuda.’ Khona-ke umphostoli uyaqhubeka: “Ngokusho lokho ukuthi: Esisha, uthe esokuqala sigugile; kepha okugugayo osekukudala kuseduze nokunyamalala.”—Heberu 8:13.

Incwadi yamaHeberu yabhalwa phakathi “nesiphelo sesimiso [sobuJuda] sezinto,” ngokunokwenzeka cishe iminyaka eyisishiyagalolunye ngaphambi kokuba amaRoma abhubhise iJerusalema ngo-70 C.E. (Heberu 9:26, “NW”) Ngakho-ke, abanye baye bachaza lelivesi ngalendlela: Ukuvumela kukaNkulunkulu uMthetho kwaphela ngokufa kukaJesu, kodwa ukukhulekela kwasethempelini kwaqhubeka kwaze kwaba ngo-70 C.E. Kanjalo lapho uPawulu ebhala amaHeberu 8:13 isivumelwano soMthetho ‘sasiguga futhi sisondele ekunyamalaleni okuphelele, okwafika ngo-70 C.E.

Nokho, enye incazelo ivumelana kangcono nalokho eyamaHeberu isahluko sesi-8 ekushoyo.

UPawulu wayegcizelela inkulumo kaNkulunkulu ngoJeremiya yokuthi isivumelwano esisha sasiyothatha isikhundla sesivumelwano soMthetho, esasinephutha, ngoba asikwazanga ukuveza abantu abalungile. (Roma 3:20) Ngosuku lukaJeremiya kumelwe ukuba kwawamangaza amaJuda ukuzwa ukuthi isivumelwano soMthetho sasizosuswa kungene isivumelwano esisha esikhundleni saso esasingalungiselela izono ukuba zithethelelwe ngokuphelele.

Nokho, lapho nje uNkulunkulu esesibikezele ngokuqondile isivumelwano esisha, isivumelwano esidala ngandlela-thile sasiphelelwe isikhathi. Ngisho nakuba uNkulunkulu asivumela ukuba sihlale kuze kube ilapho uMesiya efika futhi ekhonza njengoMlamuleli wesivumelwano esisha, kwakungashiwo ngesivumelwano soMthetho ukuthi izinsuku zaso zase zinciphile kakade kusukela ekubhaleni kukaJeremiya lokho akubhala. Kungakho ivesi Heb 8:13 liqala ngokuthi: “Ngokusho lokho ukuthi: Esisha, uthe esokuqala sigugile.” Noma njengoba uJ. B. Phillips ekuhumusha: “Iqiniso nje lokuthi uNkulunkulu ukhuluma ngesivumelwano esisha . . . lenza esidala sibe esiphelelwe isikhathi.”

Ukuphelelwa isikhathi okwakulindelwe okwakukhona kusukela ekubhalweni kukaJeremiya 31:31-34 kwagcwaliseka ngokuphelele lapho ukufa kukaJesu kuletha uMthetho ekupheleni. Ngakho eminyakeni engaba ngama-28 kamuva uPawulu wayengathi: “Kepha nesivumelwano sokuqala kambe sasinezimiso zenkonzo nendlu engcwele yasezweni.”—Heberu 9:1.

“Bheka, izinsuku ziyeza, usho uJehova, lapho ngiyakwenza isivumelwano esisha nendlu kaIsrayeli nendlu kajuda, kungenjengesivumelwano engasenzayo nawoyise mhla ngibabamba ngesandla ukubakhipha ezweni laseGibithe, isivumelwano sami abasaphula noma ngangiyinkosi yabo, usho uJehova.”—Jeremiya 31:31, 32.