UJesu Uyaboshwa

UJesu nabaphostoli bakhe badabula eSigodini SaseKidroni belibangise eNtabeni Yeminqumo. Kwakungemva kuka-12 ebusuku futhi inyanga yayigcwele. Lapho befika ensimini yaseGetsemane, uJesu wathi kubafundi bakhe: “Hlalani lapha nilinde.” UJesu waya phambili kancane, wabe eseguqa ngamadolo. Wathandaza kuJehova ecindezeleke kakhulu wathi: “Intando yakho mayenzeke.” UJehova wabe esethumela ingelosi ukuba ikhuthaze uJesu. Lapho uJesu ebuyela kubaphostoli, wabafica belele. Wathi: ‘Vukani! Akusona isikhathi sokulala lesi! Selifikile ihora lokuba nginikelwe ezitheni zami.’

Ngemva nje kwalokho kwafika uJuda, ehamba nabantu abaningi ababephethe izinkemba nezinduku. Wayazi ukuthi uzomthola kuphi uJesu ngoba babehlale beza kule nsimu. UJuda wayewatshelile amasosha ukuthi uzowabonisa uJesu. Waqonda ngqo kuJesu wafike wathi: ‘Sawubona, Mfundisi,’ wabe esemqabula. UJesu wathi: ‘Juda, uyangidayisa ngokungiqabula?’

UJesu wabe esesondela eduze kwabantu ababezombopha, wababuza: “Nifuna bani?” Bathi: “UJesu umNazaretha.” Wabe esephendula: “Nginguye.” Lapho bezwa lokho bahlehla bawela phansi emhlabathini. UJesu waphinda wababuza: “Nifuna bani?” Baphinda bathi: “UJesu umNazaretha.” UJesu waphendula: ‘Nginitshelile nje ukuthi nginguye. Yekani la madoda ahambe.’

Lapho uPetru ebona lokho okwakwenzeka, wahosha inkemba wagenca indlebe kaMalkusi, isigqila sompristi ophakeme. Kodwa uJesu wathinta indlebe yale ndoda wayelapha. Wabe esethi kuPetru: ‘Faka inkemba emgodleni wayo. Uma ulwa ngenkemba, uyofa ngenkemba.’ Amasosha ambamba uJesu, ambopha izandla, abaphostoli babaleka. Base bemthatha uJesu bamusa ku-Anase, umpristi omkhulu. U-Anase wabuza uJesu imibuzo wabe esemthumela endlini yoMpristi Ophakeme uKayafase. Kwenzekani kubaphostoli?