ISAHLUKO 23
Ngingawuchaza Kanjani Umbono WeBhayibheli Ngobungqingili?
Umcimbi wokuklonyeliswa uyajika uxokozele lapho abadlali bamabhayisikobho ababili besifazane bebingelelana ngokuqabulana okuvusa inkanuko! Izibukeli zibamba ongezansi, bese ziyachwaza ziba-bongele. Ongqingili bayakusekela lokhu. Abakugxekayo bathi ukubukisa. Izithombe zalokhu kuqabulana zizo-vezwa ngokuphindaphindiwe kuyi-TV nakuyi-Internet.
NJENGOBA kuboniswe ngenhla, zimbalwa izinto ezibangela isasasa njengalapho usaziwayo ephumela obala ukuthi ungungqingili. Abanye abantu bayabancoma abantu abanjalo bathi banesibindi; abanye bayabagxeka bathi banamanyala. Phakathi kwale mibono emibili engafani, kunabaningi abathi ubungqingili bumane nje buyindlela ehlukile yokuphila. “Ngesikhathi ngisesikoleni,” kusho uDaniel oneminyaka engu-21, “ngisho nezingane ezingebona ongqingili zazithi uma unenkinga ngendaba yobungqingili, unobandlululo futhi wahlulela abanye.”
Imibono ngobungqingili ingase yehluke kuye ngobudala babantu noma indawo. Kodwa amaKristu ‘awayiswa lé nalé yiyo yonke imimoya yemfundiso.’ (Efesu 4:14) Kunalokho, avumelana nombono weBhayibheli.
Uyini umbono weBhayibheli ngobungqingili? Futhi uma uphila ngezimiso zeBhayibheli, ungasabela kanjani kulabo abathi unobandlululo, wahlulela abanye noma uyabazonda ongqingili? Funda le mibuzo nezinkulumo ezilandelayo bese ucabanga ngezimpendulo ongazinikeza.
“Lithini iBhayibheli ngobungqingili?”
“IBhayibheli likwenza kucace ukuthi uNkulunkulu wenza ukuba ubulili benziwe owesilisa nowesifazane abashadile kuphela. (Genesise 1:27, 28; Levitikusi 18:22; IzAga 5:18, 19) Lapho iBhayibheli lilahla ubufebe, lisuke libhekisela kukho kokubili ukuziphatha kongqingili nokuziphatha okubi kwabobulili obungefani.”a—Galathiya 5:19-21.
“Uyini umbono wakho ngobungqingili?”
“Angibazondi ongqingili, kodwa angiyithandi indlela abaziphatha ngayo.”
Khumbula: Uma uphila ngezimiso zeBhayibheli, leyo indlela wena okhetha ukuphila ngayo, futhi unelungelo lokuzikhethela yona. (Joshuwa 24:15) Ungazenyezi ngombono wakho.—IHubo 119:46.
“AmaKristu akufanele yini ahloniphe bonke abantu, kungakhathaliseki ukuthi baziphatha kanjani?”
“Impela kufanele abahloniphe. IBhayibheli lithi: ‘Dumisani abantu bazo zonke izinhlobo’ noma, ngokwe-Today’s English Version, ‘Hloniphani bonke abantu.’ (1 Petru 2:17) Ngakho, amaKristu awabazondi ongqingili. Abonisa umusa kubo bonke abantu, kuhlanganise nalabo abangongqingili.”—Mathewu 7:12.
“Umbono wakho ngobungqingili awukhuthazi yini ukucwasa ongqingili?”
“Lutho. Into engingavumelani nayo ukuziphatha kongqingili, hhayi abantu abangongqingili.”
Ungase wenezele: “Ngokwesibonelo, mina ngikhetha ukungabhemi. Eqinisweni, ngikubheka njengento embi kakhulu. Kodwa ake sithi wena uyabhema futhi ukubona kukuhle. Ngeke ngikuzonde ngenxa yombono wakho, njengoba nje ngicabanga ukuthi nawe ngeke ungizonde ngenxa yombono wami—angithi? Kunjalo nangemibono yethu engefani ngobungqingili.”
“UJesu akazange yini athi asibekezelele abanye? Uma asho, akufanele yini amaKristu abamukele ubungqingili?”
“UJesu akazange akhuthaze abalandeli bakhe ukuba bamukele noma iyiphi indlela yokuphila. Kunalokho, wafundisa ukuthi indlela yokusindiswa ivulekele ‘wonke umuntu obonisa ukholo [kuye].’ (Johane 3:16) Ukubonisa ukholo kuJesu kuhlanganisa nokuzivumelanisa nezindinganiso zikaNkulunkulu zokuziphatha, ezilahla izinhlobo ezithile zokuziphatha—kuhlanganise nobungqingili.”—Roma 1:26, 27.
“Ongqingili abakwazi ukushintsha indlela abaphila ngayo; bazalwe benjalo.”
“IBhayibheli alisho lutho ngokwakheka kwezakhi zomzimba womuntu ongungqingili, kodwa liyavuma ukuthi eminye imikhuba ijulile kumuntu. (2 Korinte 10:4, 5) Ngisho noma abanye bethanda abantu bobulili obufanayo, iBhayibheli lithi amaKristu awagweme izenzo zobungqingili.”
Ukusikisela: Kunokuba uzifake empikiswaneni yokuthi zibangelwa yini izifiso zobungqingili, gcizelela ukuthi iBhayibheli liyakwenqabela ukuziphatha kobungqingili. Ukuze uveze umehluko, ungase uthi: “Abaningi bathi ubudlova bungabangelwa ufuzo, yingakho abanye abantu beyizidlova. (IzAga 29:22) Kuthiwani uma lokho kuyiqiniso? Cishe uyazi ukuthi iBhayibheli liyakulahla ukuqhuma kwentukuthelo. (IHubo 37:8; Efesu 4:31) Ingabe leyo ndinganiso iwukungacabangeli ngenxa nje yokuthi abanye bathambekele ebudloveni?”
“UNkulunkulu angasho kanjani kumuntu okhangwa abobulili obufanayo ukuba agweme ubungqingili? Ukungacabangeli lokho.”
“Ukucabanga okunjalo kusekelwe embonweni oyiphutha wokuthi abantu kumelwe banelise izifiso zabo zobulili. IBhayibheli libanika isithunzi abantu ngokubaqinisekisa ngokuthi bangakwazi ukukhetha ukungazanelisi izifiso ezimbi zobulili uma befuna ngempela.”—Kolose 3:5.
“Ngisho noma ungeyena ungqingili, kufanele ushintshe umbono wakho ngobungqingili.”
“Ake sithi angikuthandi ukugembula kodwa wena uyakuthanda. Bekuyoba nengqondo yini ngawe ukungicindezela ukuba ngishintshe umbono wami ngoba nje bebaningi abantu abagembulayo?”
Khumbula lokhu: Ongqingili, kuhlanganise neningi labantu, banezimiso ezibenza bazonde izinto ezithile—njengokukhwabanisa, ukungabi nabulungisa noma impi. IBhayibheli liyazilahla lezo zinto; liyazenqabela nezinhlobo ezithile zokuziphatha kobulili, kuhlanganise nobungqingili.—1 Korinte 6:9, 10.
IBhayibheli alilona elingaboneleli, lingakukhuthazi futhi nokubandlulula. Limane nje liyala labo abanezifiso zobungqingili ukuba benze okufana nalokho okulindeleke kulabo abakhangwa abobulili obuhlukile—‘ukubalekela ubufebe.’—1 Korinte 6:18.
Iqiniso liwukuthi, izigidi zabantu abathandana nabobulili obuhlukile abafisa ukuphila ngokuvumelana nezindinganiso zeBhayibheli bayazithiba naphezu kwanoma isiphi isilingo abangase babhekane naso. Bahlanganisa abaningi abangashadile abanamathuba amancane okuba bashade kanye nabaningi abashade nabantu abakhubazekile abangakwazi ukuya ocansini. Bayakwazi ukuphila ngenjabulo ngaphandle kokwanelisa izifiso zabo zobulili. Labo abanezifiso zobungqingili bangenza okufanayo uma befuna ngempela ukujabulisa uNkulunkulu.—Duteronomi 30:19.
FUNDA OKWENGEZIWE NGALE NDABA EMQULWINI 2, ISAHLUKO 28
Amanye amantombazane acabanga ukuthi ukulala nabafana athandana nabo kuzobenza bawathande kakhulu. Akunjalo neze! Thola ukuthi kungani.
[Umbhalo waphansi]
a Igama eliseBhayibhelini elithi “ubufebe” alibhekiseli kuphela ekuhlanganyeleni ubulili kodwa nasezenzweni ezifana nokushaya omunye umuntu indlwabu noma ukwenza ubulili bomlomo noma bendunu.
UMBHALO OYINHLOKO
“Ngakho-ke, bulalani amalungu emizimba yenu asemhlabeni ngokuqondene nobufebe, ukungcola, isifiso sobulili, isifiso esilimazayo, nokuhaha, okuwukukhonza izithombe.”—Kolose 3:5.
ICEBISO
Nakuba ukuziphatha kwabanye kungase kukucindezele, gwema ukuzibonisa ulungile. Banelungelo lokukhetha lokho abafuna ukuku-kholelwa—njengoba nawe unalo.
UBUWAZI . . . ?
Amanye amaKristu ekhulu lokuqala ayekade enza izenzo zobungqingili ngaphambili akwazi ukushintsha izindlela zawo ezingahlanzekile futhi ‘agezwa ahlanzeka’ emehlweni kaNkulunkulu.—1 Korinte 6:9-11.
ENGIZOKWENZA!
Uma othile ethi umbono weBhayibheli ngobungqingili uyisidala, ngizothi ․․․․․
Ukuze ngikwenze kucace ukuthi ubungqingili engingavumelani nabo, hhayi abantu abangongqingili, ngizothi ․․․․․
Engingathanda ukukubuza umzali wami (abazali) ngale ndaba ․․․․․
UCABANGANI?
● Kungani uNkulunkulu enelungelo lokubekela abantu imithetho yokuziphatha?
● Ukunamathela emithethweni yeBhayibheli yokuziphatha kukuzuzisa kanjani?
[Amazwi acashunwe esihlokweni ekhasini 170]
“Umfana othile esikoleni wathi nginenhliziyo embi ngoba ngingayithandi indlela yakhe yokuphila. Kodwa lapho ngimchazela ukuthi akukona ukuthi angithandi yena—nalapho ebona ukuthi akubona ubungqingili kuphela engingabuthandi kodwa zonke izinhlobo zokuziphatha okubi—waqala ukungihlonipha aze angivikele nalapho abanye bengiphikisa.”—U-Aubrey
[Ibhokisi ekhasini 168]
Kuthiwani Ngobulili Obungakhethi?
Nakuba butholakala ebafaneni nasemantombazaneni, kubonakala sengathi ubulili obungakhethi buvamise kakhulu emantombazaneni. Kwamanye, kumane kuyilukuluku nje. ULisa oneminyaka engu-26 uthi: “Uma intsha ibona lezi zinto kumabhayisikobho, kuma-TV, izwa nomculo ogqugquzela ukuqabulana kwamantombazane, ingalingeka ukuba ikuzame—ikakhulu uma ingakubheki njengento engalungile.”
Kwamanye, kubonakala kuwukukhangana kwangempela. UVicky oneminyaka engu-13 uthi: “Ngahlangana namantombazane amabili obulili obungakhethi ephathini futhi kamuva ngathola ngomngane wami ukuthi ayangithanda. Ekugcineni ngaqala ukuthumela umyalezo kwenye yala mantombazane, futhi ngaqala ukuyithanda.”
Uke wazizwa ngendlela uVicky azizwa ngayo? Abaningi bangakukhuthaza ukuba wamukele ubulili bakho njengoba bunjalo, uvume ukuthi ungowobulili obungakhethi. Nokho, kufanele uqaphele ukuthi ukukhangwa abobulili obufanayo kuvame ukuba into yesikhashana. Yilokho okwatholwa uVicky. ULisette oneminyaka engu-16 naye wathola into efanayo. Uthi: “Ukukhuluma nabazali bami ngemizwa yami kwangenza ngazizwa ngingcono. Nasekilasini lesayensi yezinto eziphilayo esikoleni ngafunda ukuthi phakathi neminyaka yokuthomba, amazinga ama-hormone ashintshashintsha kakhulu. Ngicabanga ukuthi ukube intsha beyazi kabanzi ngemizimba yayo, ibingaqonda ukuthi ukukhangwa umuntu wobulili obufanayo kuyinto yesikhashana nje futhi ibingeke izizwe iphoqelekile ukuba ibe ongqingili.”
Ngisho noma kuthiwa imizwa yakho ijule kakhulu kunento yesikhashana yokukhula, qaphela ukuthi iBhayibheli libeka phambi kwakho umgomo ongawufinyelela: Ungakhetha ukungenzi ngokuvumelana nezifiso ezingalungile, kungakhathaliseki ukuthi ziyini.
[Isithombe ekhasini 169]
Mayelana nombono othandwa iningi, amaKristu anesibindi sokwehluka eningini