USolomoni Ubusa Ngokuhlakanipha

BEKUNGABA njani ukuphila ukube sonke isizwe nombusi waso bebeholwa uJehova njengoMbusi futhi belalela imiyalo yakhe? Impendulo yanikezwa phakathi nokubusa kweNkosi uSolomoni kweminyaka engu-40.

Ngaphambi kokuba uDavide afe, wabeka indodana yakhe uSolomoni ukuba ibe inkosi ngemva kwakhe. Ephusheni, uNkulunkulu wathi kuSolomoni makacele noma yini. USolomoni wacela ukuhlakanipha nolwazi ukuze ahlulele abantu ngokulunga nangokuhlakanipha. UJehova wajabula futhi wanikeza uSolomoni inhliziyo enokuhlakanipha nokuqonda. Wamthembisa nengcebo, udumo nokuphila isikhathi eside uma ayeyohlala emlalela.

USolomoni waduma ngenxa yezahlulelo zakhe ezihlakaniphile. Kwesinye isenzakalo, abesifazane ababili babebanga umntwana womfana, ngamunye ethi ungunina. USolomoni wathi umntwana makasikwe phakathi ukuze bahlukaniselane ngaye. Omunye wavuma, kodwa ngokushesha umama okunguyenayena wancenga ukuba umntwana anikezwe lona omunye wesifazane. Kwamcacela uSolomoni ukuthi lona wesifazane onozwela nguye umama, wayesemnikeza umntwana. Wonke u-Israyeli washeshe wezwa ngalesi sinqumo futhi abantu baqaphela ukuthi uSolomoni wayenokuhlakanipha kukaNkulunkulu.

Enye yezinto ezinkulu uSolomoni azenza kwakuwukwakhela uJehova ithempeli​—isakhiwo esihle kakhulu eJerusalema esasizoba ikomkhulu lokukhulekela kwa-Israyeli. Lapho ithempeli linikezelwa, uSolomoni wathandaza: “Bheka! Amazulu, yebo, izulu lamazulu, ngokwawo awakwazi ukukuthwala; kangakanani-ke le ndlu engiyakhile!”​—1 AmaKhosi 8:27.

Idumela likaSolomoni lasakazekela nakwamanye amazwe akude njengaseSheba, e-Arabhiya. Indlovukazi yaseSheba yathatha uhambo lokuyobona inkazimulo nengcebo kaSolomoni nokuthola ukuthi uhlakaniphe kangakanani. Imangazwe ukuhlakanipha kukaSolomoni nokuchuma kuka-Israyeli, le ndlovukazi yadumisa uJehova ngokubeka inkosi ehlakaniphe kangaka esihlalweni. Ngempela, ngenxa yesibusiso sikaJehova, umbuso kaSolomoni wachuma futhi waba nokuthula kunayo yonke imibuso emlandweni ka-Israyeli wasendulo.

Ngokudabukisayo, uSolomoni wehluleka ukuqhubeka enza ngokuvumelana nokuhlakanipha kukaJehova. Wawushaya indiva umthetho kaNkulunkulu, washada nabesifazane abangamakhulu amaningi, kuhlanganise nabaningi ababekhulekela abanye onkulunkulu. Kancane kancane abafazi bakhe bachezukisa inhliziyo yakhe kuJehova, wakhulekela izithombe. UJehova watshela uSolomoni ukuthi wayezomphuca ingxenye yombuso. Wathi kuye, yena nenzalo yakhe babezosala nengxenye encane ngenxa kaDavide uyise. Naphezu kokuhlubuka kukaSolomoni, uJehova wathembeka esivumelwaneni soMbuso ayesenze noDavide.

​—Isekelwe kweyoku-1 AmaKhosi izahluko 1 kuya ku-11; 2 IziKronike izahluko 1 kuya ku-9; Duteronomi 17:17.