Iisibonelo Esihle​—U-Asafa

U-Asafa ubhekene nesikhathi esinzima ekuphileni kwakhe. Ubona abantu abamzungezile bephula imithetho kaNkulunkulu kodwa bengajeziswa! Ngenxa yalokho, uyazibuza ukuthi kuyasiza yini ukwenza umzamo wokujabulisa uNkulunkulu. Uthi: “Impela inhliziyo yami ngiyihlanzé ngeze nezandla zami ngizigezelé ize ngobumsulwa.” Kepha ngemva kokucabanga nzulu ngale ndaba, uyawushintsha umqondo. Uyabona ukuthi noma iyiphi intokozo etholwa ababi ingeyesikhashana nje kuphela. Uphetha ngaliphi u-Asafa? Uhlabelelela uJehova: “Ngaphandle kwakho anginakho okunye ukujabula emhlabeni.”—IHubo 73:3, 13, 16, 25, 27.

Mhlawumbe kuke kwenzeka nawe wazibuza ukuthi kunanzuzoni ukuphila ngezindinganiso zikaNkulunkulu. Kodwa yenza njengo-Asafa, ubheke ngalé kwalokhu okubonayo. Cabanga ngesimo salabo abangazange bayinake imithetho kaJehova. Ingabe ngempela banokuthula? Ikhona yini imfihlo yenjabulo abayitholile abangayitholanga labo abathembekile kuNkulunkulu? Ngemva kokucabangisisa ngale ndaba, cishe uyofuna ukwenanela amazwi ka-Asafa: “Ukusondela kuNkulunkulu kuhle kimi.”—IHubo 73:28.