Isithelo Esiyigugu Sase-Armenia
● Sekuyizinkulungwane zeminyaka kulinywa amabhilikosi e-Asia naseYurophu. AbaseYurophu babekholelwa ukuthi umsuka webhilikosi use-Armenia, ngakho baqala ukulibiza ngokuthi i-aphula lase-Armenia.
Namuhla e-Armenia kutshalwa izinhlobo zamabhilikosi ezingaphezu kuka-50. Aqala ukudliwa kusukela phakathi no-June kuze kube sekupheleni kuka-August. Umhlabathi onothile wentaba-mlilo nokubalela kwelanga okuyinto evamile e-Armenia kwenza amabhilikosi atshalwa kule ndawo abe noshukela onambitheka ngendlela eyingqayizivele ebangela ukuba abantu abaningi babe nombono wokuthi aphakathi kwamnandi kakhulu emhlabeni.
Izinhlobo ezivamile zinobukhulu obuthi abulingane nobepulamuzi futhi ziyahlukahluka ngombala kusukela kosagolide kuya kosawolintshi. Amabhilikosi anesikhumba esibushelelezi kanti ngaphakathi omile, awanawo amanzi amaningi futhi ayahlukahluka ngokunambitheka kusukela kwanoshukela kuya kwamuncwana. Abanye bachaza ukunambitheka kwezinhlobo ezithandwayo ngokuthi kufana nokwepetshisi noma ipulamuzi.
Abalimi bamabhilikosi sebenze ibhilikosi “elimnyama,” kodwa akulona elangempela. Kunalokho, liyingxube yebhilikosi nepulamuzi. Linesikhumba esinoboyana—nombala obukhwebezane ocishe ube mnyama bese kuthi ngaphakathi libe phuzi.
Izihlahla zamabhilikosi ziqhakaza ngaphambi kokuba zibe namacembe, ziveze izimbali ezimhlophe ezinephunga elimnandi nezisebenzisa impova yazo. Izimbali zawo zifana nezezihlahla zamapetshisi, ezamapulamuzi, nezama-cherry. Lezi zihlahla zikhula kahle ezindaweni ezinobusika obubandayo nehlobo elifudumele, njengoba zidinga amakhaza ukuze ziqhakaze futhi zithele kahle. Ngakho-ke, isimo sezulu sase-Armenia sikahle impela kulezi zithelo!
Amabhilikosi asanda kukhiwa anezinzuzo eziningi zempilo. Ngokwesibonelo, awumthombo omuhle kakhulu we-beta-carotene no-vithamini C. Abantu abaningi bajwayele amabhilikosi omisiwe. Lokhu kungenxa yokuthi angomisiwe ayashesha ukonakala. Ngenxa yalokho, kwezinye izingxenye zomhlaba amabhilikosi omisiwe athandwa kakhulu kunangomisiwe. Ngokujabulisayo, amabhilikosi omisiwe nawo anomsoco futhi ane-fiber eningi nokusansimbi. Ngaphezu kwalokho, asetshenziselwa nokwenza ugologo, ujamu kanye nesiphuzo esivamile.
Ukwenezela kulokhu, kunemihlobiso emihle eyenziwa ngesihlahla samabhilikosi, njenge-duduk, umtshingo wase-Armenia othandwayo ngezinye izikhathi obizwa ngokuthi i-apricot pipe. Ezitolo nasezimakethe zaseYerevan, inhloko-dolobha yase-Armenia, izivakashi zingathola nezinto ezinhle ezizoba isikhumbuzo kuzo ezibazwe ngokhuni lwesihlahla samabhilikosi.
Uma uhlala ezweni lapho ungase ukwazi khona ukudla ibhilikosi olikhe esihlahleni, lizame. Akungabazeki ukuthi ngeke sikudumaze lesi sithelo esinambithekayo esisagolide.