Ukuba Nonembeza Omuhle Kukhazimulisa UNkulunkulu

NGUMLOBELI WE-PHAPHAMA! E-UKRAINE

LAPHO ulibangise ekhaya ngemva komhlangano wobuKristu, umkhaya wakwaChibisov, ongoFakazi BakaJehova e-Ukraine, wathola isikhwama esasinezinto ezibalulekile, kuhlanganise nelayisense yokushayela, amakhadi okuthenga ngesikweleti nemali engaba ngu-R3 000. Ubaba kuphela owayesebenza kulo mkhaya onamalungu amahlanu. Wayehola imali engaba ngu-R420 ngenyanga. Ngakho le mali yayingaba usizo olukhulu kubo. Benzani?

Umama uyalandisa: “Amadodakazi ethu aqala ngaleso sikhathi ukufuna indlela yokubuyisela lesi sikhwama kumnikazi waso, ilayisense eyayibonisa ukuthi kwakuwumuntu wesifazane. Mina nomyeni wami sajabula lapho sibona indlela abantwana bethu abawusebenzisa ngayo unembeza wabo oqeqeshwe kahle. Ngakusasa ngathintana nalona wesifazane owayelahlekelwe yisikhwama. Ekhala izinyembezi zenjabulo, u-Olha wasitshela ukuthi yena nomyeni wakhe banezitodlwana ezimbalwa edolobheni lakithi. Imali ekulesi sikhwama yayiwumholo wenyanga wezisebenzi zabo. Ngaphezu kwalokho, elinye lamaphepha ezimali elalisesikhwameni lalibaluleke kakhulu emarekhodini ebhizinisi.

“U-Olha wasibuza ukuthi sasisithole kuphi isikhwama. Samtshela indawo esisithole kuyo, samchazela nokuthi sasidlula lapho ngoba sivela emhlanganweni wethu wobuKristu. Lapho simhambisela izincwadi ezithile zeBhayibheli, wazamukela ngenhlonipho.

“Ngemva kwamasonto ambalwa, uFakazi othile ebandleni lakithi wasitshela ukuthi lapho ehambisela abantu emgwaqweni izincwadi zeBhayibheli, owesifazane othile wamtshela ukuthi ngaphambili wayengafuni nokubezwa oFakazi BakaJehova. Kodwa manje, wayesekulungele kokubili, ukulalela nokuthatha izincwadi. Wathi lokhu kwakungenxa yokuthi oFakazi babetholisele indodakazi yakhe isikhwama.”

[Isithombe ekhasini 18]

Umkhaya wakwaChibisov