Ukubaluleka Kukamagazini Owodwa We-Phaphama!

Ngo-August 1993, indoda ethile eSão Paulo, eBrazil, yathola ikhophi ye-Phaphama! ezibini. Ngemva kokuyifunda ngokwazisa okukhulu, yabhalela i-Watch Tower Society eBrazil. Yabhala: “Sizani ningithumelele ukwaziswa ngokuphathelene nesifundo seBhayibheli sasekhaya samahhala. Ngiyaqiniseka ukuthi sizongisiza kakhulu.”

Isicelo salendoda sadluliselwa ebandleni loFakazi BakaJehova eduze kwalapho ihlala khona. Lendoda yavakashelwa, futhi kwaqalwa isifundo seBhayibheli nayo. Ngo-September 1995, lendoda yabonakalisa ukuzinikezela kwayo kuNkulunkulu ngobhapathizo lwamanzi emhlanganweni omkhulu woFakazi.

Ukubaluleka kukamagazini owodwa we-Phaphama! akufanele kubukelwe phansi. Okuqukethe kuthinta ukuphila kwabantu ngokomuntu siqu. Uma ungathanda ukuthola lomagazini njalo, cela omunye woFakazi BakaJehova noma ubhalele ekhelini elifanele kwasekhasini 5.