Isibonelo Sendlela Yokuphatha Ababaleki
EMTHETHWENI uJehova uNkulunkulu awunikeza isizwe sakwa-Israyeli, ama-Israyeli akhunjuzwa ngesimo sawo njengababaleki eGibithe. (Eksodusi 22:21; 23:9; Duteronomi 10:19) Ngakho ayalwa ukuba abaphathe ngomusa abafokazi abaphakathi kwawo, empeleni abaphathe njengabafowabo.
UMthetho kaNkulunkulu wawuthi: “Uma umfokazi [ngokuvamile owayeba umbaleki] egogobele kuwe ezweni lakini, aniyikumhlupha. Umfokazi ogogobeleyo kini uyakuba-kini njengowokuzalwa ekhaya phakathi kwenu, umthande njengalokhu uzithanda wena, ngokuba naningabafokazi ezweni laseGibithe.”—Levitikusi 19:33, 34.
Eqaphela ukuthi ngokuvamile abafokazi babesengozini futhi bengalondekile, uJehova wanikeza imithetho eqondile yenhlalakahle nesivikelo sabo. Cabangela amalungelo alandelayo abawanikezwa.
ILUNGELO LOKUQULWA KWECALA NGENDLELA EFANELE: “Niyakuba-nomthetho munye kumfokazi nakowokuzalwa ekhaya.” “Awuyikuphendukezela ukwahlulelwa komfokazi.”—Levitikusi 24:22; Duteronomi 24:17.
ILUNGELO LOKWABELWA OKWESHUMI: “Ngasekugcineni kweminyaka emithathu njalo uyakukhipha konke okweshumi kwezithelo zakho ngawona lowomnyaka, ukubekelele phakathi kwamasango akho; nomLevi, lokhu engenasabelo nafa na- we, nomfokazi, ne- ntandane, nomfelokazi, abangaphakathi kwamasango akho, bayakuza, badle, basuthe.”—Duteronomi 14:28, 29.
ILUNGELO LOKUTHOLA IHOLO ELIFANELE: “Awuyikucindezela inceku eqashiweyo empofu neswelayo, noma ingowabafowenu noma ingowabafokazi abasezweni lakini phakathi kwamasango akho.”—Duteronomi 24:14.
ILUNGELO LOKUKHOSELISWA KOMBULALI ONGAHLOSILE: “Kubantwana bakwaIsrayeli, nakumfokazi, nakogogobeleyo phakathi kwabo lemizi iyakuba-ngeyokuphephela ukuba yilowo nalowo obulala umuntu kungengamabomu abalekele khona.”—Numeri 35:15.
ILUNGELO LOKUKHOTHOZA: “Nxa nivuna isivuno sezwe lakini, awuyikuvuna ngokupheleleyo emagumbini ensimu yakho, ungakhothozi umkhothozo wesivuno sakho. Awuyikukhothoza isivini sakho, ungabuthi izithelo zesivini ezivuthulukileyo; wozishiyela abampofu nabafokazi; nginguJehova uNkulunkulu wenu.”—Levitikusi 19:9, 10.
Ngokuqinisekile, uMdali wethu, uJehova uNkulunkulu, uyabazwela ababaleki, futhi kumelwe ukuba uyajabula lapho nathi sinjalo. “Yibani ngabalingisi bakaNkulunkulu,” kubhala umphostoli uPawulu ongumKristu, “futhi niqhubeke nihamba othandweni.”—Efesu 5:1, 2.
[Umthombo Wesithombe ekhasini 9]
Boy on left: UN PHOTO 159243/J. Isaac