Ukunikeza UMdali Udumo

“IZIMBALI ezobuhle, futhi izithelo ezokudliwa. Kodwa izithelo eziningi zinhle. UBaba wethu wasezulwini uyathanda ukwenza ubuhle buhambisane nokuthile okuwusizo.” Lengcaphuno ayiveli encwadini engokwenkolo. Ivela encwadini yesayensi enesihloko esithi The Child’s Book of Nature. Njengoba yabhalwa ngo-1887, umlobi wayo, uWorthington Hooker, M.D., wayehlose ukuba lencwadi isetshenziswe emikhayeni nasezikoleni ekufundiseni izingane.

Indlela ebhalwe ngayo lencwadi inikeza ubufakazi bokuthi umlobi wayekholelwa kuMdali futhi emesaba. UDkt. Hooker uyaqhubeka ebhala: “Likhulu izinga lobumnandi bezithelo ezinhlobonhlobo emhlabeni, njengoba uzobona uma uzocabanga ngezithelo eziningi ngangokunokwenzeka. Yeka ukuthi lokhu kuwubufakazi obubabazeka kangakanani bobuhle bukaNkulunkulu! Akasithokozisi nje ngezinto ezimbalwa, kodwa ngeziningi. Izinto ezimnandi zalomhlaba cishe ziyizinhlobo eziningi. Yeka ukuthi kuyinqaba kanjani ukuthi umuntu angakwazi konke lokhu, kodwa aphile usuku nosuku ngaphandle kokubonga uMenzi wakhe!”

Lapho i-Child’s Book of Nature inyatheliswa okokuqala, kwase kuyiminyaka engaba ngu-30 izinkolelo-mbono zikaDarwin zisakazwa kabanzi. Nokho, incwadi kaDkt. Hooker ibonisa ukuthi ngisho nangasekupheleni kwekhulu le-19, incwadi ethile yayingadumisa uNkulunkulu obala, kunokuba idumise ukuzivelela ngengozi, ngezimangaliso zemvelo.—Qhathanisa no-Isaya 40:26.