Izinsuku Eziphawulekayo Emzabalazweni Wobumbano Lwamasonto Lomhlaba Wonke
1844: Ukuqalisa komzabalazo wamahlelo kamuva owaveza IziNhlangano ZobuKristu Zezinsizwa Nezintombi.
1846: Ingqungquthela yokuqala yezizwe zonke yeNhlangano yobuVangeli yamahlelo, eyabanjelwa eLondon, eNgilandi.
1908: UMkhandlu Ophethe wamaSonto kaKristu eMelika wamiswa. Ngo-1950 waba uMkhandlu Wesizwe WamaSonto kaKristu eUnited States YaseMelika.
1910: INgqungquthela Yokuqala Yomhlaba Yezithunywa Zevangeli eyabanjelwa e-Edinburgh, eScotland, “lapho kwaqalisa khona ngempela umzabalazo wobumbano lwamasonto lomhlaba wonke.”—Encyclopædia Britannica.
1919: UPapa Benedict XV wasenqaba isimemo sokuba iSonto lamaKatolika lihlanganyele neSonto laseSheshi lamaProtestani emhlanganweni owawuphathelene nokholo nokuhleleka (ukwehluka phakathi kwamasonto ngokwemfundiso nangokwenkonzo).
1921: Kwamiswa uMkhandlu Wezizwe Zonke Wezithunywa Zevangeli.
1925: Ingqungquthela yokuqala yezizwe zonke YoMkhandlu WamaKristu ophathelene neMpilo noMsebenzi (yokuhlola isimiso esivamile sesonto ezimpikiswaneni ezingokomnotho, ezingokombangazwe, nezingokwenhlalo), eyabanjelwa eStockholm, eSweden.
1927: Ingqungquthela yokuqala yezwe yomzabalazo “Wokholo Nokuhleleka” phakathi kwamasonto, eyabanjelwa eLausanne, eSwitzerland.
1928: UPapa Pius XI wakhipha incwadi eyayiya kubabhishobhi ethi Mortalium animos, enqabela amaKatolika ukuba asekele noma imuphi umzabalazo wobumbano lwamasonto lomhlaba wonke.
1937: Ingqungquthela “Yokuphila Nomsebenzi” eyabanjelwa eOxford, eNgilandi, kanye nengqungquthela “Yokholo Nokuhleleka” eyabanjelwa e-Edinburgh, eScotland, zavumelana ngokwakha ikomiti yokulungiselela yokumisa umkhandlu wamasonto womhlaba. Lomsebenzi wahlehliswa ngenxa yokugqashuka kweMpi Yezwe II.
1948: IWCC (World Council of Churches [uMkhandlu Wezwe Wamasonto]) yamiswa emhlanganweni wokukhethwa kwamalungu ayo owawubanjelwe eAmsterdam, eNetherlands. Yayakhiwe amalungu ahlanganisa cishe amaProtestani angu-150 namanye amasonto obuOrthodox aseMpumalanga. IWCC kusukela yaqala iye yabamba imihlangano emikhulu (1954: eIllinois, eU.S.A.; 1961: eNew Delhi, eNdiya; 1968: eUppsala, eSweden; 1975: eNairobi, eKenya; 1983: eVancouver, eCanada).
1960: UPapa John XXIII wamisa iNhlangano Yokuthuthukisa Ubunye BobuKristu eVatican. Lokhu “kwakuwukuqashelwa kokuqala okungokomthetho kokuba khona komzabalazo wobumbano lwamasonto lomhlaba wonke yiSonto lamaRoma Katolika.”—Encyclopædia Britannica.
1961: UMkhandlu Wezizwe Zonke Wezithunywa Zevangeli wabumbana neWCC. IVatican yaqala ukuthumela izingqapheli ezingokomthetho zamaKatolika emihlanganweni emikhulu yeWCC.
1964: UPapa Paul VI wakhipha “Isimemezelo Ngokuphathelene Nobumbano LwamaSonto Lomhlaba Wonke” eMkhandlwini Wesibili WeVatican esachaza ukulinganiselwa kokuhlanganyela kwesonto lamaKatolika emzabalazweni wobumbano lwamasonto.
1965: Upapa nenzalamizi yobuOrthodox ngokubambisana bakwenza ize ukuxoshwa ebandleni okwakhishwa ngo-1054 ngokumelene nomunye nomunye wabo izikhulu zesonto ezabandulela.
1968: ISODEPAX (IJoint Committee on Society, Development, and Peace) yamiswa iVatican neWCC.
1969: UPapa Paul VI wavakashela endlunkulu yeWCC, eGeneva, eSwitzerland. Nokho, wagcizelela ukuthi wayengene esikhundleni somphostoli uPetru nokuthi noma iyiphi inkulumo yokuzihlanganisa kweSonto lamaKatolika neWCC kwakwenzeke ngaphambi kwesikhathi.
1980: ISODEPAX yaqedwa.
1986: UPapa John Paul II wahlela “Usuku Lomkhuleko Wokuthula Lomhlaba Wonke” wobumbano lwamasonto eAssisi, eItaly, lapho abaholi abangokomoya ababemelele izinkolo ezinkulu zomhlaba bahlangana ukuze bathandazele ukuthula ngokwamasiko abo ahlukene.