Lapho Umlilo Usongela Isixuku

ELITHI umlilo liyigama elibi kubahleli bemibuthano yokuzijabulisa yomphakathi. Unyaka ngamunye, imililo ibangela ukufa kwezinkulungwane nokulimala okwesabekayo. Ingozi inkulu ngokukhethekile uma izixuku zihlangene endaweni evalekile. Yini labo abaphethe amaqembu omculo, imidlalo, imihlangano, neminye imibuthano emikhulu abangayenza ukuze banciphise ingozi yomlilo? Yini labo abayingxenye yesixuku esinjalo abangayenza ukuze bagcine izinto zilondekile? Futhi uma kwenzeka umlilo wokheleka ngempela, yini engenziwa ukuze kwandiswe amathuba okusinda?

Ukuze ithole ukwaziswa ngalezindaba, iPhaphama! yaxoxa nesikhulu sezomlilo eIreland. Siqeqesha abacimi bemililo futhi sesinokuhlangenwe nakho okuningi ngemililo.

Uma kulindeleke izixuku embuthanweni othile, yini labo abaphethe abangayenza ukuze benze izinto zilondeke?

Isinyathelo sokuqala siwukuqiniseka ukuthi isakhiwo enilindele ukusisebenzisa silondekile. Kumelwe kube nezindawo ezanele zokuphuma ukuze bonke abasesakhiweni babaleke ngokushesha uma kuphakama isidingo. Futhi, indawo yokuphuma ngayinye kumelwe iphawulwe ngokucacile futhi ingabi nazo izithiyo. Wonke amaphasishi nezitebhisi kumelwe kungabi nazikhubekiso ngaso sonke isikhathi. Iminyango yokubaleka kumelwe ivulekele ngaphandle futhi kalula.

Amalungiselelo okuhlala angase abe yinselele ezakhiweni ezingenazo izihlalo ezingagudluzeki. Kubaluleke kakhulu ukuhlela izihlalo ngokuvumelana nemithetho yendawo yomlilo. Qinisekani ukuthi bonke abakhona nabalindi bayazi ukuthi kumelwe kwenziweni uma kuba nesimo esiphuthumayo. Labo ababhekene nokulondeka kumelwe bazi ukuthi zonke izicisha-mlilo zikuphi nokuthi zisetshenziswa kanjani. Kusuke sekwephuze kakhulu ukufunda iziyalezo ngemva kokuba umlilo sewokhelekile. Futhi, khumbulani ukuthi into yokuqala ngemva kokukhipha bonke abakhona iwukushayela umnyango womlilo ucingo.

Ingabe ikhona into labo abaya emibuthanweni enjalo abangayenza ukuze bathuthukise ukulondeka?

Yebo ikhona! Abantu batatazela kalula ngokwengeziwe ezindaweni abangazijwayele. Ngakho zijwayelanise nesimo sesakhiwo okuzoba kuso umbuthano. Phawula ukuthi zikuphi izindawo zokuphuma neminyango yokubaleka. Ungatatazeli. Zibambe. Lalelisisa noma yiziphi iziqondiso ezinikezwayo futhi uzilandele. Lapho uphuma, hamba ngokushesha, kodwa musa ukugijima noma ududule.

Angazi ukuthi ngingasigcizelela kanjani isidingo sokuphuma ngokushesha. Abantu abaningi abaqapheli ukuthi umlilo ungasakazeka ngokushesha kangakanani. Siza asebegugile nababuthakathaka uma ubona ukuthi bathola ubunzima. Uma usuphumile esakhiweni, suka ngaseminyango ukuze ungavimbi indlela yalabo abakulandelayo, futhi uma usuphumile, ungalokothi uzame ukungena futhi esakhiweni kuze kube yilapho sekuthiwa silondekile.

Yisiphi iseluleko ongasinikeza abazali?

Ezixukwini ezinkulu abazali kumelwe ngaso sonke isikhathi bagcine abantwana babo abancane benabo noma baqiniseke ukuthi babhekwe umuntu omdala, othembekile. Ngesikhathi kokheleka umlilo, abazali abakhathazekile abafuna abantwana babo abalahlekile esixukwini bangabangela zonke izinhlobo zezinkinga.

Ingabe ingozi yomlilo iphelela kuphela ekushiseni kwawo okukhulu?

Cha. Ngokuvamile yintuthu namagesi anobuthi okubulalayo emlilweni. Ngisho noma intuthu ingeningi ngezinga eliyingozi, amagesi ashisa ngokweqile ayohlasela izitho zokuphefumula nesimiso semizwa salabo abawaphefumulayo. Lokhu kungabangela abantu ukuba benze ngendlela engenangqondo. Uma intuthu iningi, mboza ikhala nomlomo wakho ngeduku. Ngeke kukuvikele emagesini anobuthi, kodwa kuyosiza ekubeni kungangeni izinhlayiya ezinkulu zentuthu ezingabangela isicanucanu.

Uma intuthu iningi kakhulu, zama ukuba ngasodongeni ukuze ugweme ukulahlekelwa yingqondo. Uma ungaluboni noma ungaluzwa udonga, hamba ngosohlangothini olulodwa uze ufike kulo; khona-ke lulandele uze ufike emnyango noma efasiteleni. Futhi, khumbula ukuthi endlini egcwele intuthu, kunomoya omningana ophefumulekayo eduze naphansi, futhi lapho uzobona kangcono.

Yini engenziwa uma izingubo zomuntu zithungeleka?

Ungalokothi ugijime. Lokhu kuyomane kubhebhethekise amalangabi. Kunalokho, ziwise phansi bese uzigingqa. Lokhu kuyokwenza amalangabi angezi ebusweni bakho futhi mhlawumbe kucishe umlilo.

Kukhona okokugcina ongakusho kubafundi bethu?

Kwangathi ningeze naba nenkinga yomlilo. Kungokuhlangenwe nakho okwethusayo. Kodwa uma kwenzeka niba nayo, lemithetho embalwa iyoba usizo. Futhi khumbula, thatha ingozi yomlilo ngokungathi sína. Ungayithathi kancane noma njengehlaya. Ayilona.

[Amazwi acashunwe esihlokweni ekhasini 20]

Uma uhlala ehhotela, uyabheka njalo yini ukuthi umnyango oseduze wokubaleka ukuphi ngaphambi kokuba uyolala ebusuku?